ആഷാഢം

അതുല്യേച്ചിയും ഡോൿലയും

2011-02-19T11:48:00.008+05:30

അതുല്യേച്ചി കാരണം ഡോൿല ഞാൻ വിജയകരമായി ഉണ്ടാക്കിയ സന്തോഷവാർത്തയെല്ലാവരെയും അറിയിക്കുന്നു.

atulya sharma - ഡോക്ല പ്രിയേടെ റെസിപ്പീ... സേം സേം ഈസി പിക്ക്. ബട്ട്, ശരിയ്ക്ക്,ഞാൻ ചെയ്യാറു, 1 ഗ്ലാസ് കടലപരിപ്പ്, ഒരു സ്പൂൺ പച്ചരി, 1 സ്പൂണ ഉ.പരിപ്പ് എന്നിവ 8 മണിക്കൂർ കുതിർത്തി അത് രാവിലെ തരിതരിപ്പായിട്ട് അധികം ലൂസാവാതെ, അരച്ച് ഒരു 4 മണീക്കൂർ ഫെർമന്റിനു വയ്ക്കുക. എന്നിട്ട് അതിലേയ്ക്ക് തൈരു പുളിച്ചത് 1/2 ഗ്ലാസ്സ് ഒഴിച്ച്, ഉപ്പ് ചേർത്ത് എണ്ണ തടവിയ തട്ടിലേയ്ക്ക് വയ്ക്കുക. പ്രിയയുടെ ഫ്ലോപ്പായിട്ടുണ്ടെങ്കിൽ, ഇനോ പഴേതാവും, അല്ലെങ്കിൽ ഇഞ്ചി പച്ചമുളക് എന്നിവ കടൽമാവ് എന്നിവയിലേയ്ക്ക് ചേർത്താൽ ചിലപ്പോ അത് പഫ് അപ്പ് ആവൂല്ല :( പിന്നെ താളിച്ച് ഒഴിയ്ക്കുന്നതിനു മുമ്പ്, ഇതിലേയ്ക്ക് ചൂട് തിളച്ച വെള്ളം ഇറ്റിയ്ക്കണം, മുറിച്ച് വയ്ക്കുന്നതിലേയ്ക്ക്. എന്നാലെ സോഫ്റ്റ് ആയിട്ട് ഇരിയ്ക്കു. നല്ല കടലമാവ് എന്നതിലും വളരെ കാര്യമുണ്ട്, ഇനോ ഇട്ട് ഉണ്ടാക്കുകയാണെങ്കിൽ. പിന്നെ പുളിച്ച തൈർ കിട്ടിയില്ലെങ്കിൽ ലെമൺ ക്രിസ്റ്റലും ഇട്ട് ഉണ്ടാക്കാം. ഓവർ കുക്ക്ടും ആവരുത്. ഒരു 8 മിൻ സ്റ്റീം ഒക്കെ മതി, സിമ്മിൽ. താളിയ്ക്കുമ്പോ പചമുളകും മ്റ്റും ഇട്ട് അതിലേയ്ക്ക് മിക്സ് ചെയ്താ മതി. അല്ല ഇടണമെന്നുണ്ടെങ്കിൽ, പച്ചമുളക്ക് ഇഞ്ചി എന്നിവ അരച്ച് മാവിലേയ്ക്ക് ചേർക്കുക.

ഗൂഗിൾ ബസ്സിൽ അതുല്യേച്ചി പറഞ്ഞുതന്നതിൽ നിന്നും അല്ലറചില്ലറ വ്യത്യാസങ്ങൾ ഞാൻ വരുത്തിയിരുന്നു.
കടലപരിപ്പും ഉഴുന്നുപരിപ്പും അരിയും തലേന്ന് രാത്രി കുതിർത്തത് പിറ്റേന്ന് വെള്ളം ഒട്ടും ചേർക്കാതെ തൈരു ചേർത്താണ് അരച്ചത്. പിന്നെ 5-6 മണിക്കൂറിനു ശേഷം അതിലേയ്ക്ക് അര റ്റീസ്പൂൺ സോഡാപ്പൊടിയും ഒരു സ്പൂൺ എണ്ണയും ഉപ്പും കൂടി ചേർത്തിളക്കി ഉടനെ തന്നെ ഇഡ്‌ഢലിത്തട്ടിൽ വെച്ച് ആവി കേറ്റി. (ഒട്ടും സമയം പോവാണ്ടിരിക്കാൻ പാത്രത്തിൽ മയം പുരട്ടി, ഇഡ്ഡലിത്തട്ട് അടുപ്പിൽ വെച്ച് ആവി വന്നതിനു ശേഷമായിരുന്നു ഉപ്പും എണ്ണയും സോഡാപ്പൊടിയുമൊക്കെ ചേർത്തത്). 8 മിനിറ്റായപ്പോൾ തന്നെ സംഗതി വെന്തുകിട്ടി. എനിക്ക് എന്നിട്ടും വെന്തോന്നു സംശയം കാരണം വീണ്ടും 2 മിനിറ്റു കഴിഞ്ഞാ എടുത്തത്. പിന്നെ വെറുതെ ചൂട് വെള്ളം ഇറ്റിക്കുന്നത് ഒഴിവാക്കിയിട്ട് കടുകു വറുത്തതിലേയ്ക്ക് വെള്ളം ഒഴിച്ച് തിളപ്പിച്ച് മേലെ ഒഴിച്ചു.

എനിക്ക് ഡോൿലയുടെ കൂടെ സ്വീറ്റ് ചട്നിയാണു പ്രിയം. ഈന്തപ്പഴം ഇല്ലാതിരുന്നതു കൊണ്ട് അതിനു സ്വന്തമായൊരു റെസിപ്പി പരീക്ഷിച്ചു. പുളിവെള്ളവും ശർക്കരയും കൂടി തിളപ്പിച്ച് കുറുകി വന്നപ്പോൾ തേനും ജീരകം വറുത്തു പൊടിച്ചതും ചേർത്ത് അല്പനേരം കൂടി തിളച്ച ശേഷം ഇറക്കി. സംഗതി കൊള്ളാമായിരുന്നു.

കറുവാപ്പട്ടയും ചില സംശയങ്ങളും

2011-01-21T15:26:00.009+05:30

നാട്ടിൽ ഒരു വർഷം മുൻപ് പോയപ്പോൾ വാങ്ങിയതാണ് ഇടതു വശത്തെ ഫോട്ടോയിലെ കറുവാപ്പട്ട. ശ്രീലങ്കൻ കറുവയാണെന്ന് പറഞ്ഞാണ് കടക്കാരൻ തന്നത്. കാണാനുള്ള ഭംഗി, പിന്നെ തീക്ഷ്‌ണമായ മണം ഒക്കെ കണ്ടപ്പോൾ വാങ്ങികൊണ്ടുവന്നു. ഫോട്ടോയെടുക്കുക എന്നൊരു ദുർദ്ദേശവും കൂടിയുണ്ടായിരുന്നുവെന്നു കൂട്ടിക്കോളു. അതു കൊണ്ട് ഉപയോഗിക്കാതെ സൂക്ഷിച്ച് വെച്ചിരുന്നു. പക്ഷേ ഇപ്രാവശ്യം നാട്ടിൽ വെച്ച് കേരളകൗമുദി പത്രത്തിൽ ഒരു വാർത്ത വായിക്കാനിടയായി. ഇപ്പോൾ വരുന്ന കറുവപ്പട്ട പലതും ഒറിജിനലല്ലെന്ന്. കാസ്യ എന്ന തരമാണത്രേ കൂടുതലും മാർക്കറ്റിൽ.

ഹിന്ദുവിൽ വന്ന വാർത്തയിവിടെ കാണാം. കാസ്യ കഴിച്ചാൽ കരളിനും വൃക്കയ്ക്കും ദോഷകരമെന്നു പറയുന്നു. പല രാജ്യങ്ങളിലും അത് നിരോധിച്ചിട്ടുള്ളതായാണ് ആ വാർത്തയിൽ പറയുന്നത്.

ഒറിജിനൽ കറുവാപ്പട്ടയും കാസ്സിയയും തമ്മിലുള്ള വ്യത്യാസങ്ങളായി ഗൂഗിൾ ചെയ്തപ്പോൾ മനസ്സിലാവുന്നത്. ശരിക്കുള്ള കറുവയ്ക്ക് ലേശം മധുരമുണ്ടായിരിക്കുമെന്നും നിറം അധികം ഇരുണ്ടതായിരിക്കില്ലെന്നും പെട്ടെന്ന് ഒടിയുന്നതരവുമാണെന്നുമാണ്.സിലോൺ കറുവയാണ് ഏറ്റവും നല്ലത് എന്നും കണ്ടു.

കാസ്യയുടെ നിറം ഇരുണ്ടതും കട്ടികൂടുതലും മണം വളരെ തീക്ഷ്ണവുമായിരിക്കും. ചുരുളുകളായി വരുന്നതിന് “ഌ” ആകൃതിയായിരിക്കും. അങ്ങനെ നോക്കുമ്പോൾ എനിക്ക് കടക്കാരൻ ശ്രീലങ്കൻ പട്ടയാണെന്നു പറഞ്ഞു തന്നത് കാസ്യയാണ്. ഈപറഞ്ഞ ഗുണങ്ങളൊക്കെ അതിനുണ്ട്.

വലതുവശത്തേത് നല്ല കറുവാപ്പട്ടയാണെന്നു ഞാൻ കരുതുന്നു. മണം മറ്റേതിന്റെയത്ര തീക്ഷ്ണമല്ല പറഞ്ഞതു പോലെ മധുരം തോന്നുന്നുണ്ട്. പക്ഷേ ചുരുളായല്ലാതെ ചീന്തികിട്ടുന്നതും പുറംതൊലിയോടു കൂടിയതും പൊടിരൂപത്തിലുള്ളതുമായ കാസ്യ എങ്ങനെ തിരിച്ചറിയാമെന്നത് എനിക്കിപ്പോഴും കീറാമുട്ടിയായി നിൽക്കുന്നു. നമ്മുടെ നാട്ടിൽ കറുവാപ്പട്ട ചുരുളായല്ലല്ലോ മിക്കവാറും വിൽക്കാറ്. കാസ്യ കറുവപ്പട്ടയേക്കാൾ വില വളരെ കുറവാണെന്നാണ് വായിച്ചതിൽ നിന്നും മനസ്സിലാവുന്നത്. (പക്ഷേ എന്റെ കൈയ്യിൽ നിന്നു കാശ് അയാളതിനു കൂടുതൽ വാങ്ങി. ഇനി നമ്മുടെ നാട്ടിൽ ചുരുളായി പട്ട വരുന്നത് ചുരുക്കമായതിനാലാണോ ആവോ) യു.എസ്സിലാണിത് കൂടുതൽ ഉപയോഗിക്കുന്നതെന്നു കാണുന്നു. ഞാൻ കണ്ടിട്ടുള്ള വെസ്റ്റേൺ ഫുഡ് ഫോട്ടോസിൽ മിക്കതിലും കാണാറുള്ളത് കാസ്യയാണ്.

കൂടുതലിതിനെ കുറിച്ചറിയാവുന്നവർ ദയവായി സഹായകരമാവുന്ന വിവരങ്ങൾ പങ്കുവെയ്ക്കണമെന്നു അപേക്ഷിക്കുന്നു.

ഇവിടെയും ഇവിടെയും രണ്ടും തമ്മിൽ എങ്ങനെ തിരിച്ചറിയാമെന്നുണ്ട്.

റോക്ക് വാക്ക് - ദുർഗ്ഗംചെരുവു

2010-11-15T16:17:00.006+05:30

കഴിഞ്ഞമാസം അവസാനഞായറാഴ്ച fullhyd.com പരതികൊണ്ടിരുന്നപ്പോഴാണ് ആന്ധ്രാപ്രദേശ് പക്ഷിനിരീക്ഷണസംഘവും(BSAP) സൊസൈറ്റി റ്റു സേവ് റോക്ക്സും(STSR) സം‌യുക്തമായി നടത്തുന്ന റോക്ക് വാക്കിന്റെ അറിയിപ്പ് ശ്രദ്ധയില്‍പ്പെട്ടത്. സംഘം പുറപ്പെടുന്ന സമയം രാവിലെ 7 മണി. ഞാനതു കാണുമ്പോഴേയ്ക്കും സമയം 10 കഴിഞ്ഞിരുന്നു. അങ്ങനെ ആ യാത്ര നഷ്‌ടമായി. ഇവിടുത്തെ പക്ഷിനിരീക്ഷണസംഘത്തെ കുറിച്ച് മുൻപ് കേട്ടിരുന്നു പക്ഷേ പാറകൾ സംരക്ഷിക്കുന്നതിനായുള്ള സൊസൈറ്റിയെ കുറിച്ച് ആദ്യമായാണ് കേൾക്കുന്നത്. അവിടെ കൊടുത്തിരുന്ന ലിങ്കു വഴി അവരുടെ വെബ്‌സൈറ്റിലെത്തി. വായിച്ചപ്പോൾ വളരെ താല്പര്യം തോന്നി. സംഘത്തിന്റെ പ്രസിഡന്റ് നരേന്ദ്ര ലൂദർ! ഞാൻ വായിച്ചു കൊണ്ടിരുന്ന ഹൈദ്രാബാദ് എന്ന പുസ്തകത്തിന്റെ രചയിതാവ്. അദ്ദേഹം ആ പുസ്‌തകം തുടങ്ങിയിരിക്കുന്നത് തന്നെ ഹൈദ്രാബാദിലെ പാറകളുടെ രൂപീകരണത്തെ കുറിച്ച് പറഞ്ഞു കൊണ്ടാണ്.

2500 മില്യൺ വർഷങ്ങൾ പഴക്കമുള്ള പാറകളാണത്രേ ഇവിടെയുള്ളത്. ഹിമാലയത്തേക്കാൾ പഴക്കമേറിയത്. ലോകത്തിലെ ഏറ്റവും പഴക്കം ചെന്നതും കടുപ്പമേറിയതുമായ പാറക്കൂട്ടങ്ങളില്‍പ്പെടുമിത്. പക്ഷേ മനുഷ്യന്റെ കൈയ്യേറ്റം നിമിത്തം സിറ്റിയിലെ പാറക്കൂട്ടങ്ങളിൽ ഭൂരിഭാഗവും നഷ്ടപ്പെട്ടു കഴിഞ്ഞു. STSR ന്റെ ശ്രമഫലമായി ഹൈദ്രബാദ് അർബൻ ഡവലപ്മെന്റ് അതോറിറ്റി (HUDA) 1981ൽ 9 പാറകൂട്ടങ്ങളെ Natural Heritage ആയി പ്രഖ്യാപിച്ചു. വീണ്ടും STSR മുന്നോട്ടു വെച്ച 20 സ്ഥലങ്ങളിൽ 15 എണ്ണവും കൂടി പൈതൃകസ്വത്തിലുൾപ്പെടുത്തി. പാറകളെ Natural Heritage ആയി അംഗീകരിച്ച ഇന്ത്യയിലെ ഒരേയൊരു നഗരം ഹൈദ്രാബാദാണ്.

എന്തായാലും അടുത്ത റോക്ക് വാക്ക് മുടക്കരുതെന്ന് അന്നുറപ്പിച്ചു. എല്ലാ മാസവും മൂന്നാമത്തെ ഞായറാഴ്ചയാണ് റോക്ക് വാക്ക് സംഘടിപ്പിക്കുന്നത്. ഈ മാസം മറ്റൊരു പരിപാടി ആ ദിവസമുള്ളതിനാൽ രണ്ടാമത്തെ ഞായറാഴ്ചയാണ് ദുർഗ്ഗം ചെരുവിലേയ്ക്കുള്ള നടത്തം. ഉച്ചതിരിഞ്ഞ് 3 മണിക്കാണു സമയം. ഞായറാഴ്ച ഉറക്കവും നഷ്‌ടപ്പെടുത്തേണ്ട കാര്യമില്ല. സൈറ്റിൽ കൊടുത്തിരുന്ന നമ്പറിൽ വിളിച്ചുറപ്പിച്ചു. ജൂബിലിഹിത്സ് ചെൿപോസ്റ്റാണു മീറ്റിംഗ് പോയിന്റ്. രണ്ടര കഴിഞ്ഞപ്പോൾ വീട്ടിൽ നിന്നിറങ്ങി. ജൂബിലി ഹിൽ‌സ് അടുക്കാറായതും മഴ ചാറിതുടങ്ങി. അവിടെ ബസ്‌സ്റ്റോപ്പിൽ മദ്ധ്യവയസ്കയായ ഒരു മദാമ്മയും കുറച്ചുപേരും കൈയ്യിൽ എന്തോ നോട്ടീസും പിടിച്ച് നില്‍പ്പുണ്ട്. തൊപ്പിയും ബാഗുമൊക്കെ തൂക്കിയുള്ള നില്‍പ്പ് കണ്ടപ്പോൾ ഇതു തന്നെയാവും സംഘാംഗങ്ങളെന്നുറപ്പായി. ചെന്ന് റോക്ക് വാക്കിനായി വന്നതാണെന്നു പറഞ്ഞപ്പോൾ കൂട്ടത്തിലെ ഒരു ചെറിയ പെൺകുട്ടി എനിക്കും തന്നു നോട്ടീസൊരെണ്ണം. പാറയിലൂടെയുള്ള നടത്തത്തിൽ ശ്രദ്ധിക്കേണ്ട കാര്യങ്ങളെ കുറിച്ചായിരുന്നത്. ശാരീരികമായി ഫിറ്റ് ആണെങ്കിൽ മാത്രം യാത്രയിൽ പങ്കെടുക്കുക. കഴിവതും ഗ്രിപ്പുള്ള ഷൂസ്, നീളൻ പാന്റ്സ്, തൊപ്പി മുതലായവ ധരിക്കുക. വെള്ളം കൂടെ കരുതുക. പാറകളുടെ വിടവുകളിൽ കൈയ്യിടാൻ ശ്രമിക്കാതിരിക്കുക തുടങ്ങി ശ്രദ്ധിക്കേണ്ട 9 നിർദ്ദേശങ്ങളും ഗ്രൂപ്പ് ലീഡറിന്റേതടക്കം 5 സൊസൈറ്റി അംഗങ്ങളുടെ മൊബൈൽ നമ്പറുകൾ അടങ്ങിയതായിരുന്നു നോട്ടീസ്. അത് വായിച്ചു കൊണ്ടിരുന്നപ്പോൾ മഴ തകർത്തു പെയ്‌തു തുടങ്ങി. ഞാനാകെ ആശങ്കയിലായി. നല്ല ചൂടാവുമെന്നു കരുതി വെള്ള പാന്റ്സാണു സൽ‌വാറിന്റെ കൂടെയിട്ടിരിക്കുന്നത്. കാലിലാണെങ്കിൽ സാധാരണ ചെരിപ്പും, കൂടാതെ ആദ്യത്തെ റോക്ക് വാക്കും. മഴത്തെ പാറകയറ്റത്തിൽ തെന്നിയടിച്ച് എവിടെയെങ്കിലും വീഴുമോയെന്നായി പേടി. ഇതിനിടയിൽ ഒരു ഡയറിയിൽ എല്ലാവരുടെയും പേരും ഫോൺനമ്പരും എഴുതി ഒപ്പിടുവിച്ചു. മഴ നനയാതിരിക്കാനായി ഞങ്ങൾ നിൽക്കുന്നതിന്റെ എതിർവശത്തുള്ള പെട്രോൾ പമ്പിൽ ഒരു വിദേശപെൺകുട്ടിയും പയ്യനും നില്‍പ്പുണ്ട്. ഞങ്ങളുടെ കൂട്ടത്തിലേയ്ക്കാണോയെന്നറിയാനായി കൈവീശി കാണിച്ചിട്ടും ശ്രദ്ധിക്കാതെയാണവരുടെ നില്‍പ്പ്. മഴ പതിയെ കുറഞ്ഞു തുടങ്ങി. കൂട്ടത്തിൽ നിന്നൊരാൾ അവരുടെ അരികിൽ പോയി അവരെ കൂട്ടികൊണ്ടു വന്നു. എല്ലാവരും പരസ്പരം പരിചയപ്പെട്ടു. ഞങ്ങളുടെ ഗ്രൂപ്പിനെ നയിക്കുന്നത് ഫ്രൗക്കേ എന്ന ജർമ്മൻ ലേഡിയാണ്. സൊസൈറ്റി അംഗങ്ങളായ വാസുവും രവിയും, നോട്ടീസ് വിതരണം ചെയ്ത ചെറിയ പെൺകുട്ടിയുടെ പേര് വാണി. ഫ്രൗക്കേയുടെ കൂടെ വന്നതാണവൾ അവളുടെ മൂന്നാമത്തെ യാത്രയാണിത്. എന്നെയും സതീഷിനെയും കൂടാതെ മറ്റൊരു കുടുംബം കൂടെയുണ്ട്. ശ്രീനിവാസും ഭാര്യയും മക്കളായ നിഖിലയും ഗോവിന്ദും. മറ്റൊരു ശ്രീനിവാസ് കൂടിയുണ്ട് N.V. ശ്രീനിവാസ് പിന്നെ രഘുറാമും. വിദേശി പെൺകുട്ടിയുടെയും പയ്യന്റേയും പേരുകൾ ഇനായും പേയ്റ്ററും അവരും ജർമ്മൻ‌കാരാണ്.

ഫ്രൗക്കേയുടെ കാറിനെ പിന്തുടർന്നു വരാനുള്ള നിർദ്ദേശത്തോടെ യാത്രയാരംഭിച്ചു. ദുർഗ്ഗംചെരുവിലേയ്ക്ക് ഹൈടെക്ക് സിറ്റിയിൽ നിന്നുള്ള വഴിയിലൂടെ ഞങ്ങൾ പോയിട്ടുണ്ട്. പക്ഷേ മറ്റേതോ വഴിയിലൂടെയാണു ഫ്രൗക്കേയുടെ യാത്ര. കുത്തനെയുള്ള ഒരു ഇറക്കവും കയറ്റവും കഴിഞ്ഞതോടെ വണ്ടി നിർത്തി എല്ലാവരും പുറത്തിറങ്ങി. മഴ പൂർണ്ണമായും മാറികഴിഞ്ഞു. ഞങ്ങൾ BNR ഹിൽ‌സിലാണ് എത്തിചേർന്നത്. ഒരു ചെറിയ ചെൿപോസ്റ്റ് കടന്ന് റോഡിനു നടുവിൽ തന്നെയുള്ള ഒരു പാറക്കൂട്ടത്തിനരുകിലേയ്ക്ക് ഫ്രൗക്കേ ഞങ്ങളെ കൂട്ടികൊണ്ടു പോയി. അതിന്റെ ചുറ്റിനും കല്ലു കൊണ്ട് തറകെട്ടിതിരിച്ചിട്ടുണ്ട്. ഹുഡയുടെ സംരക്ഷണലിസ്റ്റിൽ പെട്ട പാറകളിലൊന്നാണത്. പേര് ടോർട്ടോയിസ് റോക്ക്.

രണ്ടു പാറയുടെ മുകളിലേക്ക് കുറച്ചു പാറകൾ ഏതോ ഭീമാകാരൻ എടുത്തു വെച്ചത് പോലെയുണ്ട്. വാസു അതിനിടയിൽ അതിന്റെ മുകളിൽ കയറാനൊരു ശ്രമം നടത്തി.

കയറാനായി ഇനിയും ധാരാളം പാറകളുണ്ട് ഇവിടെയധികം സമയം കളയണ്ടയെന്നു പറഞ്ഞു കൊണ്ടു ഫ്രൗക്കേ നടത്തം തുടർന്നു. സംഘത്തിന്റെ ഫോട്ടോയെടുത്ത എന്നോട് നാളത്തെ പത്രത്തിന്റെ പേജ് 3 യിൽ ഉണ്ടാവുമോ പടമെന്നു ചോദിച്ചു കളിയാക്കി.

റോഡിൽ നിന്നും ചെറിയൊരു വഴിയിലൂടെ ഒരു കാട്ടുപ്രദേശത്തു കൂടിയായിരുന്നു നടത്തം. അകലെ ഒരു വലിയ കെട്ടിടസമുച്ചയത്തിന്റെ പണി നടക്കുന്നത് കാണാം. വഴിയിൽ രണ്ടു തൂക്കണാം കുരുവികൂടുകളും ഒരു കൽകെട്ടിതിരിച്ച ടാങ്കും കണ്ടു. ഒരു വളവു തിരിഞ്ഞു കഴിഞ്ഞതും ഞങ്ങൾ ഒരു മലയുടെ ചരുവിലൂടെയായി യാത്ര.

ചാണകം വഴിയിൽ ഇടയ്ക്കൊക്കെ കിടപ്പുണ്ട്. ഇവിടെ കാട്ടുപന്നിയുടെ കാണാറുള്ള സ്ഥലമാണ് അതിനാൽ സൂക്ഷിച്ചു നടക്കാൻ നിർദ്ദേശം കിട്ടി. മലയ്ക്കു മുകളിൽ ഒരു കുരങ്ങനേയും ഇടയ്ക്കെവിടുന്നോ പൊങ്ങിപ്പറന്ന രണ്ടു മയിലുകളേയും കണ്ടു. വീണ്ടും പാറകൾക്കിടയിലൂടെ മുന്നോട്ട് കുറേ ദൂരം നടന്നു കഴിഞ്ഞപ്പോൾ ഒരു കാ‍ണയുടെ അവശിഷ്ടം കാണാൻ സാധിച്ചു. അതും കഴിഞ്ഞ് വീണ്ടും മുന്നോട്ടു പോയപ്പോൾ ഒരു ചെറിയ അമ്പലത്തിനടുത്തെത്തി. അതിനു ചുറ്റുമുള്ള പാറകളൊക്കെ വെള്ളനിറം പൂശി ചുവപ്പു വരയും ഓം ഒക്കെ വരച്ചു വെച്ചിട്ടുണ്ട്. ഇതിനിടയിൽ രഘുറാം ഇനയോട് സംസാരം തുടങ്ങി. ഇനയ്ക്ക് വാ തുറക്കാനോ,മറ്റൊന്നും ശ്രദ്ധിക്കാനോ അവസരം കൊടുക്കാതെയാണു സംസാരം. ഞങ്ങൾ കുറച്ചു മരങ്ങൾക്കിടയിലൂടെ നടന്ന് മറ്റൊരു അമ്പലത്തിനടുത്തെത്തി.

അവിടെ രണ്ടു വലിയ മരങ്ങളുണ്ട്. അതും കടന്ന് വീണ്ടും മുന്നോട്ടു നടന്നപ്പോ വെള്ളം ശക്തിയായി വീഴുന്നതിന്റെ ശബ്‌ദം കേട്ടു തുടങ്ങി. ഒരു ചെറിയ ടാങ്കുപോലെയുള്ളതിൽ നിന്നും ചതുരത്തിലെ ദ്വാരം വഴി വെള്ളം താഴേയ്ക്കൊഴുകുന്നു.

ദുർഗ്ഗംചെരുവു തടാകത്തിൽ നിന്നുള്ള വെള്ളമാണ് ഈ ടാങ്കിലേക്ക് എത്തുന്നതെന്നു ഫ്രൗക്കേ പറഞ്ഞു തന്നു. അതിനു മുന്നേ ഞങ്ങൾ കണ്ട കാണ ഖുത്തബ് ഷാഹികളുടെ കാലഘട്ടത്തിൽ ഗോൽക്കൊണ്ടയിലേയ്ക്ക് ദുർഗ്ഗംചെരുവിൽ നിന്നും ശുദ്ധജലമെത്തിക്കാനായി നിർമ്മിച്ച ചാലുകളാണവ.

അല്പം കൂടി മുന്നോട്ട് പോയതും ഞങ്ങളൊരു ബണ്ടിനരുകിലെത്തി. ദുർഗ്ഗംചെരുവിന്റെ ബണ്ടാണത്. അതിന്റെ ഒരറ്റത്തായി ചെറിയൊരു മുസ്ലിം പള്ളി കാണാം. മറ്റേയറ്റത്ത് നിന്നും നോക്കിയപ്പോൾ താഴെ പാറയിൽ കുറച്ചു ചെറുപ്പക്കാർ മീൻ പിടിക്കുന്നുണ്ട്.

മരങ്ങളുടെ മറയില്ലാത്തിടത്തുകൂടി നോക്കിയാൽ തടാകത്തിന്റെ സുന്ദരമായ കാഴ്ച കാണാം. എതിർവശത്തെ ഭാഗം മുഴുവൻ വലിയ കെട്ടിടങ്ങൾ കൈയ്യടക്കി കഴിഞ്ഞിരിക്കുന്നു.

ദുർഗ്ഗമെന്നാൽ കോട്ടയെന്നും എത്തിചേരാൻ പ്രയാസമേറിയതെന്നും ചെരുവു എന്നാൽ തടാകമെന്നുമാണ് അർത്ഥം. പാറക്കൂട്ടങ്ങളാൽ ചുറ്റപ്പെട്ടതു കൊണ്ട് എത്തിച്ചേരാൻ വളരെ പ്രയാസമായതിനാലും പാറക്കൂട്ടത്തിനാൽ കാഴ്ചയിൽ മറഞ്ഞിരുന്നതിനാൽ സീക്രട്ട് ലേക്കെന്നും ഇത് അറിയപ്പെടുന്നു. പക്ഷേ ഇപ്പോൾ പലഭാഗങ്ങളും പാറകൂ‍ട്ടങ്ങളിടിച്ചു നിരത്തി ആ സ്ഥാനം കെട്ടിടങ്ങൾ കൈയ്യേറികഴിഞ്ഞു. ഈ തടകത്തിൽ നിന്നും ശുദ്ധജലം ചാലുകൾ വഴി ഗൊൽകൊണ്ടയുടെ അടുത്തുള്ള കട്ടോര ഹൗസ് എന്ന കുളത്തിലേയ്ക്കും അവിടെനിന്നും ഗൊൽകൊണ്ട കോട്ടയിലേയ്ക്കും ഖുത്തബ് ഷാഹി ശവകുടീരങ്ങളിലേയ്ക്കും കൊണ്ടു പോയിരുന്നു. തടാകത്തിലേയ്ക്ക് ബണ്ടിൽ നിന്നും ഇറങ്ങാൻ കല്‍പ്പടവുകളും കാണാൻ സാധിച്ചു. ബണ്ടിന്റെ അറ്റത്തായി കണ്ട ചെറിയ പള്ളിയാണ് തനാഷാ മസ്‌ജിത്ത്. തനാഷാ ഖുത്തബ്‌ഷാഹി രാജാക്കന്മാരിൽ അവസാനം ഭരണത്തിലിരുന്നയാളാണ്. മസ്‌ജിത്തിനു പുറകിലായി കുറച്ചു വലിയ വഴി കാണുന്നുണ്ട്. പക്ഷേ വാസു മസ്ജിത്തിനും അതിനോടു ചേർന്നുള്ള പാറയുടേയും ഇടയിലൂടെ അകത്തേയ്ക്ക് കയറി പോയി. അല്പം കഴിഞ്ഞ് ഞങ്ങൾക്ക് ആ വഴി വരാൻ സേഫാണെന്നറിയിച്ചു. അതു വഴിയായി പിന്നെ യാത്ര. രവി ഇതിനിടയിൽ താമസിച്ചു വന്ന രണ്ടംഗങ്ങൾക്കായി തിരികെ പോയി. കുറ്റിചെടികൾക്കും പാറക്കൂട്ടങ്ങൾക്കും ഇടയിലൂടെ നടന്നു ഇടയ്ക്ക് തടാകത്തിൽ നിന്നും അടിഞ്ഞ പ്ലാസിക്ക് ഉൾപ്പെടേയുള്ള വേസ്റ്റുകളും ചേർന്ന് അസഹ്യമായി നാറ്റമായിരുന്നു. ഞങ്ങൾ നടന്ന് ഒരു മലയുടെ താഴ്വാരത്തെത്തി. വഴിയൊന്നും കാണ്മാനില്ല. തോളൊപ്പം വളർന്നു നിൽക്കുന്ന ചെടികളൊക്കെ വകഞ്ഞു മാറ്റിയാണു നടന്നു പോകുന്നത്. ഈ ചെടികൾക്കിടയിലൂടെ ഫ്രൗക്കെ എങ്ങനെ വഴി മനസ്സിലാക്കുന്നു എന്നതാണ് ഏറ്റവും അത്ഭുതപ്പെടുത്തിയത്. മലയുടെ മുകളിൽ കയറാനായി ഏറ്റവും ആയാസം കുറഞ്ഞ വഴി കാണിച്ചുകൊണ്ടാണ് വാസും ഫ്രൗക്കെയും മുന്നിൽ നടക്കുന്നത്. ഞങ്ങൾ കയറ്റം ആരംഭിച്ചു.

വാസു ഒരു വലിയ പാറയുടെ മുകളിൽ കയറി ഞങ്ങളെ അങ്ങോട്ടു വിളിച്ചു. അങ്ങോട്ടേയ്ക്കുള്ള വഴിയിൽ ഗോവിന്ദ് (ശ്രീനിവാസന്റെ മകൻ) രണ്ടു പാറയുടെയിടയിലുള്ള വിടവിലേയ്ക്ക് വീണു. അധികം ആഴമില്ലാഞ്ഞതിനാൽ പരുക്കുകളൊന്നുമില്ലാതെ രക്ഷപ്പെട്ടു. ഇതിനിടയിൽ വാണിയും നിഖിലയും നല്ല കൂട്ടായി കഴിഞ്ഞു.കഥകളൊക്കെ പറഞ്ഞു കൊണ്ടാണ് രണ്ടിന്റേയും നടപ്പ്. രഘുറാം ഇടയ്ക്കെപ്പഴോ ഇന പ്രതിഷേധമറിയിച്ചതോടെ പേയ്റ്ററിനോടായി കത്തിവെയ്ക്കൽ. ഉയരത്തിലെത്തിയപ്പോൾ തടാകം താഴെ കാണുന്നുണ്ട്. ഏറ്റവും മുകളിലത്തെ വലിയ പാറക്കൂട്ടത്തിൽ കയറാനായി മാർഗ്ഗമൊന്നും കാണാഞ്ഞതിനാൽ ഞങ്ങൾ താഴേയ്‌ക്കിറങ്ങാൻ തീരുമാനിച്ചു.

മുകളിലേയ്ക്ക് കയറുന്നതിനേക്കാൾ പ്രയാസമായിരുന്നു താഴേയ്ക്കുള്ള ഇറക്കം. പാറയുടെ മുകളിൽ നിന്ന് വാസുവിന്റെ നിർദ്ദേശമനുസരിച്ച് ഫ്രൗക്കെ ഒരു പാറയിലൂടെ ഊർന്ന് താഴേക്കിറങ്ങി. പുറകെ ഞങ്ങൾ ഓരോരുത്തരും. ഇറങ്ങുമ്പോ ചവിട്ടേണ്ടയിടവും മറ്റും വാസു വ്യക്തമായി പറഞ്ഞു തരുന്നുണ്ടായിരുന്നു. അപ്പഴേയ്ക്കും സൂര്യൻ അസ്‌തമിച്ചു തുടങ്ങിയിരുന്നു.

ഏറ്റവും താഴെ എല്ലാവരും എത്തിചേർന്നപ്പോൾ അവിടെ രവിയും വേറെ രണ്ട് സജീവാംഗങ്ങളും ഞങ്ങളെ കാത്തു നില്‍പ്പുണ്ടായിരുന്നു.
എല്ലാവരേയും ഫ്രൗക്കേയും വാസുവും കൈയ്യടിച്ച് പ്രോത്സാഹിപ്പിച്ചു.

ഇനി വളരെ വേഗത്തിൽ നടന്നാലേ 20 മിനിറ്റു കൊണ്ട് പൂർണ്ണമായും ഇരുട്ടും മുന്നേ കാട്ടുപന്നികളുടെ ശല്യമുള്ള സ്ഥലം കടന്ന് തുടങ്ങിയിടത്തെത്താൻ പറ്റുവെന്ന പറഞ്ഞു കൊണ്ട് ഫ്രൗക്കെ മുന്നേ നടന്നു തുടങ്ങി. കുറച്ചു ദൂരം നടന്നു കഴിഞ്ഞപ്പോൾ ദുർഗ്ഗം ചെരുവു ബണ്ടിനരികിൽ തിരികെയെത്തി. അവിടെ നിന്നും വന്ന വഴിയെ തിരികെ നടന്നു തുടങ്ങി.

ഓരോ റോക്ക് വാക്കും വ്യത്യസ്‌തമാണെന്നു ഫ്രൗക്കേ പറഞ്ഞു. കുത്തനേയുള്ള ചില സ്ഥലങ്ങളിൽ ചെറുപ്പക്കാർ പാറയിൽ അള്ളിപിടിച്ചു കയറുമെന്നും മറ്റുള്ളവർ താഴെ ആയാസം കുറഞ്ഞ പാതയിലൂടെ പാറയെ വലം വച്ച് നടക്കുമെന്നും പറഞ്ഞു തന്നു. അങ്ങനെ റോക്ക് വാക്കിന്റെ ഓരോ വിശേഷങ്ങളും കേട്ട് ഞങ്ങൾ തുടങ്ങിയിടത്ത് തിരികെയെത്തി.

അവിടെ വെച്ച് ഫൗക്കേ ഫ്ലാസ്കിൽ കൊണ്ടു വന്ന ചായയും ബിസ്ക്കറ്റും എല്ലാവർക്കും വിതരണം ചെയ്‌തു. നവംബർ 21 നു ഗോൽകൊണ്ടയിൽ വെച്ചു നടത്തുന്ന ഏരിയൽ ഡാൻസിന് ക്ഷണിച്ചു കൊണ്ട് അതിന്റെ ലഘുലേഖകൾ എല്ലാവർക്കും തന്നു.

ഞങ്ങളുടെ കൂട്ടത്തിലെ മിന്നുംതാരങ്ങൾ കുഞ്ഞുമണികളായാ നിഖിലയും വാണിയും തന്നെയായിരുന്നു. ഗോവിന്ദ് വീഴ്ച കഴിഞ്ഞതോടു കൂടി “കണ്ടാൽ കയറാൻ എളുപ്പമാണെന്നു തോന്നും പക്ഷേ അത്ര എളുപ്പമല്ല മമ്മീന്ന് ” അമ്മയോട് പറയണുണ്ടായിരുന്നു. എന്റെ വെളുത്ത പാന്റ്സ് പകുതിഭാഗം കാവിനിറത്തിലാ‍യി. അടുത്ത പ്രാവശ്യം വാക്കിംഗ് ഷൂ തന്നെയിട്ടു വരുന്നതാണു സുരക്ഷിതം എന്നു എനിക്ക് സംഘാംഗങ്ങളുടെ ഉപദേശം കിട്ടി. സാധാരണ ഞാൻ ഇവിടുള്ള പാർക്കുകളിൽ ശലഭങ്ങളുടെ പടം പിടിക്കാനായി കാട്ടിൽ കയറിയാൽ അന്ന് ദേഹം മുഴുവൻ ചൊറിച്ചിലായിരിക്കും. പക്ഷേ ഇവിടെ ഇത്രയും ചെടികൾക്കിടയിലൂടെ മുട്ടിയുരുമ്മിപോയിട്ടും ചൊറിച്ചിലെന്നൊരു സംഗതിയേ അനുഭവപ്പെട്ടില്ല. വഴിയിൽ ഉഴിഞ്ഞ, ചെറൂള, തഴുതാമ, മറ്റു പല ഭംഗിയുള്ള ചെറിയ പൂക്കളുള്ള ചെടികളും കണ്ടു. നടത്തമവസാനിച്ചതും ക്ഷീണത്തേക്കാൾ അധികം ഉന്മേഷമാണെനിക്കനുഭവപ്പെട്ടത്.മുല്ലപ്പൂമ്പൊടിയേറ്റു കിടക്കും കല്ലിനുമുണ്ടാമൊരു സൗരഭ്യം എന്ന പഴച്ചൊല്ല് പോലെ ഈ പ്രായത്തിലും ഇത്രയും ചുറുചുറുക്കോടെ നടക്കുന്ന ഫ്രൗക്കേയുടെ പൂമ്പൊടി ഇത്തിരി എന്റെ മേലേയും വീണുകാണുമായിരിക്കും. അത്രയ്ക്ക് എനിക്ക് ബഹുമാനം തോന്നിയ വ്യക്തിത്വം.
20 വർഷത്തിനു മേലേയായി ഫ്രൗക്കേ ഹൈദ്രാബാദിൽ താമസമായിട്ട്. ഇന്ത്യാടുഡേയിൽ വന്ന ഒരു ന്യൂസ് ആർട്ടിക്കിൾ ഇവിടെ വായിക്കാം. മറ്റൊരു നാട്ടിൽ നിന്നും ഇവിടെയെത്തി നമ്മുടെ പൈതൃകത്തെ സംരക്ഷിക്കാനായുള്ള അവരുടെ അഭിനിവേശത്തിനും പ്രയത്നത്തിനും ഒരു വലിയ സല്യൂട്ട്!

മുൻ‌കൂർ ജാമ്യം :- ലെൻസിന്റെ ഓട്ടോഫോക്കസ് നഷ്ടപ്പെട്ടതിനാൽ പല ചിത്രങ്ങളും നേരാംവണ്ണം ഫോക്കസായിട്ടില്ല. എന്റെ കണ്ണിന്റെ ഫോക്കസും കുറഞ്ഞു തുടങ്ങീന്ന് തോന്നുന്നു. ക്ഷമിക്കുക.

ലംബാടികൾ സീതപ്പഴങ്ങളുമായി വീണ്ടും

2010-11-10T18:11:00.003+05:30

സീതപ്പഴത്തിന്റെ സീസൺ ഇവിടെ ഹൈദ്രാബാദിൽ പലപ്പോഴും ലംബാടികളുടെ വരവോടെയാണ് ആരംഭിക്കാറ്.

കാളവണ്ടികളിൽ സീതപ്പഴവും നിറച്ച് ഗ്രാമങ്ങളിൽ നിന്നും നഗരത്തിന്റെ പല പ്രാന്തപ്രദേശങ്ങളിലും അത് വിറ്റു തീരുന്നതു വരെ ക്യാമ്പു ചെയ്യാറ് ഇവർ പതിവ്. ഇപ്രാവശ്യവും നഗരത്തിലെ സ്ഥിരമായി വരാറുള്ള സ്ഥലങ്ങളിലെ റോഡരുകുകളിൽ അവർ ക്യാമ്പു ചെയ്തു കഴിഞ്ഞു.

ഇവർ ക്യാമ്പു ചെയ്യുന്ന ബോവൻ‌പ്പള്ളി, ESI, ഇന്ദിരാപാർക്ക്, റഹ്‌മത്ത് നഗർ, എരഗഡ്ഢ എന്നിവിടങ്ങളിൽ പോയെങ്കിലും എരഗഡ്ഢയിൽ മാത്രമേ നാലു കാളവണ്ടികൾ കാണാൻ സാധിച്ചുള്ളൂ.

അന്വേഷിച്ചപ്പോൾ മിക്കവരും ഇപ്പോൾ ഓട്ടോ വാടകയ്ക്കെടുത്ത് അതിലാണു പഴങ്ങൾ കൊണ്ടു വരുന്നതെന്നാണ് പറഞ്ഞത്. ഗ്രാമങ്ങളിൽ കാളകളെ പലരും വിറ്റുകളയുകയാണത്രേ. ഹൈദ്രാബാദിൽ നിന്നും ഏകദേശം 50 കി.മീ. അകലെയുള്ള ഭൂവനഗിരിയിലെ വിവിധ ഗ്രാമങ്ങളിൽ നിന്നുമാണിവരുടെ വരവ്. വിറ്റുതീരുന്നതിനനുസരിച്ച് സീതപ്പഴങ്ങൾ ഗ്രാമങ്ങളിൽ നിന്നു വീണ്ടും കൊണ്ടു വരും. ഏകദേശം ഒരു മാസത്തോളമുണ്ടാവാറുണ്ട് അവരിവിടെ.

സീതപ്പഴത്തിന്റെ സീസൺ തീരുന്നതോടു കൂടി തിരികെ നാടുകളിൽ പോയി ചിലർ കൃഷിയും മറ്റു ചിലർ കൂലിപ്പണികളും ചെയ്താണു ജീവിതം പുലർത്തുന്നത്. ലംബാടികളുടെയടുക്കൽ നിന്നും സീതപ്പഴങ്ങൾ വാങ്ങി കച്ചവടം ചെയ്യുന്നവരും നഗരത്തിലുണ്ട്.

കാളവണ്ടികളെ പോലെ തന്നെ ലംബാടികളുടെ വർണ്ണാഭമായ തനതുവേഷവും ആഭരണങ്ങളും ധരിക്കുന്നവരും അവരുടെ ഇടയിൽ വളരെ കുറഞ്ഞു വന്നുകൊണ്ടിരിക്കയാണ്. മദ്ധ്യവയസ്സുള്ള കുറച്ചുപേർ മാത്രമേ ഇപ്പോഴതു ധരിച്ചു കണ്ടുള്ളൂ. മറ്റെല്ലാവരും സാധാരണ വേഷത്തിലേയ്ക്ക് വഴിമാറികഴിഞ്ഞു.

ഫോട്ടോയെടുക്കുന്നതു കണ്ടപ്പോ വഴിയിൽ നിന്നും കുടിയിറക്കാൻ സർക്കാർ പറഞ്ഞു വിട്ടയാളാണോ ഞാനെന്നായിരുന്നു ചിലർക്ക് സംശയം. ലംബാടികൾ ഫോട്ടോസെടുക്കാൻ ചെന്നാൽ വളരെ ഡിമാന്റിംഗ് ആണെന്നു ചിലയിടത്ത് വായിച്ചിരുന്നു. പക്ഷേ എന്നോട് വളരെ സ്നേഹപൂർവ്വമായിരുന്നു മിക്കവരും പെരുമാറിയത്. പലരും എനിക്ക് കഴിക്കാൻ സീതപ്പഴങ്ങളും തന്നു.

എടുത്ത ഫോട്ടോസിൽ ചിലത് പ്രിന്റ് എടുത്തത് കൊടുക്കാനായി ഞാൻ വീണ്ടും പോയിരുന്നു. ഫോട്ടോ കിട്ടാത്ത ചിലര് പരിഭവം പറഞ്ഞു. പോർട്രേറ്റ് കൊടുത്തവർക്കൊക്കെ ഫുൾസൈസ് എടുക്കാഞ്ഞതിലായി പരിഭവം. അങ്ങനെ ആകെ രസകരമായിരുന്നു സംഭവം.

എനിക്ക് രണ്ടാമത് പോയപ്പോ തിരിച്ചറിയാൻ പറ്റാതിരുന്നൊരാളാണ് താഴെ ഫോട്ടോയിൽ. ആദ്യം പോയപ്പോ ആടയാഭരണങ്ങളൊന്നുമില്ലാതെ വലതുവശത്തേതിലെ പോലെയായിരുന്നു നില്പ്. രണ്ടാമതു ചെന്നപ്പോ ആ ഫോട്ടോ ഇടതുവശത്തെ രൂപം കൈക്കലാക്കി. ഇവരെന്തിനാ ആ ഫോട്ടോ മേടിച്ചതെന്നു കരുതി ഫോട്ടോയിലെ ആളെ അന്വേഷിച്ചപ്പോഴാണ് ഞാൻ തന്നെയതെന്നു മറുപടി പറഞ്ഞ് എന്നെ അമ്പരിപ്പിച്ചത്.

സബ്‌ജാ

2010-10-18T11:55:00.006+05:30

ഫലൂദ പലരും കഴിച്ചിട്ടുണ്ടാവും. അതിലുപയോഗിക്കുന്ന സബ്‌ജാ(Subja seeds) അല്ലെങ്കിൽ തുക്‌മാരിയ (Tukmaria)യും മിക്കവരും കണ്ടിട്ടുണ്ടാവും. എന്നാൽ അതിന്റെ ചെടി കണ്ടിട്ടുണ്ടോ?

കഴിഞ്ഞയാഴ്‌ച സീതപ്പഴത്തിന്റെ എക്സിബിഷൻ കാണാൻ അവസരം കിട്ടി. ഹൈദ്രാബാദിലെ പബ്ലിക്ക് ഗാർഡൻസിലെ ഹോർട്ടികൾച്ചറൽ ഓഫീസിലായിരുന്നു വെച്ചായിരുന്നു. എക്സിബിഷൻ കണ്ട ശേഷം ആ ഓഫീസിലെ വളപ്പിലെ ചെടികളും നോക്കി കുറച്ചുപേർ ചുറ്റിനടപ്പുണ്ടായിരുന്നു. അതിലൊരു സ്‌ത്രീ സബ്‌ജായെന്നു പറഞ്ഞ് രാമതുളസി പോലെയുള്ള ഒരു ചെടിയുടെ ഇല നുള്ളി മണക്കുന്നതു കണ്ടു.

അതു രാമതുളസിയല്ലേയെന്നു ചോദിച്ച എന്നോട് അവരതു ഫലൂദയിൽ ഉപയോഗിക്കുന്ന കുരുവിന്റേതാണെന്നു പറഞ്ഞു തന്നു. കണ്ടാൽ രാമതുളസിയോട് നല്ല സാമ്യമുണ്ട്. എന്നാൽ മണം വ്യത്യാസമുണ്ട്. ഇലയ്ക്ക് രാമതുളസിയുടെ ഇലയുടേതിലും കട്ടി തോന്നി.

വിക്കിയിൽ ഇങ്ങനെ കാണുന്നു.

Basil seeds

When soaked in water the seeds of several basil varieties become gelatinous, and are used in Asian drinks and desserts such as falooda or sherbet. Such seeds are known variously as sabza, subza, takmaria, tukmaria, tukhamaria, falooda, selasih (Malay/Indonesian) or hột é (Vietnamese). They are used for their medicinal properties in Ayurveda, the traditional medicinal system of India and Siddha medicine, a traditional Tamil system of medicine. They are also used as popular drinks in Southeast Asia.

തുളസിയുടെ അരിയായ ഇതിന് എന്തുകൊണ്ട് നമ്മുടെ നാട്ടിൽ “കറുത്ത കസ്‌കസ്” എന്നു പേരു വന്നുവെന്നു മനസ്സിലാവുന്നില്ല. അരിക്ക് കാഴ്‌ചയിൽ എള്ളിനോട് കുറച്ച് സാമ്യമുണ്ട്. എന്നാലും വലുപ്പം അതിലും കുറവാണ്.

വെള്ളത്തിലിട്ടാൽ 5 മിനിറ്റിനുള്ളിൽ കുതിർന്ന് വാൽ‌മാക്രി പരുവത്തിലാവും.

ഫലൂദ ഞാനിതുവരെ കഴിച്ചിട്ടില്ല. എന്നാൽ കുഞ്ഞുന്നാളിൽ സബ്‌ജ ചേർത്ത പനനൊങ്കിന്റെ സർബ്ബത്ത് തിരുവനന്തപുരത്തു നിന്നും കുടിച്ചതോർമ്മയുണ്ട്. ഞങ്ങളുടെ നാട്ടിൽ(ആലപ്പുഴ)ഇത് ഞാനധികം ഉപയോഗിച്ച് കണ്ടിട്ടില്ല. ഇവിടെ (Hyderabad)ധാരാളം പ്രാവശ്യം ഫലൂദ മെനുവിലും കടകളുടെ മുന്നിലും എഴുതിവെച്ച് കണ്ടിട്ടുണ്ട്. പാരഡൈസ് ഹോട്ടലിലെ ഫലൂദ വളരെ നല്ലതാണെന്നു സൈറ്റിൽ ഒരാൾ എഴുതി കണ്ടു. അപ്പോ ഇനിയെന്നെങ്കിലും പാരഡൈസിൽ പോവുമ്പോൾ തന്നെ “കന്നികുടി” നടത്തികളയാം. വെറുതെ കൊള്ളാത്തയെവിടെയെങ്കിലും പോയി ആക്രാന്തം മൂത്ത് കുടിച്ച് ഫലൂദ എന്നു കേട്ടാലേ ഓടണ്ട അവസ്ഥയിലായി പോയാലോ.

സബ്‌ജ കൊണ്ട് വീട്ടിലൊരു പരീക്ഷണം നടത്തിനോക്കി. പേരക്കാ ജ്യൂസിൽ 7അപ്പും സബ്‌ജയും ചേർത്ത്, ഞാൻ കോളാവിരോധിയായതിനാൽ, വീട്ടിൽ വന്ന അതിഥിക്ക് മേൽ പരീക്ഷിച്ചു. :))
പരീക്ഷണം വിജയമായിരുന്നുവെന്നാണു പുള്ളിക്കാരി പറഞ്ഞത്.ദാ അതിന്റെ പടം.

സബ്‌ജയെ കുറിച്ച് കൂടുതലറിയാവുന്നവർ അതിവിടെ പങ്കുവെച്ചാൽ ഉപകാരമായിരുന്നു. ബോട്ടാണിക്കൽ പേരിന്റെ കാര്യത്തിൽ കൺ‌ഫ്യൂഷനായതിനാൽ കൂടുതലന്വേഷിച്ചിട്ട് ചേർക്കാമെന്നു വിചാരിക്കുന്നു.

കാട്ടുതൃത്താവ്

2010-08-20T09:48:00.005+05:30

കാട്ടുതൃത്താവിനെ കുറിച്ച് അധികം വിവരങ്ങൾ മലയാളത്തിൽ കാണുന്നില്ല. ആകെയുള്ളത് ഈ വിക്കി പേജാണ്. ഇതിന്റെ പടങ്ങൾ തപ്പി വരുന്നവർക്ക് ഈ പോസ്റ്റ് ഉപകരപ്പെടുമെന്നു പ്രതീക്ഷിച്ചു കൊണ്ട് ഇടുന്നു.

Common Name - Hoary Basil
Botanical Name - Ocimum americanum or Ocimum canum
Malayalam - കാട്ടുതൃത്താവ്, kaattu thrithaavu, kattu thrithaavu

കാട്ടുതൃത്താവിന്റെ കതിര്

ഒരു ബ്ലോഗ് കൂടി

2009-11-13T22:44:00.003+05:30

ചിത്രങ്ങൾക്കായി മാത്രം ഒരു ബ്ലോഗ് കൂടി തുടങ്ങിക്കളയാമെന്നു തീരുമാനിച്ചു. ഈ ബ്ലോഗിൽ ചിത്രങ്ങൾക്ക് കൂടുതൽ പ്രാധാന്യം കിട്ടുന്ന ടെബ്ലേറ്റാക്കിയാൽ ആകെ കുളമാകും. അതാണ് കാരണം. ചുമ്മായെടുക്കുന്ന ചിത്രങ്ങളൊക്കെ കൊണ്ടുപോയി തട്ടാനൊരിടം അതാണ് ചിത്രക്കളരി. വല്യപ്രതീക്ഷയൊന്നും വേണ്ടാ.

ഈ പേരിൽ മറ്റേതെങ്കിലും ബ്ലോഗ് നിലവിലുണ്ടെങ്കിൽ ദയവായി അറിയിക്കണേ.

അപ്പോ ശരി
വീണ്ടും പാർക്കലാം.

കോൺ‌ട്രാസ്റ്റ്

2009-11-02T21:45:00.007+05:30

വീണ്ടും ചിത്രസൽഭം!

2009-05-14T18:10:00.002+05:30

സഞ്ജീവയ്യാ പാർക്കിൽ ബട്ടർഫ്ല സ്റ്റഡിക്ക് പോയ വിശേഷങ്ങൾ കഴിഞ്ഞ പോസ്റ്റിൽ എഴുതിയിരുന്നല്ലോ. അന്ന് കിട്ടിയ ഒരു ചിത്രശലഭത്തിന്റെ ഫോട്ടോ കണ്ട് ഫ്ലിക്കറിൽ കൂടെ പരിചയപ്പെട്ട ഒരു കൂട്ടുകാരിക്ക് അവിടെ പോവാൻ ഒരു ആഗ്രഹം. അങ്ങനെ മെയ് ഒന്നിന് വെളുപ്പിനെ 6 മണിക്ക് അവിടെ രണ്ടാളും ഹാജരായി. അവിടെ നിന്നും കിട്ടിയ ചില ശലഭങ്ങൾ ഇതാ...

Common Crow butterfly

Striped Tiger (Danaus genutia)

അവിടെ നേഴ്സറിയിൽ ചിത്രശലഭങ്ങളെ ആകർഷിക്കാനായി പ്രത്യേകം ചെടികൾ നട്ടു വളർത്തിയിട്ടുണ്ട്. അതിലാണ് താഴത്തെ ചിത്രത്തിലെ ശലഭം ഇരിക്കുന്നത്. Heliotropium indicum എന്നാണ് ചെടിയുടെ പേര്. നാട്ടിൽ കാട്ടുപറമ്പിൽ ഈ ചെടി കണ്ടിട്ടുണ്ടോന്ന് സംശയമുണ്ട്. മലയാളത്തിൽ തീകട എന്നാണ് പേര് കണ്ടത്. ഇതിൽ ചുറ്റിപ്പറ്റി അവിടെ നേഴ്സറിയിൽ ധാരാളം ശലഭങ്ങൾ ഉണ്ടായിരുന്നു.

Danaid eggfly male

അപ്പോൾ വീണ്ടും പാർക്കലാം. തൽക്കാലത്തേക്ക് വിട!

ബട്ടർഫ്ലൈ സ്റ്റഡി

2009-04-28T17:03:00.004+05:30

കഴിഞ്ഞ ഞായറാഴ്ച ഹൈദ്രാബാദിലെ ബട്ടർഫ്ലൈ കൺസർവേഷൻ സൊസൈറ്റിയുടെ ആഭിമുഖ്യത്തിൽ സഞ്ജീവയ്യാ പാർക്കിൽ നടന്ന ബട്ടർഫ്ലൈ സ്റ്റഡിയിൽ പങ്കെടുക്കാൻ എനിക്ക് അവസരം കിട്ടിയിരുന്നു. മൊത്തത്തിൽ 30 പേരോളം സംഘത്തിലുണ്ടായിരുന്നു. സംഘാംഗങ്ങളെല്ലാം കൂടി ചിത്രശലഭങ്ങളെ കണ്ടു പഠിക്കാൻ പാർക്കിന്റെ ഒരറ്റത്തൂന്ന് യാത്ര തുടങ്ങി. ഞാൻ ആദ്യമായായിരുന്നു ഈ പാർക്കിൽ വരുന്നത്. ഇത്തിരി നടന്നപ്പോ ഒരു ഗുൽ‌മോഹറിനടുത്തായി നമ്മുടെ കണിക്കൊന്ന അങ്ങനെ പൂത്തുലഞ്ഞു നിൽക്കുന്നു. വിഷുവിനു മുന്നേയായി ഒസ്‌മാനിയ യൂണിവേഴ്‌സിറ്റിയുടെ ക്യാപസിൽ ഒരു കണിക്കൊന്ന മരം പൂത്തു നിൽക്കുന്നത് കണ്ടിരുന്നു. പടം എടുക്കാനായി അടുത്ത ദിവസം ക്യാമറയും താങ്ങി അവിടെ ചെന്നപ്പോ ബാറ്ററി കാലി. അതു കൊണ്ട് ഈ അവസരം വിട്ടുകളയരുതെന്നു കരുതി ആദ്യം തന്നെ കണിക്കൊന്ന ചിത്രം പെട്ടിയിലാക്കി.

ആ സമയം കൊണ്ട് സംഘത്തിലെ എല്ലാവരും വളരെ മുന്നേയായി പോയി. അവരുടെ പുറകേ വെച്ചു പിടിക്കുന്നതിനിടയിലാണ് ഇദ്ദേഹമിങ്ങനെ ആരുടെയും ശ്രദ്ധയിൽ പെടാതെ കാറ്റും കൊണ്ടിരിക്കുന്നത് കണ്ടത്.
അടുത്തു ചെന്നിട്ടും യാതൊരു കൂസലുമില്ല.

നല്ല കാറ്റ് അതിരിക്കുന്നിടത്തേക്ക് ഹുസൈൻ‌സാഗർ തടാകത്തിൽ നിന്നും വീശുന്നതു കാരണം ആൾക്ക് ചിറക് തുറക്കാൻ വല്ലാത്ത മടിയായിരുന്നു. കാറ്റിത്തിരി കുറയുമ്പോ ലേശമൊന്നു തുറക്കും. വീണ്ടും അടച്ചിരിപ്പാവും.

എന്റെ കൂടെ ഹിന്ദുപത്രത്തിലെ നഗരഗോപാൽ (അതോ നാഗരഗോപാൽ എന്നായിരുന്നോ ആവോ? എന്തായാലും ഗോപാലുണ്ടെന്ന് ഉറപ്പാണ്. എന്തരേലുമാവട്ടല്ലേ) എന്ന ഫോട്ടോഗ്രാഫറുമുണ്ടായിരുന്നു.കുറച്ചു കഴിഞ്ഞിട്ടും ശലഭത്തിന് അനക്കമില്ലാതായപ്പോ രണ്ടാൾക്കും സംശയമായി.ഇനി ഇതിനു സുഖമില്ലേ എന്നൊക്കെ ഞങ്ങൾ ചർച്ച ചെയ്‌തോണ്ടിരിക്കുന്നതിനിടെ പെട്ടെന്ന് എവിടുന്നോ മറ്റൊരു ചിത്രശലഭം വന്നതും ഇത് അതിന്റെ പുറകെ ചുറ്റിചുറ്റി ഒറ്റ പറക്കൽ!

ഇതിന്റെ പേര് പ്ലെയിൻ ടൈഗർ. ആഫ്രിക്കൻ മനാർക്ക് എന്നും ഇവനു പേരുണ്ട്.
Scientific Name - Danaus chrysippus. വിക്കിയിൽ കൂടുതൽ വിവരങ്ങൾ വായിക്കാം.
മലയാളം പേര് അറിയില്ല.

ചിത്രശലഭത്തിന്റെ പടമൊക്കെ പിടിച്ചു നിവർന്നപ്പോ സംഘാംഗങ്ങളുടെയും കൂടെ വന്ന ഭർത്താവിന്റെയും പൊടിപോലുമില്ല കണ്ടുപിടിക്കാൻ. പിന്നെ സ്വന്തമായി തന്നെ സ്റ്റഡി നടത്തി കളയാമെന്നു കരുതി നടപ്പു തുടർന്നു. ചെറിയതരം പരുന്താണെന്നാണ് ഈ പക്ഷിയെ കണ്ടപ്പോൾ ആദ്യം ഞാൻ കരുതിയത്. പക്ഷേ കൊക്കു പരുന്തിന്റെ പോലെയല്ല.
ഈ പക്ഷിയുടെ പേരെന്താന്ന് ആർക്കെങ്കിലും അറിയാമെങ്കിൽ ദയവു ചെയ്‌തു പറഞ്ഞു തന്നാൽ ഉപകാരമായേനേ.

Update (29/04/09) :- ഇത് Common Hawk-Cuckoo(Hierococcyx varius
) Brain Fever Bird എന്ന പേരിലും ഇത് അറിയപ്പെടുന്നു.
കൂടുതൽ വിവരങ്ങൾ വിക്കിയിൽ.

പക്ഷിയുടെ പുറകെ നടന്നു കൊണ്ടിരിക്കുന്നതിനിടെ പാർക്കിൽ നാഗലിംഗമരം കണ്ടൂന്നും പറഞ്ഞ് സതീശേട്ടൻ(ആരോ എന്നെ മുൻപത്തെ ഒരു പോസ്റ്റിൽ സതീഷ് എന്നു എഴുതിയതിനു ഗുണദോഷിച്ചിരുന്നു. അദ്ദേഹത്തിന്റെ പ്രത്യേകശ്രദ്ധയ്‌ക്ക് “ഏട്ടൻ’ ചേർത്തിട്ടുണ്ടേയ്) വിളിച്ചു. പിന്നെ അതും തപ്പി നടപ്പായി. അവസാനം അതും കണ്ടുപിടിച്ചു. അങ്ങനെ വരിവരിയായി നിൽക്കയല്ലേ ചുള്ളന്മാർ/ത്തികൾ!

ഹൈദ്രാബാദ് നഗരഹൃദയത്തിൽ ഇവരിങ്ങനെ നിരനിരയായി നിന്നിട്ട് അതറിയാതെ നമ്മൾ മഹാനന്ദി വരെ പ്രെട്രോളും കത്തിച്ചുപോയി അപൂർവ്വസുന്ദരപുസ്പം എന്നൊക്കെ പറഞ്ഞ് പണ്ട് പോസ്റ്റിട്ടത്.

ഒരു മരത്തിനു മാത്രം മറ്റെല്ലാത്തിൽ നിന്നും ഒരു പ്രത്യേകത കണ്ടു. മറ്റെല്ലാം കരിം‌പച്ചനിറത്തിൽ വലിയ ഇലകളുമായ് നിൽക്കുന്നു. അതിനിടയിൽ ഒരെണ്ണത്തിൽ മാത്രം ഇലകൾ ഇളം‌പച്ചയിലും നീളത്തിലും നിൽക്കുന്നു. ഇനി ഇലകൊഴിഞ്ഞ് പുതിയത് വന്നതാണോന്ന് അറിയില്ല അങ്ങനെ. താഴത്തെ ഫോട്ടോയിൽ ഇടതു വശത്ത്.

പൂവ് ഇതാ

ബട്ടർഫ്ലൈ സ്റ്റഡിക്കാരൊക്കെ സ്റ്റഡിയും നടത്തി വീട്ടിൽ പോവാറായെന്നു ഫോണിലൂടെയറിഞ്ഞതു കൊണ്ടും ഒറ്റയ്‌ക്കായതിന്റെ വെപ്രാളം കൊണ്ടു അധികം സമയം കളയാതെ തിരികെ തുടങ്ങിയ സ്ഥലത്തേക്ക് തിരികെയെത്തി വീട്ടിൽ പോന്നു. കായുള്ള മരവും അവിടെയുണ്ടായിരുന്നൂന്ന് വീട്ടിലെത്തി കഴിഞ്ഞാണ് അറിഞ്ഞത്. അടുത്ത പ്രാവശ്യമാവട്ടെ അതു പെട്ടിയിലാക്കണം.

സ്റ്റഡിക്കാരുടെ കൂടെ ഫോട്ടോയെടുക്കാൻ പോയവരിൽ രണ്ടാൾക്കൊഴികെ ആർക്കും ഒരു ബട്ടർഫ്ലൈ ഫോട്ടോ പോലും കിട്ടിയില്ലെന്നുള്ളതാണ് ഏറ്റവും രസം (ഇപ്പോ ശലഭങ്ങളുടെ സീസണുമല്ല അതു കൂടാതെ ഒത്തിരി പേർ സംഘത്തിലുണ്ടായിരുന്നതിനാൽ അവരുടെ ഒച്ചയും ബഹളത്തിലും ശലഭങ്ങൾ ജീവനും കൊണ്ടോടി എന്നാണ് എനിക്ക് പിന്നീട് കിട്ടിയ റിപ്പോർട്ട്). ഇനി മുതൽ ഫോട്ടൊയെടുക്കാമെന്നു പ്രതീക്ഷിച്ച് ഒരു സ്റ്റഡിഗ്രൂപ്പുകാരുടെയും കൂടെ പോവരുതെന്ന് എനിക്ക് മനസ്സിലായി. ചിത്രശലഭങ്ങളെ കുറിച്ച് കൂടുതൽ വിവരങ്ങൾ അറിയാനാണെങ്കിൽ ഇത്തരം യാത്രകൾ നന്ന്.

ഹല ഹലോ മൈക്ക് ടെസ്റ്റിംഗ്...

2009-03-09T12:11:00.006+05:30

എന്റെ പുതിയ ക്യാമറ കൊണ്ടൊരു ടെസ്റ്റ് ഷോട്ട്.

അപ്‌ഡേറ്റ് (മാർച്ച് 10) - ക്യാമറ - Canon EOS Digital Rebel XTi/EOS 400D.

ലെൻസ് തൽക്കാലം ഒന്നേയുള്ളൂ.
Sigma DG 28-300mm 1:3.5-6.3 Macro

ഈ പടം അത്ര മെച്ചമല്ല എന്നു മനസ്സിലായി.
ക്യാമറയിലും ലെൻസിലും എവിടൊക്കെ തിരിക്കണം എവിടൊക്കെ ഞെക്കണം എന്നൊക്കെ പഠിച്ചു വരണതേയുള്ളൂ. ആക്രാന്തം മൂത്ത് ആദ്യമെടുത്തത് എടുത്ത് ബ്ലോഗിലിട്ടെന്നേയുള്ളൂ.

മെച്ചപ്പെടുമായിരിക്കും അല്ലേ. ഹാ ശ്രമിച്ചു നോക്കട്ടേ.

ഇടത്താവളം

2009-03-07T09:59:00.003+05:30

Life is a journey, not a destination.

പഴുത്ത മുളക് അച്ചാർ

2009-02-04T08:54:00.002+05:30

ജനുവരി ഫെബ്രുവരി മാസങ്ങളിൽ മാത്രം ഇവിടെ മാർക്കറ്റിൽ കാണാറുള്ള ചുവന്നമുളകാണിത്. ഓരോ വർഷവും കാണാറുണ്ടായിരുന്നെങ്കിലും ഇത് എന്തിനാ ഉപയോഗിക്കുന്നതെന്ന് കഴിഞ്ഞ വർഷമാണ് പഠിച്ചത്. മുളകുബജിക്ക് ഉപയോഗിക്കുന്ന മുളകിലും നീളമുണ്ടിതിന് അതോ അതേ വെറൈറ്റി തന്നയോ ഇതെന്നറിയില്ല. എന്തായാലും എരിവു കുറവും മാംസം കൂടുതലുമുള്ള തരമാണ്. കഴിഞ്ഞവർഷം പരീക്ഷണാർത്ഥം ഉണ്ടാക്കി നോക്കി. വിചാരിച്ചതിലും വേഗത്തിൽ കുപ്പി കാലിയായി. അടുത്ത ബാച്ച് ഉണ്ടാക്കി ഫോട്ടോസ് എടുത്ത് ബ്ലോഗിലും ഇടാമെന്നു കരുതി പക്ഷേ അപ്പഴേക്കും മുളകിന്റെ സീസൺ കഴിഞ്ഞുപോയിരുന്നു. അതിനാൽ ഒരു വർഷം കാത്തിരിക്കേണ്ടി വന്നു ഈ പോസ്റ്റ് തയ്യാറാക്കാൻ.

വളരെ കുറച്ച് സാധനങ്ങൾ കൊണ്ട് വളരെ എളുപ്പത്തിൽ തയ്യാറാക്കാവുന്ന അച്ചാറാണിത്. തെലുങ്കിൽ ഇതിനു “പണ്ടു മിരുപ്പക്കായ് പച്ചടി”യെന്നു പറയും.
ഇതിന് ആവശ്യമുള്ള സാധനങ്ങൾ

ചുവന്നമുളക് - 1 കിലോ
ഉപ്പ് - 1/4 കിലോ (പൊടിയുപ്പോ കല്ലുപ്പോ ഉപയോഗിക്കാം).
വാളൻ‌പുളി - 1/4 മുതൽ 1/2 കിലോ വരെ (എരിവു തീരെകുറവും പുളി കൂടുതലും വേണ്ടവർ 1/2 കിലോ ഉപയോഗിക്കാം. അല്ലെങ്കിൽ ആദ്യമുണ്ടാക്കുമ്പോൾ 1/4 കിലോ പുളിയിൽ ഉണ്ടാക്കി നോക്കിയിട്ട് പോരായെന്നു തോന്നുകയാണെങ്കിൽ കൂടുതൽ ചേർക്കാം). ഇവിടെ ഞങ്ങൾക്ക് കിട്ടുന്ന വാളൻപുളി നാട്ടിൽ കിട്ടുന്നതുമായി കുറച്ചു വ്യത്യാസമുണ്ട്.

മുളക് ഞെട്ടു കളയാതെ തന്നെ വെള്ളത്തിൽ നന്നായി കഴുകിയെടുക്കുക. അതിനു ശേഷം നന്നായി തുടച്ച് ഞെട്ടും കളഞ്ഞ് ഫാനിന്റെ കീഴിൽ 1-2 മണിക്കൂർ ഉണക്കിയെടുക്കുക.

മുളകും കല്ലുപ്പും കൂടി മിക്സിയിൽ ചതച്ചെടുക്കുക. നല്ലതു പോലെ അരച്ചെടുക്കേണ്ട ആവശ്യമില്ല.

എന്നിട്ട് ഒരു കുപ്പിയിലോ ഭരണിയിലോ മുളകും വാളൻപുളിയും ഇടവിട്ട് ഇടവിട്ട് നിറച്ചു കാറ്റു കയറാത്തവിധത്തിൽ അടച്ചു സൂക്ഷിക്കുക.ഇത് മാസങ്ങളോളം കേടുകൂടാതിരിക്കും. 4-5 ദിവസമാകുമ്പോൾ അതിൽ നിന്ന് ഒരാഴ്‌ചത്തേക്ക് ഉപയോഗിക്കാൻ വേണ്ട അളവിൽ മുളകെടുത്ത് മിക്സിയിൽ തരുതരുപ്പായി അരച്ചെടുക്കുക. ഇനിയിതിൽ കടുകു വറുത്തൊഴിക്കണം.

തെലുങ്കരുടെ രീതിയിൽ കടുകുവറുത്തൊഴിച്ചാൽ അതിനു പ്രത്യേകരുചി തന്നെയാണ്. അതിനാവശ്യമുള്ള സംഗതികൾ കടുക്, ജീരകം, കടലപരിപ്പ്, കറിവേപ്പില, കായം. വേണമെങ്കിൽ ഉഴുന്നുപരിപ്പും ചേർക്കാം. എല്ലാം മൂത്ത് ബൗൺ നിറമാവുമ്പോ വാങ്ങി മുളകരച്ചതിൽ ചേർത്ത് ഉപയോഗിക്കാം.എണ്ണ ലേശം കൂടുതൽ ചേർക്കേണ്ടി വരും. അച്ചാറിനു ആ‍ദ്യം ലേശം എരിവു തോന്നുമെങ്കിലും ഇരിക്കും തോറും എരിവു കുറഞ്ഞു വരും.

ഇനിയിപ്പോ കേരളാസ്റ്റൈലിൽ കപ്പയുടെ കൂടെ കൂട്ടാനാണെങ്കിൽ മുളകിൽ കടുകുവറുക്കാതെ, ഉള്ളിചതച്ചതും വെളിച്ചെണ്ണയും ചേർത്തിളക്കി പരീക്ഷിച്ചു നോക്കാം.

ഫ്രിഡ്ജിൽ വെച്ച മുളകുപയോഗിച്ച് അച്ചാറിട്ടാൽ കേടായി പോവാൻ സാധ്യതയുണ്ട്. അതിനാൽ വാങ്ങികൊണ്ടു വന്നു എത്രയും പെട്ടെന്നു ഉണ്ടാക്കിയാൽ അത്രയും നന്ന്.

സമർപ്പണം:- ഇതു പറഞ്ഞുതന്ന പാചകരത്നം സുധാഭാഭിക്ക്.

പ്രത്യേക‌അറിയിപ്പ്:- ഞാനുപയോഗിച്ച മുളകല്ലാതെ ഏരിവു കൂടിയ വല്ല മുളകും കൊണ്ടുണ്ടാക്കി കഴിച്ച് ബാത്ത്‌റൂമിൽ തപസ്സിരിക്കേണ്ടി വന്നാൽ അതിനു ഞാൻ ഉത്തരവാദിയായിരിക്കുന്നതല്ല.

ചക്കരകാപ്പി അഥവാ കരുപ്പെട്ടികാപ്പി

2008-09-03T10:53:00.005+05:30

ചായ, കോഫി ഒക്കെ നിർത്തീട്ട് കുറച്ചു കാലമായി. എന്നാലിനി ചക്കരകാപ്പി അഥവാ കരുപ്പെട്ടികാപ്പിയിലേക്ക് ഒരു തിരിച്ചുപോക്ക് നടത്താമെന്ന് കരുതി. അങ്ങനെ അന്വേഷണം ആദ്യം ഇവിടടുത്തെ കേരളാ സ്റ്റോറിൽ തുടങ്ങി. ചക്കരയുണ്ടോന്ന് ചോദിച്ചപ്പോ അയ്യോ, ഇപ്പോ തീർന്നു പോയല്ലോ അടുത്താഴ്ച കാണുമെന്നായിരുന്നു മറുപടി. എന്തായാലും അടുത്തയാഴ്ച സംഗതി കിട്ടുമെല്ലോന്ന് ആശ്വസിച്ചു തുടങ്ങിയപ്പോഴാണ് അവരുദ്ദേശിക്കുന്ന ചക്കരയും ഞാൻ പറയുന്ന ചക്കരയും രണ്ടും രണ്ടല്ലേന്ന് ഒരു സംശയം. ഞാനുദ്ദേശിച്ചത് കരുപ്പെട്ടി എന്ന ചക്കരയാണെന്നു പറഞ്ഞപ്പോഴാണ് സംഗതി ക്ലിയറായത്.(ഞങ്ങളുടെ നാട്ടിൽ പൊതുവേ പായസം ഉണ്ടാക്കാൻ എടുക്കുന്നത് ‘ശർക്കരയും’ കാപ്പിയുണ്ടാക്കാനെടുക്കുന്നതിനെ ‘ചക്കര’യെന്നുമാണ് പറയുന്നത്.)അങ്ങനൊരു സാധനം അവരുടെ കടയിൽ കൊണ്ടുവരാറേയില്ലെന്നു കേട്ടപ്പോ ആ പ്രതീക്ഷ തകർന്നു. പിന്നെ ഇപ്രാവശ്യം നാട്ടിൽ പോയപ്പോ ചക്കര കുറെ കെട്ടി പൊതിഞ്ഞിങ്ങ് കൊണ്ടു പോന്നു. ഫ്രിഡ്ജിൽ സൂക്ഷിച്ചാൽ ഒരു വർഷം വരെ കേടു കൂടാണ്ടിരിക്കുമെന്നു കടക്കാരൻ പറഞ്ഞു തന്നു.

ചക്കരക്കാപ്പി പലവിധത്തിൽ ഉണ്ടാക്കി കണ്ടിട്ടുണ്ട്. ചുക്കും കുരുമുളകും ചേർത്ത ചുക്കുകാപ്പി. പക്ഷേ ചുക്കുകാപ്പിയും ഞാനും തമ്മിൽ പണ്ടു മുതലേ ലേശം വിരോധത്തിലാ. കാരണം മറ്റൊന്നുമല്ല നല്ല എരിവും ചൂടും കൂടി ഒന്നിച്ചു ചെന്നാൽ അപ്പോ തുടങ്ങും എനിക്ക് എക്കിൾ. ചക്കരകാപ്പിയിൽ തേയിലയിട്ട് അല്ലെങ്കിൽ കാപ്പിപ്പൊടിയിട്ട് തിളപ്പിച്ച് കാപ്പിയുണ്ടാക്കാറുണ്ട്. ചുക്കും എലയ്ക്കയും മാത്രം ചേർത്തുണ്ടാക്കാറുമുണ്ട്. എന്നാൽ ഇതിൽ എനിക്കേറ്റവും രുചികരവും ഗുണമുള്ളതുമായി തോന്നിയിട്ടുള്ള ഒരു പൊടിയാണ് മല്ലി-കാപ്പിപ്പൊടി.പ്രകൃതിജീവനാചാര്യൻ ശ്രീ.സി.ആർ.ആർ.വർമ്മയുടെതാണ് ഈ പാചകക്കുറിപ്പ്.

മല്ലി-കാപ്പിപ്പൊടി

1. മല്ലി - 100 ഗ്രാം.
2. ഉലുവ - 20 ഗ്രാം.
3. നല്ല ജീരകം - 20 ഗ്രാം.
4. ചുക്ക് - 10 ഗ്രാം.
5. ഏലയ്ക്ക - 10 ഗ്രാം.

ഇത്രയുമാണ് ആവശ്യമുള്ള സാധനങ്ങൾ. മല്ലിയും ഉലുവയും നല്ലജീരകവും വെവേറെ എണ്ണയൊന്നുമില്ലാതെ വറുത്തെടുക്കുക. ചുക്ക് കല്ലിൽ വച്ച് നന്നായി ചതച്ചാൽ പിന്നീട് മിക്സിയിൽ പൊടിക്കാൻ എളുപ്പമാവും. എലയ്ക്കാ പച്ചയ്ക്ക് തന്നെ ഇട്ടാൽ മതിയാകും.

ഇനി എല്ലാം കൂടി മിക്സിയിൽ ഇട്ട് പൊടിച്ചെടുക്കണം. ഒട്ടും തരിയൊന്നുമില്ലാതെ പൊടിയണമെന്നൊന്നുമില്ല.

കാപ്പി ഉണ്ടാക്കുന്ന വിധം

ചക്കര ആവശ്യത്തിന് വെള്ളമൊഴിച്ച് തിളപ്പിക്കുക. ചക്കര നന്നായി അലിഞ്ഞു കഴിയുമ്പോൾ ഒരു ഗ്ലാസ് വെള്ളത്തിന് 3 ഗ്രാം എന്ന രീതിയിൽ മല്ലി-കാപ്പിപ്പൊടി ചേർക്കാം.(ഒന്നു രണ്ടു പ്രാവശ്യം ഉണ്ടാക്കി കഴിയുമ്പോ നിങ്ങളുടെ രുചിക്കനുസരണമായി കാപ്പിപ്പൊടിയുടെ അളവ് കൂട്ടുകയും കുറയ്ക്കുകയും ചെയ്യാം.) അത് ഒരു മിനിറ്റ് തിളച്ചു കഴിയുമ്പോൾ തീ കെടുത്തി പാത്രം ലേശം ചരിച്ചു വെച്ചാൽ 1-2 മിനിറ്റിനുള്ളിൽ മട്ട് മുഴുവൻ അടിയിൽ ഒരു വശത്ത് അടിയും. അതിനു ശേഷം കാപ്പി അരിപ്പയിൽ അരിച്ച് ഉപയോഗിക്കാം.

കരുപ്പെട്ടി തന്നെ ചേർക്കണമെന്ന് ഒരു നിർബന്ധവുമില്ല. കരുപ്പെട്ടി കിട്ടാൻ പ്രയാസമാണങ്കിൽ ശർക്കരയുപയോഗിച്ചും ഇത് തയ്യാറാക്കാം. ഈ കാപ്പിയിൽ ലേശം പാലൊഴിച്ചാൽ ചായയുടെ നിറത്തിലാവും. രുചിയും ലേശം വ്യത്യാസപ്പെടും. അതും എനിക്ക് വളരെ ഇഷ്ടമാണ്.

ഇനി ഒട്ടും ഇടിച്ചു പൊടിച്ചും മെനക്കെടാൻ താല്പര്യമില്ലാത്തവർക്കായി മറ്റൊരു സാധനം.

ശുദ്ധീകരിച്ച പനം കരുപ്പെട്ടി.

ചുക്ക്, എലയ്ക്ക, കുരുമുളക്, ജീരകം ഒക്കെ ചേർത്തുണ്ടാക്കുന്ന കരുപ്പെട്ടിയാണ്. ഒന്നുകിൽ ചുമ്മാ തിന്നാം. കാപ്പിയാക്കണമെങ്കിൽ ചുമ്മാ വെള്ളം ചേർത്തു തിളപ്പിച്ചാൽ മതി. ഒന്നും കൂടെ ചേർക്കേണ്ട കാര്യമില്ല.

അപ്പോൾ എല്ലാവർക്കും വിനായകചതുർത്ഥിയുടെയും ഓണത്തിന്റെയും റംസാനാശംസകൾ!

ചിയേഴ്സ്!

ഈ പോസ്റ്റ് മല്ലി-കാപ്പിപ്പൊടിയെ കുറിച്ച് കൂടുതൽ പറഞ്ഞു തന്ന ശ്രീ. നാണുകുട്ടൻ‌നായർക്കും, ശ്രീമതി. സരസ്വതിയമ്മയ്ക്കും ചക്കരകാപ്പി കുടിക്കാൻ എന്നെ ശീലിപ്പിച്ച എന്റെ അച്ഛനുമമ്മയ്ക്കുമായി സമർപ്പിക്കുന്നു.

പെട്ടീ...പെട്ടീ...

2008-07-15T11:52:00.002+05:30

ശിങ്കാരപ്പെട്ടീ...
പെട്ടി തുറന്നപ്പോ...

കപ്പലണ്ടി കിട്ടി!

ദശപുഷ്പം

2008-07-08T18:10:00.010+05:30

നമ്മുടെ നാട്ടിൽ കളയായി വളരുന്ന എന്നാൽ വളരെയധികം ഔഷധമൂല്യമുള്ള പത്തു ചെടികളാണ് ദശപുഷ്പത്തിൽ പെടുന്നത്. കർക്കിടകക്കഞ്ഞിയിൽ ചേർക്കാനും ഇത് ഉപയോഗിക്കാറുണ്ട്. ധനുമാസത്തിലെ തിരുവാതിരയ്ക്കും ദശപുഷ്പം ചൂടുന്ന ചടങ്ങുണ്ട്. രക്തസംബദ്ധമാ‍യ ഹീമോഫീലിയ എന്ന അസുഖം ദശപുഷ്പം കഴിച്ചു നിശേഷം മാറിയൊരാള്‍ ഞങ്ങളുടെ നാട്ടിലുണ്ട്. ദശപുഷ്പത്തിൽ പെടുന്ന ചെടികളെ അറിയാതവർക്കായി ഇവിടെ ഓരോന്നായി പരിചയപ്പെടുത്താമെന്ന് കരുതി. സര്‍ക്കാര്‍ സ്ക്കൂളുകളില്‍ ഡി.പി.ഇ.പി പാഠ്യപദ്ധതിയില്‍ പഠിക്കുന്ന 3-ം ക്ലാസിലെ കുഞ്ഞുങ്ങള്‍ക്ക് പഠിക്കാനുണ്ടിത്. അതു കാരണം അവിടെ പഠിക്കുന്ന കുട്ടികളുടെ അച്ഛനമ്മമാര്‍ക്ക് ഈ ചെടികള്‍ അറിയില്ലെങ്കില്‍ പോലും കുഞ്ഞുങ്ങള്‍ക്ക് ഇതെല്ലാം വളരെ പരിചിതമാണ്. കഴിയുമെങ്കില്‍ നിങ്ങളുടെ വീട്ടിലെ കുഞ്ഞുങ്ങളെ ഇത്തരം ചെടികള്‍ പറഞ്ഞു പരിചയപ്പെടുത്തി കൊടുക്കാന്‍ ശ്രമിച്ചാല്‍ വളരെ നന്നായിരിക്കും.

ചിത്രങ്ങളിൽ ക്ലിക്ക് ചെയ്താൽ ഓരോ ചെടിയുടെയും കൂടുതൽ ചിത്രങ്ങളുള്ള പോസ്റ്റുകളിൽ പോവാം.നിങ്ങളുടെ നാട്ടില്‍ ഏതെങ്കിലും ചെടി വേറെ പേരില്‍ അറിയപ്പെടുന്നുണ്ടെങ്കില്‍ അതു കൂടി പറഞ്ഞു തന്നാല്‍ ഉപകാരമായിരിക്കും.

1. പൂവാങ്കുറുന്തൽ / പൂവാം‌കുരുന്നില - Vernonia cinerea

പൂവാംകുരുന്നിലയും കറിവേപ്പിലയും ചേർത്തരച്ചു കഴിച്ചാൽ ചുമ മാറാൻ നല്ലതാണ്.

പൂവാംകുരുന്നിലയുടെ പൂവ്

2.മുയൽചെവിയൻ. - Emilia sonchifolia

പലർക്കും മുയൽചെവിയനും പൂവാംകുരുന്നിലയും തമ്മിൽ തെറ്റി പോവാറുണ്ട്. ഇലകൾ ശ്രദ്ധിച്ചാൽ അതൊഴിവാക്കാം. രണ്ടിനും എകദേശം ഒരേ നിറത്തിലെ പൂക്കളാണെങ്കിൽ കൂടി മുയൽചെവിയന്റെ ഇലകൾ പൊതുവെ നിലത്തോട് പറ്റി ചേർന്നാണ് നിക്കാറ്. കൂടാതെ ഇലയ്ക്ക് മുയലിന്റെ ചെവിയോടു സാമ്യമുള്ളതു കൊണ്ടാണ് ഈ പേരു തന്നെ വരുവാൻ കാരണം.

മുയല്‍ചെവിയന്റെ പൂക്കള്‍

3.മുക്കുറ്റി. Biophytum sensitivum

മുക്കുറ്റിയെ ആർക്കും പരിചയപ്പെടുത്തേണ്ട കാര്യമുണ്ടെന്ന് തോന്നുന്നില്ല.

മുകളിലെ മുക്കുറ്റി ചിത്രത്തിന്റെ ഛായാഗ്രാഹകൻ - മോഹനം

4.കയ്യോന്നി/കയ്യുണ്യം. Eclipta alba

എണ്ണകാച്ചി തലയിൽ തേച്ചാൽ തലമുടി നന്നായി വളരുമെന്ന് കേട്ടിട്ടുണ്ട്.

5. കറുക Cynodon dactylon

ഞരമ്പുസംബദ്ധമായ രോഗങ്ങൾക്കും ഓർമ്മശക്തി വർദ്ധിപ്പിക്കാനും അമ്മമാര്‍ക്ക് മുലപ്പാല്‍ വര്‍ദ്ധിപ്പിക്കാനും ഇതിന്റെ നീര് ഉത്തമം.

6. ചെറൂള Aerva lanata

മൂത്രസം‌ബന്ധമായ രോഗങ്ങള്‍ക്ക് ചെറൂള വിശേഷപ്പെട്ടതാണ്.

7. നിലപ്പന - Curculigo orchioides

നിലപ്പനക്കിഴങ്ങ് ആയുർവേദത്തിൽ മരുന്നായി ഉപയോഗിക്കാറുണ്ട്. കിഴങ്ങ് എലിക്കും പ്രിയപ്പെട്ടതാണെന്ന് തോന്നുന്നു. നട്ടു പിടിപ്പിച്ചതു മുഴുവൻ ഉഴുതുമറിച്ച് തിന്നിട്ടു പോയി ഒരു ചെടി പോലും വീട്ടിലില്ലാത്ത അവസ്ഥയാണിപ്പോ.

ഇനിയുള്ള മൂന്നെണ്ണം തപ്പിപ്പിടിച്ചു ഫോട്ടോയെടുത്തതാണ്.

8. ഉഴിഞ്ഞ - Cardiospermum halicacabum

ഇതിൽ വെളുത്ത പൂക്കളാണുണ്ടാവുന്നത്. വള്ളിച്ചെടിയാണ്. ഇതിന്റെ വിത്തിൽ ലൗവ് സൈൻ പോലെ അടയാളവും പുറത്ത് കൂട പോലെയും ഉളളതിനാൽ ലൗവ് ഇൻ എ പഫ് എന്നും ഹാർട്ട് സീഡ് എന്നുമാണ് ഇംഗ്ലീഷിൽ അറിയപ്പെടുന്നത്.

9. വിഷ്ണുക്രാന്തി / കൃഷ്ണക്രാന്തി. - Evolvulus alsinoides

ഇത് മണ്ണിൽ പടർന്നു വളരുന്ന ചെടിയാണ്.ഔഷധസസ്യങ്ങൾ എന്ന പുസ്തകത്തിൽ പുഷ്പങ്ങൾ നീല, വെള്ള, പാടലം എന്നീ നിറങ്ങളിലുണ്ടാവുമെന്ന് പറയുന്നു. എനിക്ക് കിട്ടിയത് മഞ്ഞ നിറത്തിലെ പൂക്കളുള്ളതാ‍ണ്.

10. തിരുതാളി. - ipomoea sepiaria

ഈ ചെടി നിന്ന വീട്ടിലെ വീട്ടുകാർ പറഞ്ഞത് തിരുതാളി വേറെ തരവും ഉണ്ടെന്നാണ്. എനിക്കിതിനെ കുറിച്ച് അറിയില്ല. അറിയാവുന്നവർ പറഞ്ഞു തന്നാൽ അല്ലെങ്കിൽ ആരെങ്കിലും കുറച്ചു ഫോട്ടോകൾ(തിരുതാളി, ഉഴിഞ്ഞ, വിഷ്ണുക്രാന്തി എന്നിവയുടെ) പോസ്റ്റിയാൽ ഉപകാരമായേനേ.

Ref:

ഔഷധസസ്യങ്ങള്‍ - ഡോ. എസ്. നേശമണി.
www.aluka.org
www.davesgarden.com

ഒരു പ്രത്യേക അറിയിപ്പേ - ആരെങ്കിലും ദശപുഷ്പത്തിനെ കുറിച്ച് വിശദമായി എഴുതാൻ തയ്യാറുണ്ടെങ്കിൽ ചിത്രങ്ങൾ സപ്ലേ ചെയ്യാൻ ഞാൻ റെഡി!

update 10/08/08

ഈ പോസ്റ്റ് വായിക്കുന്നവർ കാന്താരിക്കുട്ടിയുടെ ഈ കമന്റ് കാണാതെ പോവരുതെന്നു കരുതി അതു കൂടി ഇവിടെ ചേർക്കുന്നു.

കാന്താരിക്കുട്ടി said...

ചിര പരിചിതമായ 10 ഔഷധ സസ്യങ്ങള് ആണ് ദശ പുഷ്പങ്ങള്.എന്നാല് ഇവയെ ഇന്നു തിരഞ്ഞു കണ്ടു പിടിക്കേണ്ടി ഇരിക്കുന്നു.വിശേഷാവസരങ്ങളില് ദശ പുഷ്പം ചൂടുന്ന പതിവ് നമ്മുടെ സംസ്കാരത്തിന്റെ ഭാഗം ആണ്.ഇതിനെ കുറിച്ച് എഴുതാന് തോന്നിയ ആഷക്കു എല്ലാ വിധ അഭിനന്ദനവും..ഞാന് ഒരു പോസ്റ്റ് ആക്കാന് വേണ്ടി വെച്ചിരുന്ന ഈ ഭാഗം ഇവിടെ കമന്റ് ആയി ഇടട്ടെ ഞാന്.

മുക്കുറ്റി

ജെറാനിയെസിയെ കുടുംബത്തില് പെടുന്ന ഒരു കുറ്റി ചെടി ആണ് ഇത്.മുക്കുറ്റി ചാന്ത് തിലകം തൊടുന്നതു വളരെ ശ്രേഷ്ഠ കരമാണ്.ഇല അരച്ചുമുറിവില് പുരട്ടുന്നത് മുറിവ് ഉണങ്ങുന്നതിനു ഉപകരിക്കും.ഗര്‍ഭാശയ ശുദ്ധിക്കു വേണ്ടി പ്രസവാനന്തരം മുക്കുറ്റി ഇല കുറുക്കി കഴിക്കുന്നതു നല്ലതാണ്.എല്ലാത്തരത്തിലുള്ള ശ്വാസ കോശ രോഗങ്ങള്‍ക്കും മുക്കുറ്റിയില തേനില് ചാലിച്ചു സേവിക്കുന്നതു നല്ലതാണ്.വളം കടിക്കു ഇതിന്റെ ഇല അരച്ചു പാദത്തില് പുറ്രട്ടുന്നു.മൈഗ്രെയിനില് നിന്നു ആശ്വാസം ലഭിക്കാന് മുക്കുറ്റി ചേര്‍ത്തു കാച്ചിയെടുത്ത വെളിച്ചെണ്ണ ഉപയോഗിച്ചു വരുന്നു.

ഉഴിഞ്ഞ

ഇന്ദ്രവല്ലരി എന്ന അപരനാമത്തില് അറിയപ്പെടുന്ന ഒരു വള്ളിച്ചെടിയാണ് ഉഴിഞ്ഞ.ഉഴിഞ്ഞ വള്ളി കൊണ്ട് മുടി കെട്ടി വെച്ചാല് മുടി നീളത്തില് വളരും !!!!മുടി കൊഴിച്ചിലും തടയാം.നീലിഭൃംഗാദി എണ്ണയുടെ നിറ്മ്മാണത്തില് ഒഴിച്ചു കൂടാനാവാത്ത ചേരുവ ആണിത്.വാത സംബന്ധമായ രോഗങ്ങള്‍ക്ക് വിശേഷിച്ചും സന്ധി വേദനക്ക് ആവണക്കെണ്ണയില് വേവിച്ച ഉഴിഞ്ഞ ഇല അരച്ചു പുരട്ടുന്നതു നല്ലതത്രെ !

മുയല് ചെവിയന്

ഇതിന്റെ പച്ച ഇല പരലുപ്പും ചേര്‍ത്ത് ടോണ്‍സിലൈറ്റിസ് ഉള്ള ഭാഗത്തു പുരട്ടിയാല് അസുഖം മാറും.കൃമി രോഗത്തിനും ഇതിന്റെ ഇല പിഴിഞ്ഞെടുത്തു 3 ദിവസം കഴിച്ചാല് മതിയാകും

ചെറൂള

ബലികര്‍മ്മങ്ങള്‍ക്കു ഉപയോഗിക്കുന്ന ഈ ചെടി ചൂടിയാല് ആയുസ്സ് വര്‍ദ്ധിക്കും എന്നാണ്.മൂത്രാശയ രോഗങ്ങള് ശമിപ്പിക്കുവാന് ചെറൂള സമൂലം കഷായം വെച്ചു രാവിലെയും വൈകുന്നേരവും സേവിച്ചാല് മതി. പാലിലും നെയ്യിലും ചെറൂള ഇല കാച്ചി കഴിച്ചാലും മൂത്രാശയ രോഗങ്ങള്‍ക്ക് ശമനമുണ്ടാകും

കയ്യോന്നി

കേശ ഔഷധമാണ് ഇതു.കയ്യോന്നി ചേര്‍ത്തു കാച്ചിയ എണ്ണ കണ്ണിന്റെയും തലമുടിയുടെയും ആരോഗ്യത്തിനു ഉത്തമം ആണ്.കയ്യോന്നി അരച്ചെടുത്ത നീര് എള്ളെണ്ണയില് കാ‍ാച്ചി പതിവായി തലയില് പുരട്ടിയാല് തല വേദനയും കണ്ണിന്റെ അസുഖങ്ങള്‍ഊം മുടി കൊഴിച്ചിലും ശമിക്കും

തിരുതാളി

പടര്‍ന്നു കയറുന്ന ഈ വള്ളി ചെടിയുടെ ഔഷധ യോഗ്യമായ ഭാഗം അതിന്റെ വേര് ആണ്.സ്ത്ര്രീകളിലെ വന്ധ്യതാ ചികിത്സക്കു തിരുതാളി ഉപയോഗിക്കുന്നു.കൂടാതെ ശരീരബലം വര്‍ധിപ്പിക്കുവാനും ഈ ചേറ്റി നല്ലതത്രേ !!

കറുക

പുല്‍ത്തകിടി നിര്‍മ്മിക്കാന് ആണു നമ്മള് ഇപ്പോള് ഈ ചെടിയെ ഉപയോഗിക്കുന്നതു !!!പരിപാവനത കല്‍പ്പിക്കപ്പെടുന്ന ഈ ചെടി മതപരമായ പല ആചാരങ്ങളിലും ഉപയോഗിക്കുന്നു.മുറിവില് നിന്നും രക്ത സ്രാവം തടയാനാ‍യി കറുക അരച്ചു കെട്ടാറുണ്ട്.നാഡീ ബലം വര്‍ധിപ്പിക്കുന്നതിനു കറുക നീരു രാവിലെയും വൈകുന്നേരവും കഴിക്കുന്നതു നല്ലതാണ്.മനസിക രോഗ ചികിത്സയിലും ഉപയോഗിക്കുന്നു.കറുകയെ കുറിച്ചുള്ള എന്റെ ദീപ്തമായ ഓര്‍മ്മ കുട്ടികള്‍ക്കു കൊതി വരുമ്പോള് അച്ഛാച്ഛന് വെളിച്ചെണ്ണയില് കറുക ഇലയും ഉപ്പും ചേര്‍ത്ത് “ ഓതി “ തരുമായിരുന്നു.. കൊതി മൂലം ഉള്ള ശര്‍ദ്ദി ഠപ്പേ ന്നു നില്‍ക്കുനതിനു ഞാന് സാക്ഷി.ഒരു മന്ത്രം ആണ് ഓതുന്നത്..അച്ഛാച്ഛന്റെ മരണത്തോടെ ആ മന്ത്രവും പോയി !

പൂവാം കുറുന്നില

ഇതു സമൂലം ഉപയോഗിക്കുമ്പോള് പനി പമ്പ കടക്കുമത്രെ.സ്ത്ര്രീകളില് മാനസിക പിരിമുറുക്കം ഒഴിവാക്കി സന്തോഷവും സൌന്ദര്യവും ഉണ്ടാകാന് ഇതു നല്ലതാണ്.അമിത രക്ത സ്രാവത്തിനു നല്ല മരുന്നാണ്,നേത്ര രൊഗ ചികിത്സയില് ഇതിന്റെ ഇല ഉപയോഗിക്കുന്നു

വിഷ്ണു ക്രാന്തി

നിലത്തു പടര്‍ന്നു വളരുന്ന വിഷ്ണു ക്രാന്തി യുടെ ഇലകള്‍ക്ക് ചെറിയ എലിയുടെ ആകൃതിയാണ്.പനി മാറ്റാന് അത്യുത്തമം.സമൂലം കഷായം വെച്ചു 2 നേരം സേവിച്ചാല് പനി മാറും.തലച്ചോറ് സംബന്ധമായ രോഗങ്ങള്‍ക്കു ഉത്തമം.ഓര്‍മ്മ കുറവു..ബുദ്ധി മാന്ദ്യം എന്നിവക്കു ഈ ചേറ്റി സമൂലം പിഴിഞ്ഞെടുത്ത് നെയ്യുമായി ചേര്‍ത്ത് കഴിക്കണം.ആമാശയ സംബന്ധമായ അസുഖങ്ങള്‍ക്കും അമിത രക്ത സ്രാവത്തിനും ഇതു ഉപയോഗിക്കുന്നു.

നിലപ്പന

ഇതിന്റെ കിഴങ്ങ് ആണ് മരുന്നായി ഉപയോഗികുന്നത്.

Jul 9, 2008 8:48:00 PM

പൂവാംകുരുന്നില/ പൂവാം‌കുറുന്തൽ

2008-07-07T09:26:00.012+05:30

ദശപുഷ്പങ്ങളില്‍ പെട്ട ചെടികളിലൊന്ന്.

Vernonia cinerea

Family: COMPOSITAE
Genus: Vernonia
Species: Cinerea

Common Name - Little ironweed,Ash coloured Fleabane

Sanskrit - Sahadevi, Uthamakanyapathram.

Hindi - dandolpa, sahadevi, sodhari.

Tamil - puvamkurunthal, sahadevi.

Malayalam - പൂവാംകുരുന്നൽ(puvamkurunthal), പൂവാംകുരുന്നില(puvamkurunnila).

if you have any suggestions about this post please write it here

മുക്കുറ്റി

2008-07-07T09:16:00.009+05:30

ദശപുഷ്പങ്ങളില്‍ പെട്ട ചെടികളിലൊന്ന്.

Biophytum sensitivum (L.) DC

Family: Oxalidaceae.

Common name:Sikerpud.

Sanskrit - alambusha, jalapushpa, peethapushpa, samanga, krithanjali.

hindi - lajalu, lajalu, lajjalu, lakhshana, laksmana, zarer.

Tamil - nilaccurunki, tintanali

Malayalam - മുക്കുറ്റി (mukkutti)

ഈ പോസ്റ്റു കണ്ടിട്ട് ബ്ലോഗർ മോഹനം അയച്ചു തന്ന മുക്കുറ്റി ചിത്രങ്ങളാണ് താഴെ. മോഹനത്തിനു വളരെ വളരെ നന്ദി.

if you have any suggestions about this post please write it here

കയ്യോന്നി/കയ്യുണ്യം

2008-07-07T09:06:00.010+05:30

ദശപുഷ്പങ്ങളില്‍ പെട്ട ചെടികളിലൊന്ന്.

Eclipta alba (L.) Hassk.

Family: Asteraceae
Genus: Eclipta
Species: E. alba

English Name - False daisy,

Sanskrit - kesaraja, bhringaraja, suparna, kunthalavardhini, bhringa, angaarika, kesaranjini.

Hindi - babri, bengrah, mopranth.

Tamil - kaikeppi.

Malayalam - കയ്യോന്നി (kayyonni),കയ്യുണ്യം(kayyunyam),കുഞ്ഞുണ്ണി (kunjunni),കഞ്ഞണ്ണി(kanjanni).

if you have any suggestions about this post please write it here

കറുക

2008-07-07T08:58:00.010+05:30

ദശപുഷ്പങ്ങളില്‍ പെട്ട ചെടികളിലൊന്ന്.

Cynodon dactylon (L.) Pers

english - Bermuda grass, devilgrass

hindi - durva

Sanskrit - duva, ruha, anantha, sathaparvika, bhargavi, golomi, sathaveerya.

Tamil - aruvampillu, arugampul, arukampul.

Malayalam - karuka(കറുക), belikaruka(ബലികറുക).

if you have any suggestions about this post please write it here

വിഷ്‌ണുക്രാന്തി/കൃഷ്ണക്രാന്തി

2008-07-07T08:51:00.011+05:30

ദശപുഷ്പങ്ങളില്‍ പെട്ട ചെടികളിലൊന്ന്.

Evolvulus Alsinoides Linn

English Name - Slender Dwarf Morning-Glory.

Sanskrit - harikranthijam, vishnudayitham, neelapushpi.

hindi - vishnukrantha,shankapushpi

Tamil - vishnukranthi

Malayalam - vishnukranthi(വിഷ്ണുക്രാന്തി), krishnakranthi(കൃഷ്ണക്രാന്തി).

if you have any suggestions about this post please write it here

തിരുതാളി

2008-07-07T08:41:00.012+05:30

ദശപുഷ്പങ്ങളില്‍ പെട്ട ചെടികളിലൊന്ന്.

Ipomoea Sepiaria

Family: Convolvulaceae
Genus: Ipomoea
Species: Sepiaria

Malayalam - Thiruthali (തിരുതാളി)

hindi- bankalmi

Tamil - manjigai

if you have any suggestions about this post please write it here

നിലപ്പന

2008-07-07T08:32:00.009+05:30

ദശപുഷ്പങ്ങളില്‍ പെട്ട ചെടികളിലൊന്ന്.

Curculigo orchioides Gaertn

Family - Amaryllidaceae.

hindi - siyah-musli, kali musli,musli

Sanskrit - thalamooli, thalamulika, thalapathrika, bhuthaali, hamsapadhi, varahi, deerhakandhi.

Tamil - nilapanai, kuratti

Malayalam - nilapana (നിലപ്പന).

if you have any suggestions about this post please write it here

ചെറൂള

2008-07-07T08:23:00.013+05:30

ദശപുഷ്പങ്ങളില്‍ പെട്ട ചെടികളിലൊന്ന്.

Aerva Lanata Juss

Family: Amaranthaceae
Genus: Aerva
Species: A. lanata[1]

Tamil - sirupeelai, pulay, polpala(simhala)

Hindi - konda, chaya.

Sanskrit - Astmabayda, bhadrika, bhadra,bhadram

Malayalam - cherula, cheroola(ചെറൂള), cherupula(ചെറുപൂള)

if you have any suggestions about this post please write it here

മുയൽചെവിയൻ

2008-07-04T10:13:00.013+05:30

ദശപുഷ്പങ്ങളില്‍ പെട്ട ചെടികളിലൊന്ന്.

Emilia sonchifolia

Family: Asteraceae
Genus: Emilia
Species: sonchifolia

Synonyms: Cacalia sonchifolia L.

English Names - Lilac tasselflower, flora's paintbrush, consumption weed, cupids paint, shaving brush.

Hindi - kirankuri, banasurya, kirangari.

Tamil - Muyalchevi

Malayalam - എലിചെവിയൻ[elicheviyan], എഴുതാന്നിപ്പച്ച[ezhuthannippacha], തിരുദേവി[thirudevi], നാരായണപച്ച[Narayana pacha], ഒരിച്ചെവിയൻ[Oricheviyan], മുയൽചെവിയൻ[Muyalcheviyan].

Sanskrit - sasasruthi, akhukarni, chithrapachithra, dravanthi.

മുയലിന്റെ ചെവിയോടു ഇതിന്റെ ഇലയ്ക്കുള്ള സാദൃശ്യമാണ് മുയൽചെവിയൻ എന്ന പേരിനു കാരണം. സംസ്കൃതത്തിൽ ശശശ്രുതി എന്ന പേരിൽ അറിയപ്പെടുന്നതും ഇതേ കാരണം കൊണ്ടു തന്നാണ്.

if you have any suggestions about this post please write it here

ഉഴിഞ്ഞ

2008-07-04T10:02:00.012+05:30

ദശപുഷ്പങ്ങളില്‍ പെട്ട ചെടികളിലൊന്ന്.

Cardiospermum halicacabum Linn.

Family: SAPINDACEAE
Genus: Cardiospermum
Species: halicacabum

English Names - Love in a Puff, Balloon Vine, Heartseed, heart pea, winter cherry, black winter cherry.

Sanskrit - chakralata, Indravalli.

Hindi - kanphata,

Malayalam - Uzhinja(ഉഴിഞ്ഞ).

Tamil - Mudakkatraan.

ഉഴിഞ്ഞയുടെ കായ്

പൂവിന്റെയും കായുടെയും വിത്തിന്റെയും കൂടുതൽ ചിത്രങ്ങൾ ഇവിടെ കാണാം.

Reference

ഔഷധസസ്യങ്ങൾ - ഡോ. എസ് നേശമണി.

http://davesgarden.com/guides/pf/go/648/

http://plants.usda.gov/java/profile?symbol=CAHA13

http://www.plantoftheweek.org/week256.shtml

if you have any suggestions about this post please write it here

തടിചുരുളില്‍ ഒരു ചിത്രം (കരകൌശലം)

2008-06-26T19:11:00.003+05:30

മുകളില്‍ കാണുന്നതു പോലൊരു ചിത്രം ഉണ്ടാക്കാന്‍ ആവശ്യം വേണ്ട സാധനങ്ങള്‍

1.ഒരു ചിത്രം.

2.കറുത്തതോ അല്ലെങ്കില്‍ നിങ്ങള്‍ക്കിഷ്ടമുള്ള ഇരുണ്ട നിറത്തിലെ വെല്‍‌വെറ്റ് തുണി അല്ലെങ്കില്‍ സാധാരണ തുണി.
പിന്നെ ഒരു കാര്‍ഡ് ബോര്‍ഡ് ചിത്രത്തിന്റെ അളവില്‍ മുറച്ചതില്‍ തുണി ചുറ്റി പുറകില്‍ പശ വെച്ച് ഒട്ടിക്കുക. കാര്‍ഡ് ബോര്‍ഡില്ലാത്തതു കൊണ്ട് ഞാന്‍ വെല്‍‌വെറ്റ് തുണിയുടെ പുറത്താണ് ഇത് ഉണ്ടാക്കുന്നത്. എന്റെ കൈയ്യില്‍ ആകെ ഉണ്ടായിരുന്നത് പച്ചനിറത്തിലെയാണ് വെല്‍‌വെറ്റാണ്. അതു കൊണ്ട് അതു ഉപയോഗിക്കുന്നു.

3.അടുത്തതായി വേണ്ടത് തടി ചിന്തേരിടുമ്പോള്‍ കിട്ടുന്ന തടിചുരുള്‍. വീട്ടില്‍ ആശാരിപണി എന്തെങ്കിലും ചെയ്യുമ്പോ അതില്‍ നിന്നും നല്ല നിറത്തിലും നീളത്തിലുമുള്ള ചുരുളുകളെടുത്ത് സൂക്ഷിച്ചു വെച്ചിരുന്നാല്‍ മതി. എന്നെ പോലെ കേരളത്തിനു വെളിയില്‍ താമസിക്കുന്നവര്‍ക്ക് ചില സമയം ഇത് കിട്ടാന്‍ ഇത്തിരി പ്രയാസപ്പെടേണ്ടി വരും. എന്റെ അനുഭവത്തില്‍ തടിപണി ചെയ്യുന്നവരോട് മര്യാദയ്ക്ക് ചോദിച്ചാല്‍ അവര്‍ സന്തോഷത്തോടെ തരാറാണ് പതിവ്. പിന്നെ വഴിയെ പോവുന്നവര് “കണ്ടാ പറയൂല്ലാ തീ കത്തിക്കാന്‍ വിറകു പോലുമില്ലാത്ത വീട്ടിലെയാണെന്ന് ” എന്ന ഭാവത്തിലൊക്കെ നോക്കിയെന്നു വരും. അതൊന്നും മൈന്‍ഡ് ചെയ്യാണ്ട് വാരി കൊണ്ട് വീട്ടില്‍ വന്നിട്ട് നല്ലത് നോക്കി തിരഞ്ഞെടുക്കുക.

4. ഒരു കത്രിക

5. ഫെവിക്കോള്‍

6. ഒരു ഷീറ്റ് വെള്ളകടലാസ് അല്ലെങ്കില്‍ ചിത്രത്തിന്റെ ഒരു കോപ്പി കൂടി.

ഇത്രയുമാണ് വേണ്ടത്.

ചിത്രത്തിന്റെ രണ്ടു കോപ്പിയുണ്ടെങ്കില്‍ അത് ഒരോ ഭാഗവും മുറിച്ചു വെയ്ക്കുക. ഇല്ലെങ്കില്‍ ഒരു വെളള കടലാസില്‍ ചിത്രം ട്രേസ് ചെയ്ത് അത് ഓരോ ഭാഗങ്ങളായി മുറിക്കുക. ഒറിജിനല്‍ ചിത്രത്തിലും മുറിച്ച ഭാഗങ്ങളിലും നമ്പര്‍ ഇട്ട് വെയ്ക്കുന്നത് നന്നായിരിക്കും. പിന്നീട് ഏതു ഭാഗത്താണ് വരിക എന്ന ചിന്താകുഴപ്പം ഉണ്ടാവില്ല.

ഇനി തടിചുരുള്‍ ഓരോന്നായി ഇസ്തിരിയിട്ട് നിവര്‍ത്തിയെടുക്കണം.

അതിനു ശേഷം മുറിച്ചു വെച്ചിരിക്കുന്ന കടലാസിനു പുറമേ ഫെവിക്കോള്‍ പുരട്ടി ചുരുള്‍ അതില്‍ ഒട്ടിച്ചെടുക്കണം. കടലാസിന്റെ അതേ അളവില്‍ തന്നെ ഒട്ടിക്കണമെന്നില്ല. എന്നാല്‍ കടലാസ് ഒട്ടും വെളിയില്‍ കാണാത്ത വിധത്തില്‍ വേണം ഒട്ടിക്കാന്‍.

ഇനി അതിന്റെ പുറകു വശത്തെ കടലാസിന്റെ ആകൃതിയില്‍ ചുരുള്‍ മുറിച്ചെടുക്കാം. എളുപ്പത്തിനു വേണ്ടിയാണ് ഈ കടലാസ് പ്രയോഗം.

താഴെ അതിന്റെ മറുവശം.

എല്ലാ ഭാഗവും പൂര്‍ത്തിയായ ശേഷം തുണിയുടെ പുറത്ത് ചിത്രം കാര്‍ബണ്‍ ഉപയോഗിച്ച് പകര്‍ത്തുക.

ഇനി അതിന്റെ മുകളിലായി ഓരോ ഭാഗങ്ങളില്‍ ചുരുള്‍ ഒട്ടിച്ചു തുടങ്ങാം.

ഇതാ ചിത്രം പൂര്‍ത്തിയായ ശേഷം.

ലാന്റ്‌സ്ക്കേപ്പ് മാതിരിയും നിറവ്യത്യാസമുള്ള ചുരുളുകളുപയോഗിച്ച് ചെയ്യാന്‍ സാധിക്കും. എനിക്കത്രയും മെനക്കെടാന്‍ മടിയാണ്. നിങ്ങള്‍ക്ക് ഇഷ്ടമുള്ള ഒരു ചിത്രം ഇത്തരത്തില്‍ പരീക്ഷിച്ചു നോക്കൂ.

മുന്‍പ് വായിച്ചിട്ടില്ലാത്തവര്‍ക്കായി പഴയ ക്രാഫ്റ്റ് പോസ്റ്റുകളുടെ ലിങ്കുകള്‍

പഞ്ഞപുല്ല് കൊണ്ടൊരു ചിത്രം

സ്റ്റഫ്ഡ് ടോയ് - കോഴിക്കുഞ്ഞ്

ഗ്ലാസ് പെയിന്റിംഗ് വിത്ത് വിറയല്‍ ഇഫക്ട്

ടിഷ്യൂപേപ്പര്‍ കൊണ്ടൊരു പൂവ്

അനുകരണം

2008-06-23T15:08:00.001+05:30

ഇരുന്നിരുന്ന് ബോറടിച്ചു. അപ്പോ തുടങ്ങാല്ലേ? റെഡി, വണ്‍,ടൂ, ത്രീ, സ്റ്റാര്‍ട്ട്!

എന്റെ കഴുത്തൊടിഞ്ഞു കറക്കി കറക്കി. ഇനിയെന്നെ കൊണ്ടെങ്ങും പറ്റൂല്ലാ, വേറെ പണി നോക്ക്.

അപ്ഡേറ്റ് - 24/06/08

പുതുതായി രണ്ടു ചിത്രങ്ങള്‍ ചേര്‍ക്കയും. ആദ്യം പോസ്റ്റ് ചെയ്ത ചിത്രങ്ങളുടെ മുറയില്‍ ലേശം സ്ഥാനചലനം വരുത്തുകയും ചെയ്തതിട്ടുണ്ട്. അതിനാല്‍ കമന്റില്‍ ചിലര്‍ സൂചിപ്പിച്ച ചിത്രങ്ങളാവില്ല ആ സ്ഥാനത്ത് ഇപ്പോള്‍ ഉണ്ടാവുക.

വിനാശകാലേ വിപരീതബുദ്ധി എന്നു പറയാറില്ല. ഈ ചിത്രങ്ങള്‍ എടുത്തു കൊണ്ടിരുന്നപ്പോഴാണ് ആദ്യമായി അപ്ചേര്‍, എഫ് സ്റ്റോപ്പ് , മാനുവല്‍ ഫോക്കസിംഗ് , എക്സ്പോഷര്‍ ഇത്യാദി സംഗതികള്‍ ഒന്നു മാറ്റി പരീക്ഷിച്ചു പഠിച്ചു നോക്കാം എന്ന തോന്നല്‍ ഉണ്ടായത്. തല്‍‌ഫലമായി പല ചിത്രങ്ങളും വൈറ്റ് വാഷ് അടിച്ചതു പോലെയായി. ആ പഠിച്ചതിന്റെ കുഴപ്പങ്ങളൊക്കെ ഈ ചിത്രങ്ങളില്‍ ഉണ്ട്. അതൊക്കെ ക്ഷമിക്കുക പൊറുക്കുക.

പരിണാമം

2008-06-19T16:41:00.003+05:30

ഇരുതലശലഭം

2008-06-18T16:35:00.011+05:30

സുന്ദരന്റെ നാട്ടുകവലയില്‍ പണ്ട് തേരാപാരാ ഇഴഞ്ഞു നടന്നിരുന്ന ഇരുതല മൂരി(രണ്ടു അറ്റവും തലകളുള്ള പാമ്പ്)യെ കുറിച്ച് കമന്റ്സില്‍ ചര്‍ച്ച നടന്നപ്പോഴാണ് നാട്ടില്‍ പോയപ്പോ രണ്ടു തലയില്ലെങ്കിലും മറ്റേ വശത്ത് ആളെ പറ്റിക്കാന്‍ തല പോലത്തെ ഡിസൈനും കൊണ്ടു നടക്കുന്ന ഈ ചിത്രശലഭത്തെ കണ്ട കാര്യം ഓര്‍ത്തത്. പറ്റിക്കല്‍ തലയും ഉണ്ടകണ്ണും കണ്ട് പിടിക്കാന്‍ വരുന്നവര്‍ പേടിച്ചോടുമായിരിക്കും.ആളുടെ കുടുംബപേരും ഇംഗ്ലീഷ് പേരും മലയാളം പേരും ഒന്നും അറിയില്ല. അറിയാവുന്നവര്‍ ഉണ്ടെങ്കില്‍ പറഞ്ഞു തരിക.

അപ്ഡേറ്റ് - 24/06/08

ചിത്രശലഭത്തിന്റെ പേര് - മങ്കി പസില്‍ (Monkey Puzzle)
Binomial name - Rathinda amor
കൂടുതല്‍ വിവരങ്ങള്‍ ഇവിടെയും ഇവിടെയും വായിക്കാം
ഈ വിവരങ്ങള്‍ അന്വേഷിച്ചറിയിച്ച ചെള്ളിയാനും പറഞ്ഞു തന്ന ബാലകൃഷ്ണന്‍ വളപ്പിലിനും നന്ദി.

ജീവന്‍ രക്ഷിച്ച അടവ്

മുകളിലെ ചിത്രത്തിലെ മങ്കി പസില്‍ ശലഭത്തെ ശ്രദ്ധിച്ചാല്‍ അറിയാം ആ മറുവശത്തെ പറ്റിക്കത്സ് തല അതിന്റെ ജീവന്‍ രക്ഷിച്ചുവെന്ന്. ആ ഭാഗം മുഴുവനായി നഷ്ടപ്പെട്ടിരിക്കുന്നു. കൊന്നു തിന്നാന്‍ വന്നവന്‍ തലയെന്നു കരുതി പിടികൂടിയത് പുറകുഭാഗത്താണെന്ന് തോന്നുന്നു.

ചിറകു ഒതുക്കിയിരിക്കുമ്പോഴുള്ള ആ ഭംഗിയത് ചിറകു വിരിച്ചിരിക്കുമ്പോള്‍ തോന്നുന്നില്ല. മറ്റൊരു കാര്യം എന്റെ ശ്രദ്ധയില്‍ പെട്ടത് ഈ ശലഭം ചിറകൊതുക്കിയിരുന്നു പുറകിലെ ചിറക് വിറപ്പിച്ചു കൊണ്ടിരിക്കും. ശ്രദ്ധ പുറകുവശത്ത് കിട്ടാനുള്ള മറ്റൊരു അടവ്.

ഇനി വേറെ രണ്ടു പറ്റിക്കലുകാര്‍. കണ്ടാല്‍ “കാക്ക തൂറിന്നാ തോന്നുന്നേ” എന്നും പറഞ്ഞ് നമ്മള്‍ പോവേയുള്ളൂ.

ഇതാ അടുത്തയാള്‍.

ഈ രണ്ടു പേരേയും കണ്ടു മുട്ടിയത് കറിവേപ്പിലാണ്. പക്ഷേ രണ്ടാളുടെയും ഇരിക്കേണ്ട സ്ഥലം പരസ്പരം മാറി പോയോന്നാ എന്റെ സംശയം. ആദ്യത്തെ “കാക്ക തൂറി”യുടെ ഡിസൈന്‍ കറിവേപ്പിന്റെ തടിയുടെ അതേ പോലെ തന്നെ. അവിടെ ഇരുന്നാല്‍ വേര്‍തിരിച്ചറിയാന്‍ വളരെ ബുദ്ധിമുട്ടും. അതു തന്നെ പച്ച ഡിസൈന്‍‌കാരന്‍ ഇലയിലോ പച്ച തണ്ടിലോ ഇരുന്നാലും സംഭവിക്കും.

നിങ്ങള്‍ക്ക് കണ്ടിട്ടെന്ത് തോന്നുന്നു? ഇവര്‍ ഇരിക്കേണ്ട സ്ഥലം പരസ്പരം മാറി പോയോ? അതോ എന്റെ ചിന്തയുടെ കുഴപ്പമാണോ?

അപ്ഡേറ്റ് 19/06/08

ഈ പുഴുക്കള്‍ രണ്ടും ഒരേ ശലഭത്തിന്റേതാണോന്ന് നാഷണല്‍ ജോഗ്രഫിക്കലില്‍ വന്ന ഈ വാര്‍ത്ത കണ്ടപ്പോള്‍ സംശയം തോന്നുന്നു. അതില്‍ പറയുന്നതനുസരിച്ച് സോളോ ടെയില്‍ വിഭാഗത്തിലെ ചിത്രശലഭത്തിന്റ് പുഴുക്കള്‍ ആദ്യകാലങ്ങളില്‍ കിളികളുടെ കാഷ്ഠത്തിന്റെ രൂപത്തിലും പിന്നീട് വളര്‍ച്ച പൂര്‍ത്തിയാവുന്നതിനോടുത്ത് പച്ചനിറത്തിലേയ്ക്ക് നിറം മാറാറുണ്ടെത്രേ. അങ്ങനെയെങ്കില്‍ അവര്‍ ഇരിക്കേണ്ട സ്ഥാനം മാറിയിട്ടുണ്ടാവില്ല. ഇലകളില്‍ കാഷ്ഠം വീണതു പോലെ ആദ്യത്തെയാള്‍ ഇല തിന്നാനായി ഇലയിലും വളര്‍ച്ച പൂര്‍ത്തിയാവാറായപ്പോള്‍ പ്യൂപ്പയാവാന്‍ വേണ്ടി പച്ചനിറക്കാരന്‍ തടിയിലും ഇരുന്നതാവാം.

black week

2008-06-09T18:08:00.004+05:30

ഇഞ്ചിപെണ്ണിനോടും കേരള്‍സ്.കോമിനെതിരെ പോരാടുന്ന മറ്റു ബ്ലോഗര്‍മാര്‍ക്കും ഐക്യദാര്ഢ്യം പ്രഖ്യാപിച്ചു കൊണ്ട് ഞാനും ഈ കരിവാരത്തില്‍ പങ്കുചേരുന്നു.

നാഗലിംഗപുഷ്പം

2008-04-12T19:03:00.005+05:30

മഹാനന്ദി ക്ഷേത്രത്തിനുള്ളില്‍ വെച്ചാണ് ആദ്യായി ഈ പൂവ് കണ്ടത്. കണ്ടപ്പോഴേ അതിന്റെ ഭംഗിയില്‍ ഞാന്‍ മയങ്ങി പോയെന്നു പറയാം. അവിടെ ഒരോ കോവിലിനുള്ളിലും വിഗ്രഹത്തില്‍ ഈ പൂവ് ചാര്‍ത്തിയിരിക്കുന്നത് കണ്ടു. കണ്ണു മുഴുവന്‍ പൂവിലായിരുന്നതിനാല്‍ ശ്രീകോവിലിലെ വിഗ്രഹവും അതിനു താഴെയുള്ള ഉറവയുമൊന്നും എന്റെ കണ്ണില്‍ പെട്ടിട്ടില്ല. കൂടെയുള്ളവരൊക്കെ ദൂരെയായിട്ടും ഞാനിങ്ങനെ പൂവിലും കണ്ണും നട്ട് മന്ദം മന്ദം നടന്നു. എങ്ങനെ ഇതിന്റെ പേരറിയുമെന്നായിരുന്നു ചിന്ത മുഴുവനും. അങ്ങനെ അവസാനം ഒരു പൂജാരിയുടെ മുന്നില്‍ ചെന്നു പെട്ടു. അങ്ങേരുടെ കൈയ്യില്‍ രുദ്രാക്ഷം വില്പനയ്ക്കുണ്ട്. അതില്‍ നിന്നും രണ്ടെണ്ണം വാങ്ങി ആരും അടുത്തില്ലാത്ത തക്കം നോക്കി പൂവിന്റെ പേരു ചോദിച്ചു. നാഗപത്മേശ്വര പൂവ്‌ലു എന്നാണെന്ന് പറഞ്ഞു. അതു മാത്രമല്ല കോവിലില്‍ നിന്നും ഒരു പൂവെടുത്ത് എന്റെ കൈയ്യിലും തന്നു. അപ്പോഴത്തെ എന്റെ സന്തോഷം പറഞ്ഞറിയിക്കാന്‍ വയ്യ. ഒരു പൂവ് ചോദിച്ചിട്ട് ഒരു പൂന്തോട്ടം മുഴുവനും കിട്ടിയ സന്തോഷമായിരുന്നെനിക്ക്. അതു കൂടാതെ ആ പൂവുണ്ടാകുന്ന മരം പുറകുവശത്തുണ്ടെന്നും അതിനെ വലം വെച്ചാല്‍ നല്ലതാണെന്ന് പറഞ്ഞ് അങ്ങോട്ടേയ്ക്കുള്ള വഴിയും ചൂണ്ടി കാട്ടി.

അങ്ങനെ ആ ചെടി കാണാന്‍ കൂടെ ഉള്ളവരേയും വിളിച്ചു കൂട്ടി അങ്ങോട്ട് നടന്നു. മരത്തിലെ ഇലകളൊക്കെ പൊഴിഞ്ഞ് പുതിയ ഇലകള്‍ വരുന്നതേയുള്ളൂ. മരത്തിന്റെ തായ്തടിയില്‍ നിന്നും തന്നെയാണ് പൂക്കള്‍ വിരിയുന്നത്. അവിടെ താഴ്‌ഭാഗത്ത് പൂക്കളൊന്നും തന്നെ ഉണ്ടായിരുന്നില്ല കായ്കളും കണ്ടില്ല. പൂജയ്ക്കായി പൂക്കള്‍ പറിയ്ക്കുന്നത് കൊണ്ട് കായാവാന്‍ അവസരം കിട്ടാത്തതു കൊണ്ടാവാം. ഇതിന്റെ പൂവിന് ഹ്യദ്യമായ മണമായിരുന്നു.

വീട്ടിലെത്തി ഗൂഗിളില്‍ അല്പം അന്വേഷണം നടത്തിയപ്പോള്‍ മരത്തിന്റെ ഇംഗ്ലീഷ് പേര് cannonball tree എന്നാണെന്ന് മനസ്സിലായി. വടക്കേ അമേരിക്കയാണ് സ്വദേശം. കാഴ്ചയില്‍ പീരങ്കിയുണ്ടയോടുള്ള ഇതിന്റെ കായുടെ സാദൃശ്യമാണ് ഈ പേരു കിട്ടാന്‍ കാരണം. സംസ്ക്യതത്തില്‍ നാഗപുഷ്പമെന്നും തമിഴില്‍ നാഗലിംഗം, ഹിന്ദിയില്‍ നാഗലിംഗ, തെലുങ്കില്‍ കോടിലിംഗാലു എന്നീ പേരുകളില്‍ അറിയപ്പെടുന്നു.(പക്ഷേ നാഗപത്മേശ്വരാ/നാഗപരമേശ്വരാ എന്നൊന്നും എവിടെയും കണ്ടില്ല) പൂവിന്റെ നടുവില്‍ ശിവലിംഗാക്യതിയില്‍ ഒരു കേസരവും അതിനു ചുറ്റും ലിംഗാക്യതിയിലുള്ള നിരവധി കേസരങ്ങളും അതിനെ സംരക്ഷിക്കുന്ന വിധത്തിലെ ഭാഗത്തിന് പത്തി വിടര്‍ത്തി നില്‍ക്കുന്ന പാമ്പിന്റെ രൂപസാമ്യവുമാണ് ഈ പേരുകള്‍ക്ക് കാരണം. അതു കൊണ്ടു തന്നെ ശിവക്ഷേത്രങ്ങളില്‍ ഈ പൂവിന് പ്രത്യേക സ്ഥാനമുണ്ട്.

ഈ പൂവ് പ്രധാനമായും ചുവപ്പ്, പിങ്ക്, വെള്ള എന്നീ നിറങ്ങളില്‍ കാണപ്പെടുന്നു. പൂവിന് 6 ദളങ്ങളോട് കൂടി 5-6 സെ.മീ വലിപ്പത്തില്‍ കാണപ്പെടുന്നു. ഈ പൂവ് തേന്‍ ഉല്പാദിപ്പിക്കുന്നില്ല. ലിംഗാകൃതിയിലുള്ള കേസരങ്ങള്‍ പരാഗണത്തിനും പത്തിയുടെ ആകൃതിയിലുള്ളവ തേനീച്ചകളെ ആകര്‍ഷിക്കാനുമാണുള്ളത്. ലാര്‍വയ്ക്ക് കൊടുക്കാന്‍ വേണ്ടി പൂമ്പൊടി അന്വേഷിച്ചു പൂവിനുള്ളില്‍ കയറുന്ന തേനീച്ചയുടെ തലയിലും പുറത്തും ലിംഗാകൃതിയിലെ കേസരങ്ങള്‍ ഉരസി പൂമ്പൊടി പറ്റി പിടിക്കയും മറ്റു പൂവുകള്‍ സന്ദര്‍ശിക്കുമ്പോള്‍ അവയുടെ കേസരങ്ങളില്‍ അവ നിക്ഷേപിക്കപ്പെട്ടുമാണ് പരാഗണം നടക്കുന്നത്.

ഇതിന്റെ കായ്കള്‍ക്ക് എകദേശം തേങ്ങയുടെ വലിപ്പമുണ്ടാവും. ഇത് മൂപ്പെത്താനായി എകദേശം 12 മുതല്‍ 18 മാസം വേണ്ടി വരും.കായുടെ വലിപ്പമനുസരിച്ച് 65 മുതല്‍ 550 വരെ വിത്തുകള്‍ കാണപ്പെടുന്നു. കട്ടിയുള്ള പുറം തോടിനുള്ളില്‍ 6 അറകളിലായി മാംസളഭാഗം കാണപ്പെടുന്നു.ഉള്ളിലെ ഭാഗത്തിന് ഇളം പൊന്മാന്‍ നീല നിറമാണ്. വായുവുമായുള്ള സമ്പര്‍ക്കത്തില്‍ അതു ഇരുണ്ട നിറമായി മാറുന്നു. കോഴി, പന്നി, കുരങ്ങ് തുടങ്ങി ജീവികള്‍ ആഹരിച്ച് അവയുടെ കാഷ്ടത്തിലും മലത്തിലുമൂടെയാണ് വിത്ത് വിതരണം ചെയ്യപ്പെടുന്നത്.പൂവുകള്‍ക്ക് ഹൃദ്യമായ മണത്തിനു വീപരീതമായി കായ്ക്ക് ചീഞ്ഞ മണവുമാണുള്ളത്. ഈ മരം 35 മീറ്ററോളം പൊക്കം വെയ്ക്കുമെന്ന് പറയുന്നു.

ശാസ്ത്രീയ നാമം COUROUPITA GUIANENSIS.
കുടുംബം - Lecythidaceae

ബ്രസീല്‍ നട്ടിന്റെ വകയിലെ സഹോദരനാണിദ്ദേഹം.

എനിക്ക് പൂവിന്റെ മുഴുവനായുള്ള ഫോട്ടോസ് എടുക്കാന്‍ സാധിച്ചില്ല. ചുരുങ്ങിയ സമയം കൊണ്ടുള്ള ഒറ്റകൈ അഭ്യാസത്തിലാണ് ഇത്രയും ഫോട്ടോസ് തന്നെ ഒപ്പിച്ചത്. അതിനാല്‍ കൂടുതല്‍ ഫോട്ടോകള്‍ക്കും വിവരങ്ങള്‍ക്കുമായി താല്പര്യമുള്ളവര്‍ക്ക് ഈ ലിങ്കുകളില്‍ കൂടി പോവാം.

1.നമ്മടെ മോഹനം ചുള്ളന്‍സും ഇതിന്റെ പടങ്ങള്‍ പോസ്റ്റിയിരുന്നു. അദ്ദേഹം കമന്റിട്ട ശേഷമാണ് അതെന്റെ ശ്രദ്ധയില്‍ പെട്ടത്.

2.ഇവന്റെ കുടുംബചരിത്രവും സ്വഭാവഗുണവുമിവിടുണ്ട്

3.കൂടുതല്‍ ചിത്രങ്ങള്‍

4. എന്നെ പോലെ പൂവിന്റെ പേരും തപ്പിപ്പോയ ഒരു ആസ്ട്രേലിയക്കാരന്റെ കഥ

ഈ മരവും പൂവുമൊക്കെ കണ്ടപ്പോ ഒരാഗ്രഹം എനിക്കും. ഈ മരം ഒരെണ്ണം വെച്ചു പിടിപ്പിക്കണമെന്ന്. ആര്‍ക്കെങ്കിലും ഇതിന്റെ വിത്തുകളോ തൈകളോ എവിടെ കിട്ടുമെന്ന് അറിയാമെങ്കില്‍ ഒന്നു പറഞ്ഞു തരണേ. പിന്നെ നമ്മുടെ നാട്ടില്‍ ഈ പൂവിനെ എന്തു പേരിലാ വിളിക്കുന്നതെന്നും.

ഏല്ലാവര്‍ക്കും എന്റെ സ്നേഹം നിറഞ്ഞ വിഷുവാശംസകള്‍!

update 3rd september 2008

ബാഗ്ലൂർ ലാൽബാഗിലെ ഫ്ലവർഷോയോടു അനുബന്ധിച്ചു പ്രദർശനത്തിനു വെച്ചിരുന്ന നാഗലിംഗമരത്തിന്റെ കായ്.

മഹാനന്ദിയിലേയ്ക്കൊരു യാത്ര

2008-04-09T09:36:00.004+05:30

ആന്ധ്രപ്രദേശിലെ കര്‍ണൂള്‍ ജില്ലയിലുള്ള നന്ദ്യാല എന്ന പട്ടണത്തില്‍ നിന്നും 15 കിലോമീറ്റര്‍ മാറി സ്ഥിതി ചെയ്യുന്ന പ്രസിദ്ധമായ ശിവക്ഷേത്രം. ഹൈദ്രാബാദില്‍ നിന്നും 210 കിലോമീറ്റര്‍ യാത്ര ചെയ്താല്‍ കര്‍ണൂളിലും അവിടെ നിന്നും നന്ദ്യാല വഴി 80 കിലോമീറ്റര്‍ യാത്ര ചെയ്താല്‍ മഹാനന്ദിയിലെത്താം. ഉര്‍വശിശാപം ഉപകാരം എന്നു പറയുമ്പോലെ ബേലം ഗുഹയിലേയ്ക്കുള്ള യാത്രയില്‍ വഴി തെറ്റിയാണ് ഞങ്ങള്‍ നന്ദ്യാലയിലെത്തിപ്പെട്ടത്. എന്തായാലും എത്തിയ സ്ഥിതിക്ക് പ്ലാനിലില്ലായിരുന്നു മഹാനന്ദി ക്ഷേത്രം കൂടി കണ്ടു കളയാമെന്നു തീരുമാനിച്ചു. അടുത്ത ദിവസം പുലര്‍ച്ചയാവാം ക്ഷേത്രദര്‍ശനമെന്ന തീരുമാനത്തില്‍ ബേലം ഗുഹ സന്ദര്‍ശിച്ച് രാത്രി വീണ്ടും നന്ദ്യാലയിലെത്തി മുറിയെടുത്ത് താമസിച്ചു.

പിറ്റേന്ന് രാവിലെ 7.30 യോട് കൂടി മഹാനന്ദിയിലേയ്ക്ക് പുറപ്പെട്ടു. നമ്മുടെ കുട്ടനാടിനെ ഓര്‍മ്മിപ്പിക്കുന്ന പ്രക്യതിഭംഗിയുള്ള ഒരു ചെറിയ ഗ്രാമത്തിലൂടെയായിരുന്നു യാത്ര. റോഡിനിരുവശവും ബജ്ര (അതോ ഇനി ജവാരിയാണോ (sorghum ) എന്നറിയില്ല) , വാഴ, നെല്ല് അങ്ങനെ പല പല ക്യഷികളുള്ള പാടങ്ങള്‍ കണ്ടങ്ങനെ രസിച്ചു പൊയ്കൊണ്ടിരുന്നപ്പോഴാണ് ദൂരെ ഒരു മഞ്ഞ വര ശ്രദ്ധയില്‍ പെട്ടത്. അടുത്തെത്തിയപ്പോഴാണ് അത് സൂര്യനെ കണ്ണൂചിമ്മാതെ നോക്കി നില്‍ക്കുന്ന സൂര്യകാന്തിപൂക്കളുടെ കൂട്ടമാണെന്ന് പിടികിട്ടിയത്.

അവിടെ ചാടിയിറങ്ങി, സൂര്യകാന്തി പൂക്കളുടെ ഭംഗി ആസ്വദിച്ചും ഫോട്ടോയെടുത്തും അല്പസമയം ചിലവിട്ട ശേഷം യാത്ര തുടര്‍ന്നു. പിന്നെ വഴിയില്‍ കാളവണ്ടികള്‍, എരുമകള്‍, കഴുതകള്‍, വണ്ടികളോട് എന്തോ വൈരാഗ്യം കൊണ്ട് കുരച്ചടുക്കുന്ന നാടന്‍ പട്ടികള്‍, പന്നികള്‍ ഇവയെയൊക്കെ കണ്ടു കണ്ടു ഞങ്ങള്‍ ഒരു ടോള്‍ ഗേറ്റിനരികിലായുള്ള ഉടുപ്പി ഹോട്ടലിനു മുന്നിലെത്തി. വിശപ്പിന്റെ ആക്രമണം തുടങ്ങിയതിനാല്‍ അതു അവസാനിപ്പിച്ചിട്ടാവാം ഇനി യാത്രയെന്നു കരുതി നേരെ അവിടേയ്ക്ക് കയറി. ഹോട്ടലിനുള്ളില്‍ മീരാ ജാസ്മിന്റെ രണ്ടു പടങ്ങള്‍ തൂക്കിയിട്ടിരിക്കുന്നു. ആരാപ്പാ ഈ മീരാ ജാസ്മിന്‍ ഫാനെന്ന് അവിടുത്തെ ഒരു ചേട്ടനോട് തിരക്കി. കടയുടെ മുതലാളിയുടെ സുഹ്യത്താണത്ര മീര. (അതോ എന്നെങ്കിലും കൂടെ നിന്നു ഫോട്ടം എടുത്ത പരിചയം മാത്രമാണോ ഈ സുഹ്യത്ത് ബന്ധം? ആര്‍ക്കറിയാം) ഞങ്ങള്‍ അതൊക്കെ മറന്ന് മസാല ദോശയിലും ഇത്തിരി പോന്ന ഗ്ലാസില്‍ കിട്ടിയ എലക്കായിട്ട ചായയിലും കോണ്‍സെണ്ട്രേറ്റ് ചെയ്തു. മഹാനന്ദിയിലേയ്ക്ക് ഇനി എത്ര നേരം യാത്രയുണ്ടെന്ന് ചേട്ടനോട് തിരക്കി. മഹാനന്ദിയില്‍ തന്നെയാ നിങ്ങള്‍ എന്നു ഉത്തരം കിട്ടി.നടന്നു പോവാനുള്ള ദൂരമേയുള്ളൂ.പിന്നെന്തിനാ വെറുതെ മുപ്പത് രൂപ ടോളും കൊടുത്ത് വണ്ടിയും കൊണ്ട് അകത്ത് പോവുന്നേ?. ബുദ്ധിപൂര്‍വ്വം വണ്ടി അവിടെ തന്നെ പാര്‍ക്ക് ചെയ്ത് ടോള്‍ ഗേറ്റിലെ ചേട്ടനെ പറ്റിച്ചേയെന്ന ഭാവത്തില്‍ നോക്കി ഞങ്ങള്‍ അമ്പലത്തിലേയ്ക്ക് നടന്നു.

ആദ്യം എത്തുന്നത് നന്ദിയുടെ പ്രതിമയുടെ മുന്നിലാണ്. ലോകത്തിലെ ഏറ്റവും വലിയ നന്ദി പ്രതിമയാണിത്. കുറേ സ്ത്രീകള്‍ അതിനു മുന്നിലായിരുന്നു ഭക്ഷണം കഴിക്കുന്നുണ്ടായിരുന്നു. ഒരു വശത്ത് ശിവന്റെ ഒരു ചെറിയ പ്രതിമ കൂടിയുണ്ട്. കുറച്ചു പേര്‍ ശിവന്റെ കൂടെയിരുന്നു ഫോട്ടം പിടിക്കുന്നു.

അവിടെ ഒന്നു വലം വെച്ച ശേഷം അമ്പലത്തിലേയ്ക്ക് നടന്നു. നിറയെ ജീപ്പുകള്‍ കിടപ്പുണ്ട്. കര്‍ണ്ണാടകത്തില്‍ നിന്നും മഹാരാഷ്ട്രയില്‍ നിന്നുമുള്ള സാധാ ഗ്രാമീണരായിരുന്നു സന്ദര്‍ശകരില്‍ മുന്തിയ പങ്കും. പലരും ഭക്ഷണം പാകം ചെയ്തു കഴിക്കാന്‍ വേണ്ടി പച്ചക്കറിയും ഗ്യാസുമൊക്കെയായാണ് വരവ് കൂടെ ഒരു 200-250 ചപ്പാത്തിയുടെ ഒരു കെട്ടും. മറ്റു ചിലര്‍ അമ്പലത്തിനു മുന്നിലുള്ള ചാലില്‍ തുണിയലക്കി വിരിക്കുന്നതിന്റെ തിരക്കിലാണ്.

അമ്പലത്തിനിടതു വശത്തായി ഒരു ഷെഡില്‍ രഥം കണ്ടു. ഉത്സവത്തിന് ഉപയോഗിക്കുന്നതാവും. അതിനടുത്തുള്ള വ്യത്താക്യതിയില്‍ കെട്ടിയിട്ടിരിക്കുന്ന മതിലിനുള്ളില്‍ മുറം കെട്ടു കെട്ടായി വെച്ചിരിക്കുന്നു. മുറം കച്ചവടം തക്യതിയായി നടന്നു കൊണ്ടിരിക്കുന്നു.

ഓലമേഞ്ഞ നടപ്പാതയിലൂടെ നടന്ന് അകത്തേയ്ക്കുള്ള വാതിലിലെത്തിയപ്പോള്‍ ഒരാള്‍ തടഞ്ഞു നിര്‍ത്തി. ടിക്കറ്റ് എടുക്കണമത്രേ. അപ്പോഴാണ് മുന്നിലുള്ള ബോര്‍ഡ് കണ്ടത് സാധാ ദര്‍ശനത്തിനു 5 രൂപ. 50 രുപ ടിക്കറ്റാണേല്‍ സ്പെഷ്യല്‍ ദര്‍ശനവും നടത്താം. സിനിമാ തിയറ്ററില്‍ കയറും പോലെ ശിവനെ ദര്‍ശിക്കാനും ടിക്കറ്റ്! വണ്ടി പൂജിച്ചു കൊടുക്കുന്നതിന് വണ്ടിയുടെ വലിപ്പമനുസരിച്ച് പല പല റേറ്റുകള്‍. ഓരോന്നും അക്കമിട്ട് ബോര്‍ഡില്‍ എഴുതി വെച്ചിട്ടുണ്ട്. വലതു വശത്തെ ടിക്കറ്റ് കൌണ്ടറില്‍ നിന്നും ടിക്കറ്റുമെടുത്ത് അകത്ത് കയറി.

പടിപ്പുര കയറി അകത്തേയ്ക്ക് ചെന്നാല്‍ ഇരു വശങ്ങളിലും ഓരോ കുളങ്ങള്‍ കാണാം. ഇത് വിഷ്ണു ഗുണ്ഡം ബ്രഹ്മഗുണ്ഡം എന്നീ പേരുകളില്‍ അറിയപ്പെടുന്നു. ഇതിലെ വെള്ളത്തിനെ ഇരുണ്ട പച്ചനിറമാണ്.അതില്‍ നീന്തി തുടിക്കുന്ന കോമളന്മാരും കോമളാംഗികളും അപ്പൂപ്പന്മാരും അമ്മൂമ്മമാരും കൊച്ചുകുട്ടികളും. അവരുടെ കുളിസീന്‍ പിടിച്ച് ചുമ്മാ കന്നഡ, മറാത്തി, തെലുങ്ക് എന്നീ ഭാഷകളിലെ തെറികള്‍ കേള്‍ക്കണ്ടായെന്നു കരുതി അടുത്ത പടിപ്പുര കയറി ഉള്ളിലേയ്ക്ക് പ്രവേശിച്ചു. അവിടെ നടുവില്‍ 60 അടി വലിപ്പമുള്ള ചതുരസ്ക്യതിയിലെ ഒരു കുളവും(രുദ്ര ഗുണ്ടം) അതിനൊത്ത നടുവില്‍ ഒരു മണ്ഡപവും കാണാം.

മഹാനന്ദിയുടെ പ്രത്യേകതയാണീ കുളം. അതില്‍ വെള്ളത്തിന്റെ തെളിമ പറഞ്ഞറിയിക്കാന്‍ വയ്യാ. അടിത്തട്ട് വ്യക്തമായി കാണാന്‍ പറ്റുന്ന രീതിയില്‍ ക്രിസ്റ്റല്‍ക്ലിയറായുള്ള വെള്ളം.

5 അടി ആഴമുള്ള ജലമാണിതെന്ന് ഈ ഫോട്ടോ നോക്കിയാല്‍ തോന്നുമോ?

ഹിമാലയത്തിലല്ലാതെ ഇത്രയും ശുദ്ധതയുള്ള ജലം ഇന്ത്യയിലൊരിടത്തുമില്ലെന്ന് പറയപ്പെടുന്നു. മുന്‍‌കാലങ്ങളില്‍ ഈ കുളത്തില്‍ മുങ്ങി കുളിക്കാന്‍ ആളുകളെ അനുവദിക്കുമായിരുന്നു. ഇപ്പോ എന്തോ അതിലേയ്ക്ക് പ്രവേശനം തടഞ്ഞിരിക്കയാണ്.

വെളളത്തിന്റെ ആഴം എല്ലായ്പ്പോഴും 5 അടിയില്‍ നിലനിര്‍ത്തുന്ന രീതിയിലാണിതിന്റെ നിര്‍മാണം. ഏതു വഴിയില്‍ കൂടെയാണ് ഈ വെള്ളം കുളത്തിലേയ്ക്ക് വരുകയും ഇതില്‍ നിന്നും പുറത്തേ രണ്ടു കുളത്തിലേയ്ക്ക് പോവുകയും ചെയ്യുന്നതെന്ന് ഇതു വരെ കണ്ടു പിടിക്കാന്‍ സാധിച്ചിട്ടില്ല. പുറത്തുള്ള കുളങ്ങളില്‍ നിന്നും വെള്ളം ക്യഷിയാവശ്യങ്ങള്‍ക്കായി കൊണ്ടു പോവുന്നു. ഏക്കര്‍ കണക്കിന് ക്യഷിനിലങ്ങള്‍ ഈ വെള്ളത്തെ ആശ്രയിച്ച് ക്യഷി നടത്തി വരുന്നു.

ഇവിടെയുള്ളത് സ്വയംഭൂ ലിംഗമാണ്. അതിനു തൊട്ടു താഴെ നിന്നാണ് വെള്ളം പുറത്തേയ്ക്ക് വരുന്നത്. ഈ അമ്പലത്തിന്റെ മറ്റൊരു പ്രത്യേകതയായി പറയുന്നത് ദര്‍ശനത്തിനെത്തുന്നവര്‍ക്കെല്ലാം വിഗ്രഹത്തിലും ഉറവയിലും തൊട്ട് സ്വയം പൂജ ചെയ്യാമെന്നതാണ്. പക്ഷേ അവിടെ ഞാന്‍ കണ്ട കാഴ്ച വ്യത്യസ്തമായിരുന്നു. സെപ്ഷ്യല്‍ ദര്‍ശനത്തിന് ടിക്കറ്റെടുത്തവരെ മാത്രമേ ഇപ്പോള്‍ അതിന് അനുവദിക്കുന്നുള്ളൂ. സെയിത്സ്മാന്മാരെ പോലെ പൂജാരികള്‍ ആളെ പിടിക്കാന്‍ നില്‍ക്കുന്നു. രുദ്രാക്ഷം വില്പനയ്ക്ക് ഓരോരുത്തരുടെയും കയ്യിലുണ്ട്. പൂജയ്ക്കായുള്ള പൂക്കളുടെ കൂട്ടത്തില്‍ നല്ല ഭംഗിയുള്ള ഞാനിതു വരെ കാണാത്ത ഒരു തരം പൂവ് കണ്ടു. ആ പൂവുണ്ടാവുന്ന മരവും ഉണ്ടവിടെ കുട്ടികളില്ലാത്തവര്‍ക്ക് കുട്ടികള്‍ ഉണ്ടാവാനും കല്യാണം നടക്കാതവര്‍ക്ക് കല്യാണം നടക്കാനും ആ മരത്തിനെ വലം വെച്ചാല്‍ മതിയെന്നാണ് വിശ്വാസം.

അമ്പലത്തിനു ചുറ്റിനും വമ്പന്‍ മരങ്ങളുണ്ട്. നല്ലമല കാടിന്റെ അടിവാരത്തായാണീ അമ്പലം സ്ഥിതി ചെയ്യുന്നത്. ഇതു കൂടാതെ 10 മൈല്‍ ചുറ്റളവില്‍ 9 അമ്പലങ്ങള്‍ കൂടിയുണ്ട്. പത്മ നന്ദി, നാഗനന്ദി, വിനായകനന്ദി, ഗരുഡനന്ദി, ബ്രഹ്മനന്ദി, സൂര്യനന്ദി, വിഷ്ണു നന്ദി, സോമനന്ദി, ശിവനന്ദി എന്നിവയാണവ. ഈ അമ്പലങ്ങളിലെല്ലാം ഒരു ദിവസം കൊണ്ട് സൂര്യാസ്തമയത്തിനു മുന്നേയായി ദര്‍ശനം പൂര്‍ത്തിയാക്കണമെന്നാണ് വിശ്വാസം.

1500 കൊല്ലത്തോളം പഴക്കമുള്ള പാരമ്പര്യമുള്ള മനോഹരമായ ക്ഷേത്രം പക്ഷേ വളരെയധികം കച്ചവടവല്‍കരിക്കപ്പെട്ടു പോയിരിക്കുന്നു. ആള്‍തിരക്കില്ലാത്ത, പോക്കറ്റിന്റെ കനം നോക്കി പൂജ ചെയ്യാത്ത, ഒരു പൂജാരി മാത്രമുള്ള ആ ക്ഷേത്രം ഞാനൊന്ന് ഭാവനയില്‍ കണ്ടു. ആ പരിശുദ്ധമായ വെള്ളത്തില്‍ മുങ്ങി കുളിച്ച് ആ വിഗ്രഹത്തില്‍ പൂജ ചെയ്യുന്ന ആ സംത്യപ്തി എന്തായിരിക്കും. പക്ഷേ ഇപ്പോഴുള്ള അതിന്റെ അവസ്ഥ കണ്ട് ഒന്നു പ്രാര്‍ത്ഥിക്കാന്‍ പോലും മറന്നാണ് ഞാന്‍ മഹാനന്ദിയില്‍ നിന്നും ഇറങ്ങിയത്.

തുടര്‍വായന

മഹാനന്ദി ക്ഷേത്രത്തിനു പിന്നിലെ ഐതിഹ്യം

കോളിഫ്ലവര്‍ അച്ചാര്‍

2008-03-29T16:10:00.009+05:30

അച്ചാറിനു പേരു കേട്ട ആന്ധ്രയില്‍ താമസിച്ചിട്ട് ഒരു അച്ചാര്‍ പോസ്റ്റിട്ടില്ലെങ്കില്‍ മോശമല്ലേ. സംഗതി വളരെയെളുപ്പം. അടുപ്പത്ത് വെയ്ക്കേണ്ട കാര്യമേയില്ല. എനിക്ക് ഒരു തെലുങ്ക് ചേച്ചി പഠിപ്പിച്ചു തന്നതാണ്. മാങ്ങ, നാരങ്ങാ അച്ചാറുകള്‍ കൂട്ടി മടുത്തവര്‍ക്ക് ഒരു വ്യത്യസ്തതയ്ക്ക് വേണ്ടി പരീക്ഷിച്ചു നോക്കാം. പിന്നെ രുചിയുടെ കാര്യത്തില്‍ അല്പം പ്രശ്നം വരുന്നത് എണ്ണയുടെ കാര്യത്തിലാവും. കപ്പലണ്ടിയെണ്ണയാണ് ഇതിലുപയോഗിക്കുന്നത് അതിന്റെ ചുവ ഇഷ്ടമല്ലാത്തവര്‍ക്ക് നല്ലെണ്ണയിലോ സൂര്യകാന്തിയെണ്ണയിലോ ഉണ്ടാക്കാം.

ആവശ്യമുളള സാധനങ്ങള്‍

കോളിഫ്ലവര്‍ അഥവാ ഗോബി - 6 കപ്പ്
മുളകുപൊടി - 1 കപ്പ്
ഉപ്പ് - 1 കപ്പ്
കടുകുപൊടി - 1 കപ്പ് (വറുക്കേണ്ട കാര്യമില്ല. പച്ചയ്ക്ക് മിക്സിയില്‍ ഇട്ടൊന്നു ചതച്ചത്)
നാ‍രങ്ങാനീര് - 1 1/2 കപ്പ്
വെളുത്തുള്ളി - 2 കുടം (അരച്ചത്)
കപ്പലണ്ടിയെണ്ണ (peanut/groundnut oil) - 2 കപ്പ്
ഉലുവ -1 ചെറിയ സ്പൂണ്‍

ഇത്രയുമാണ് വേണ്ട സാധനങ്ങള്‍. കപ്പിന്റെ അളവ് എന്തുമാവും. അതേ പാത്രം കൊണ്ട് തന്നെ മറ്റു സാധനങ്ങളും അളക്കണമെന്ന് മാത്രം. കോളിഫ്ലവര്‍ പുഴുവൊന്നുമില്ലാത്തത് നോക്കി വാങ്ങണം. എന്നിട്ട് നനഞ്ഞ ഒരു തുണി കൊണ്ട് നന്നായി തുടച്ചെടുക്കണം. അതിനു ശേഷം ഉണങ്ങിയ തുണി കൊണ്ടും. വെള്ളത്തില്‍ കഴുകാതിരിക്കുക. വെള്ളത്തില്‍ മുങ്ങിയാല്‍ കോളിഫ്ലവറിന്റെ മണം മാറും. അതൊഴിവാക്കാന്‍ വേണ്ടിയാണീ തുടച്ചെടുക്കലെന്നാണ് അവര്‍ പറഞ്ഞത്. എന്നിട്ട് കോളിഫ്ലവര്‍ തണ്ടുള്‍പ്പെടെ കഷ്ണിച്ചെടുക്കുക. കഷ്ണങ്ങള്‍ നല്ല വെയിലില്‍ 2 മണിക്കൂര്‍ വെച്ചുണക്കണം. വെള്ളത്തിന്റെ അംശം എന്തെങ്കിലുമുണ്ടെങ്കില്‍ പോവാന്‍ വേണ്ടിയാണ്.

ഇനി ബാക്കിയുള്ള ചേരുവയെല്ലാം കൂടി കോളിഫ്ലവറില്‍ ചേര്‍ത്തിളക്കി കുപ്പിയിലാക്കി വെയ്ക്കാം. കപ്പലണ്ടിയെണ്ണയല്ലാ ഉപയോഗിക്കുന്നതെങ്കില്‍ എണ്ണ ഒന്നു ചൂടാക്കി തണുത്ത ശേഷം ഒഴിക്കുന്നതാവും നന്ന്. ഉലുവയും പച്ചയ്ക്ക തന്നെയാണിടുന്നത്. എരിവ് അധികം വേണ്ടത്തവര്‍ക്ക് പിരിയന്‍‌മുളകിന്റെ പൊടി ഉപയോഗിക്കാം.
ഉലുവയുടെയും കടുകിന്റേയും അല്പം കയ്പ്പും കുത്തലും ഇട്ടയുടനെയുണ്ടാവും അതു മാറി കഴിഞ്ഞ്(എകദേശം ഒരാഴ്ചയ്ക്കുള്ളില്‍) ഉപയോഗിച്ചു തുടങ്ങാം.

N.B:- ആദ്യമുണ്ടാക്കുമ്പോള്‍ ചെറിയൊരു കോളിഫ്ലവര്‍ കൊണ്ട് കുറച്ചുണ്ടാക്കി രുചിയിഷ്ടപ്പെടുന്നുണ്ടെങ്കില്‍ മാത്രം അടൂത്ത പ്രാവശ്യം കൂടുതല്‍ ഉണ്ടാക്കുക. കാരണം എല്ലാവര്‍ക്കും ഇത് ഇഷ്ടപ്പെടണമെന്നില്ല.

തിരിച്ചുവരവ് നാലാം ഭാഗം

2008-03-20T02:09:00.001+05:30

ഒരു വര്‍ഷം എത്ര പെട്ടെന്നാണ് കടന്നു പോയത്. കഴിഞ്ഞ വര്‍ഷം മാര്‍ച്ച് മാസത്തിലാണ് എന്റെ വിരുന്നു പോയ കുഞ്ഞയല്‍ക്കാര്‍ തിരികെ വന്നു തുടങ്ങിയത്. ഈപ്രാവശ്യം ഇതുവരെ വിരലിലെണ്ണാവുന്നവര്‍ മാത്രമേ എത്തി ചേര്‍ന്നിട്ടുള്ളൂ. എന്റെ വീടിനോട് ചേര്‍ന്നുള്ള മരങ്ങളിലൊന്നും ആരും തന്നെ വന്നെത്തിയിട്ടില്ല. കുറച്ചു ദിവസങ്ങള്‍ക്കുള്ളില്‍ തന്നെ എല്ലാവരും എത്തിചേരുമായിരിക്കുമെന്ന് പ്രതീക്ഷിച്ചിരിക്കയാ ഞാന്‍. ഇപ്രാവശ്യവും കൂടിനു വേണ്ടി കശപിശയുണ്ടാവുമോ എന്തോ. എത്ര മരണത്തിനും എത്ര പിച്ചവെയ്ക്കലിലും സാക്ഷിയാവേണ്ടി വരുമെന്നുമറിയില്ല. എന്തായാലും കാത്തിരുന്ന് കാണാം.

കഴിഞ്ഞ സീസണില്‍ കുറച്ചു ദിവസത്തേയ്ക്ക് എന്റെ കൈയ്യില്‍ ഒരു സുഹൃത്തിന്റെ 12എക്സ് സൂം ഉള്ള ക്യാമറ കൈയ്യില്‍ കിട്ടിയിരുന്നു. അന്നെടുത്ത ചിത്രങ്ങളാണിവ. ഇനിയീ വര്‍ഷം ഇത്രയും വ്യക്തയുള്ള ചിത്രങ്ങള്‍ ഉണ്ടാവാന്‍ ഒട്ടും വഴിയില്ല. കാരണം എന്റെ 3എക്സ് ഉള്ള കുഞ്ഞിക്യാമറയുമായിലുള്ള അങ്കമായിരിക്കും ഇനി.

അമ്മ തീറ്റയുമായി വരുന്നതും കാത്ത് കണ്ണുചിമ്മാതിരുന്ന രണ്ടു കിടാങ്ങള്‍ . ഈ വര്‍ഷം ഇവരുടെ കിടാങ്ങള്‍ ചിലപ്പോള്‍ ഇവരേയും കാത്ത് ഇങ്ങനെ ഇരിക്കുമായിരിക്കും.

വേറെ പണിയൊന്നുമില്ലാതെ കലുങ്കില്‍ വായില്‍ നോക്കിയിരിക്കുന്നു ഒരുത്തന്‍.

കൂട്ടിന് മറ്റൊരുത്തനേയും കൂടി കിട്ടിയിട്ടുണ്ട്. രണ്ടാളും കൂടി ഉല്ലസിച്ചങ്ങനെയിരിക്കുമ്പോഴാണ് വേറൊരുത്തന്റെ വരവ്.

അയ്യോ ദാ കൂടെയിരുന്നവന്റെയും ഭാവം മാറി. അവനും മഫ്തിയില്‍ വന്ന പോലീസായിരുന്നു. പിന്നെ രണ്ടാളും കൂടി ചോദ്യം ചെയ്യലായി കേസായി ലോക്കപ്പായി.പൂവാലന്‍ പുലിവാല് പിടിച്ചൂന്ന് പറഞ്ഞാല്‍ മതിയല്ലോ.

പൂവാലന്റെ മഗ്‌ഷോട്ട്!

കലുങ്കില്‍ തന്നെയിരുത്തി മഗ്‌ഷോട്ടുമെടുത്ത് അവനെ തൂക്കി പോലീസ് ജീപ്പിലിട്ട് അവരങ്ങ് പറന്നു. ഈ വര്‍ഷമെങ്കിലും അവന് പരോള്‍ കിട്ടുമോ എന്തരോ? ആര്‍ക്കറിയാം!

പച്ചവെളിച്ചം (ഹൊറര്‍ പടം)

2008-03-08T17:55:00.004+05:30

പണ്ടത്തെ പച്ചവെളിച്ചം പ്രേതസിനിമയല്ല. ഒരു കുപ്പിയില്‍ പച്ചവെള്ളം നിറച്ചു അതിലൂടെ വെളിച്ചം പോയപ്പോ ഉണ്ടായ പടമാണ്. അതു കൊണ്ട് എല്ലാവരും അറച്ചു നില്‍ക്കാതെ മടിച്ചു നില്‍ക്കാതെ കടന്നു വരൂ...

ആര്‍ക്കെങ്കിലും തലക്കെട്ടു കണ്ടോ പടം കണ്ടോ തല്ലാന്‍ തോന്നുന്നുണ്ടേല്‍ തല്ലിക്കോളൂ. കുറേ നേരം ആലോചിച്ചെങ്കിലും വേറെ പേരൊന്നും കിട്ടിയില്ല. അല്ലെങ്കില്‍ ഒരു കുപ്പിയും വെളിച്ചവും പിന്നെ ഞാനും എന്നായാലോ?

പഞ്ചാരയുടെ അസുഖമുള്ള ചോളം - ചില ദ്യശ്യങ്ങള്‍

2008-02-26T11:57:00.004+05:30

കഴിഞ്ഞ ദിവസം സൂപ്പര്‍മാര്‍ക്കറ്റില്‍ പോയപ്പോ കോണിന്റെ പുറംതൊലി വലിച്ചു പറിച്ചു കൊണ്ടിരിക്കുന്ന ഒരാളെ എന്റെ ശ്രദ്ധയില്‍ പെട്ടു. സ്വീറ്റ് കോണിനു വില കിലോ 22രുപ. പുറത്തെ തൊലിക്കും കൂടി എന്തിനാ 22 രുപ കൊടുക്കുന്നതെന്നു കരുതി അതു ലാഭിക്കാന്‍ വേണ്ടിയാണ് ഈ തൊലിയുരിച്ചില്‍ നടത്തുന്നതെന്നു മനസ്സിലായി. ആളു ബുദ്ധിമാനാണല്ലോയെന്നു മനസ്സിലോര്‍ത്തു.

പുള്ളി പോയി കഴിഞ്ഞ് ഞാനും സ്വീറ്റ് കോണ്‍ വെച്ചിരിക്കുന്നതില്‍ നിന്നും ഒന്നെടുത്തു തൊലി ഇത്തിരി മാറ്റി നോക്കി. നല്ല ഫ്രഷ്. വഴിയില്‍ ചോളം ചുട്ട് കൊടുക്കുന്നവരില്‍ നിന്നും വാങ്ങുമ്പോ ഇവിടെയുള്ളവര്‍ അല്ലിയില്‍ നഖം കൊണ്ടു കുത്തി നോക്കി ടെസ്റ്റ് ചെയ്യണതു കണ്ടിട്ടുണ്ട്. അതു കൊണ്ട് ഞാനും ഒന്നു കുത്തി നോക്കി ,പാലു പോലെ ഒരു സാധനം വെളിയില്‍ വരുന്നുണ്ട്. സാധാ ചോളം കുറച്ചു കൂടി കട്ടിയിലാണിരിക്കാറ് എന്തായാലും ഞാനും രണ്ടെണ്ണം വാങ്ങി. ഒരെണ്ണത്തിന്റെ മുഴുവന്‍ പുറംതൊലി കളഞ്ഞും മറ്റേത് ഒന്നു രണ്ടു പാളി നിര്‍ത്തി കൊണ്ടും.

പിന്നെ പിറ്റേ ദിവസമാണ് കോണിന്റെ കാര്യമോര്‍ത്തത്. എന്തിനും ഏതിനും ഗൂഗിളില്‍ പോയി സെര്‍ച്ച് ചെയ്യണ സ്വഭാവമുണ്ടെനിക്ക് എന്നാ പിന്നെ ഇന്നു കോണിനെ കുറിച്ചു നോക്കാമെന്നു കരുതി. ഒരു സൈറ്റ് കിട്ടി വായിച്ചു വന്നപ്പോഴാണ് മനസ്സിലായത് ഞാന്‍ കാണിച്ചത് മണ്ടത്തരമായിരുന്നെന്ന്.

സ്വീറ്റ് കോണ്‍ വാങ്ങിയാല്‍ എത്രയും പെട്ടെന്ന് പാകം ചെയ്തു കഴിക്കണമത്രേ. സ്വീറ്റ് കോണില്‍ പഞ്ചസാര അന്നജത്തിന്റെ അനുപാതം 80:20 കാണുമെന്നും പറിച്ച് മൂന്ന് ദിവസത്തിനുള്ളില്‍ തന്നെ അനുപാതം 20:80ആയി പോവും. പറിക്കുമ്പോള്‍ മ്യദുലമായിരിക്കുന്ന അല്ലികള്‍ അന്നജത്തിന്റെ അളവു കൂടി ഓരോ നിമിഷവും കട്ടിയായി കൊണ്ടിരിക്കും.ഓടി പോയി എന്റെ കോണുകളെടുത്തു നോക്കി സംഗതി ശരി തന്നെ. ഇന്നലെ കടയില്‍ വെച്ചു കണ്ടതിനേക്കാള്‍ കട്ടിയായി കഴിഞ്ഞു, പുറത്തെ തൊലി കളഞ്ഞതിനാണ് കൂടുതല്‍ കട്ടി.

തിളച്ച വെള്ളത്തില്‍ 5 മിനിറ്റ് ഉപ്പിടാതെ പുഴുങ്ങിയെടുത്തു . (ഉപ്പ് ഇട്ടാല്‍ വേവുമ്പോ ചോളം കൂടുതല്‍ കട്ടിയാവും.)
പുഴുങ്ങിയെടുത്ത് മുകളില്‍ വെണ്ണയും തടവി കഴിഞ്ഞപ്പോഴുള്ള രുപമാണ് താഴെ.

ഒരു ക്യാരറ്റ് കേക്കിന്റെ കഥ

2008-01-22T18:21:00.000+05:30

ഒരിടത്തൊരിടത്തൊരു ചെറുഗ്രാമത്തില്‍ ഒരു യുവതി താമസിച്ചിരുന്നു. അവള്‍ക്ക് ഗ്രാമങ്ങള്‍, നഗരങ്ങള്‍ തോറും കാഴ്ചകള്‍ കണ്ടങ്ങനെ ചുറ്റി നടക്കാന്‍ വളരെ ഇഷ്ടമായിരുന്നു. അങ്ങനെയുള്ള ഒരു കറക്കത്തിനിടയിലാണ് അവള്‍ വിര്‍ച്ചല്‍ സിറ്റിയെന്ന നഗരത്തിലെത്തിപ്പെട്ടത്. അവിടെ അവള്‍ പല സുന്ദരന്മാരെ കാണുകയും പല സുന്ദരമാരേ പറ്റി കേള്‍ക്കുകയും ചെയ്തു. എന്നാല്‍ എക്സ്ട്രാ സ്പെഷ്യല്‍ ക്യാരറ്റ് കേക്ക് എന്ന യുവാവിനെ കുറിച്ച് കേട്ടമാത്രയില്‍ അവളവനില്‍ അനുരക്തയായി. അവന്റെ ഒരു ചിത്രം പോലും കണ്ടിട്ടുണ്ടായിരുന്നില്ലെങ്കിലും കേട്ടറിവു വെച്ച് അവനൊരു സുന്ദരന്‍ തന്നെയായിരിക്കുമെന്നവള്‍ ഊഹിച്ചിരുന്നു. പേരിലെ എക്സ്ട്രാ സ്പെഷ്യല്‍ ആണോ അവനെ കണ്ടിട്ടുള്ള വിക്ടോറിയ ഫാര്‍മര്‍ എന്ന വനിതയുടെ വര്‍ണ്ണനയിലാണോ അവള്‍ വീണു പോയതെന്നു പറയാന്‍ വയ്യാ. എങ്ങനെയും അവനെ കണ്ടേ തീരുവെന്നവളുറപ്പിച്ചു. അവനെ ഒന്നു കാണാണമെങ്കിള്‍ അവള്‍ക്ക് ഏറേ കടമ്പകള്‍ കടക്കണമായിരുന്നു. അവ പലപേരുകളില്‍ ടീസ്പൂണുകളായും ടേബിള്‍ സ്പൂണുകളായും കപ്പുകളായും അവളുടെ മുന്നില്‍ നിരന്നു കിടന്നു.

മൈദ - 1 1/4 കപ്പ്
സോഡാപ്പൊടി - 1 1/2 ടീസ്പൂണ്‍
കറുവാപ്പട്ട പൊടിച്ചത്- 1/2 ടേബിള്‍സ്പൂണ്‍
ഉപ്പ്- 1/4 ടീസ്പൂണ്‍

മുട്ട - 2 ചെറുത്
സൂര്യകാന്തിയെണ്ണ - 1/4 കപ്പ് + 2 ടേബിള്‍സ്പൂണ്‍
തൈര് / മോര് - 1/4 കപ്പ് + 2 ടേബിള്‍സ്പൂണ്‍
പഞ്ചസാര - 1 കപ്പ് ( അളന്ന ശേഷം പൊടിച്ചത്)
വനിലാ എസന്‍സ് - 1/2 ടേബിള്‍സ്പൂണ്‍
Canned Crushed Pineapple Drained - 1/2 കപ്പ്
ക്യാരറ്റ് ചുരണ്ടിയത് - 1 കപ്പ്
തേങ്ങ ചുരണ്ടിയത് - 2 സ്പൂണ്‍
ചെറിയ കഷ്ണങ്ങളാക്കിയ അണ്ടിപരിപ്പ് - 1/2 കപ്പ്

ഇതില്‍ Canned Crushed Pineapple Drained എന്ന കടമ്പ അവള്‍ക്ക് അല്പം പ്രയാസമായി തോന്നി. അത് അവളെ പോലെ ഇടത്തരം കുടുംബത്തിലെയൊരാള്‍ക്ക് അപ്രാപ്യമായിരുന്നു. അതിനവള്‍ മറ്റൊരു മാര്‍ഗ്ഗം കണ്ടെത്തി. പൈനാപ്പിള്‍ വാങ്ങി ചെറു കഷ്ണമാക്കി പഞ്ചസാരലായനിയില്‍ 5 മിനിറ്റ് തിളപ്പിച്ചു കഴിഞ്ഞപ്പോ അതും അവള്‍ക്ക് പ്രാപ്യമായി.

അതിനു ശേഷമവള്‍ അടുത്ത പടിയിലേയ്ക്ക് കടന്നു.

1. മൈദ, കറുവാപ്പട്ടപൊടി, ഉപ്പ്, സോഡാപ്പൊടി എന്നിവ ഒന്നിച്ചു ചേര്‍ത്ത് 2-3 പ്രാവശ്യം അരിച്ചു വെച്ചു.

2. പൈനാപ്പിള്‍ കഷ്ണങ്ങള്‍ ‍പഞ്ചസാരപാനിയില്‍ നിന്നും ഊറ്റിയെടുത്ത് മിക്സിയില്‍ അരച്ചു വെച്ചു.

പിന്നീട് ഒരു വലിയ പാത്രത്തില്‍ മുട്ട പൊട്ടിച്ചൊഴിച്ച് നന്നായി പതപ്പിച്ചു. അതിലേയ്ക്ക് തൈര്, എണ്ണ, പഞ്ചസാര, വനിലാ എസന്‍സ് എന്നിവ ഓരോന്നായി ചേര്‍ത്ത് പതപ്പിച്ചു. എല്ലാം നന്നായലിഞ്ഞു ചേര്‍ന്ന ശേഷം അരിച്ചു വെച്ചിരിക്കുന്ന മൈദമാവ് കുറേശ്ശേയായി തവി/സ്പാറ്റുലാ കൊണ്ട് ഇളക്കി ചേര്‍ത്തു. മാവ് കട്ടയില്ലാത്ത വിധത്തില്‍ എത്തിയ ശേഷം പൈനാപ്പിള്‍ അരച്ചതും, ക്യരറ്റ്, തേങ്ങാ, അണ്ടിപരിപ്പ് എന്നിവ ഓരോന്നായി ഇളക്കി ചേര്‍ത്തു.

തയ്യാറാക്കിയ മിശ്രിതം വശങ്ങളില്‍ വെണ്ണ പുരട്ടി മാവ് തൂവി, അടിയില്‍ ബട്ടര്‍പേപ്പര്‍ ഇട്ട 8” വലിപ്പമുള്ള പാത്രത്തില്‍ ഒഴിച്ച് 180ഡിഗ്രിയില്‍ നേരത്തെ ചൂടാക്കിയ Ovenല്‍ വെച്ച് ഒരു മണിക്കൂര്‍ ബേക്ക് ചെയ്തു.

ഒരു മണിക്കൂര്‍ കാത്തിരിപ്പിനു ശേഷം Ovenന്റെ വാതില്‍ തുറന്നപ്പോള്‍ ഇരുണ്ടനിറത്തിലെ വട്ടമുഖമുള്ള സുന്ദരന്‍ ഇതാ മുന്നില്‍. പിന്നീട് പലപ്പോഴും അവനവളുടെ വീട്ടില്‍ വിരുന്ന് വന്നു. അവനെ കണ്ടവര്‍ക്കൊക്കെയും അവന്‍ പ്രിയപ്പെട്ടവനായി. ഇനി നിങ്ങള്‍ക്കും അവനെ കാണാന്‍ ആഗ്രഹമുണ്ടെങ്കില്‍ ഈ കടമ്പകള്‍ എല്ലാം കടന്നാല്‍ നിങ്ങളുടെ വീട്ടിലും അവന്‍ വിരുന്നിനെത്തും. ഒരിക്കല്‍ കണ്ടാല്‍ അവന്‍ നിങ്ങളുടെയും മനം കവരുമെന്നതു തീര്‍ച്ച.

കഥ അങ്ങനെ അവസാനിച്ചു. ഇനിയല്പം കാര്യത്തിലേയ്ക്ക് കടക്കാം.

മൈദ മുതല്‍ ഇങ്ങോട്ടുള്ള സാധനങ്ങള്‍ തവി അല്ലെങ്കില്‍ സ്പാറ്റുല കൊണ്ട് ഇളക്കി ചേര്‍ത്താല്‍ മതി. ബീറ്റര്‍ ഉപയോഗിച്ച് അധികം അടിച്ചു പതപ്പിച്ചാല്‍ കേക്കിനു മാര്‍ദ്ദവം കുറയും.
മൈദ അരിച്ച ശേഷം അളക്കുന്നതാവും നന്ന്. പിന്നെ ക്യാരറ്റ് അളക്കുമ്പോള്‍ അമര്‍ത്തി അളക്കരുത്.

ഇത് 8 അല്ലെങ്കില്‍ 9 ഇഞ്ച് വലിപ്പത്തില്‍ ഒരു കേക്കുണ്ടാക്കാനുളള അളവുകളാണ്. ഇത്തരം രണ്ട് കേക്കുകളുണ്ടാക്കാനാണ് ഉദ്ദേശമെങ്കില്‍ നേരെ മുകളില്‍ കൊടുത്തിരിക്കുന്ന ലിങ്കില്‍ പോയാല്‍ മതി. എന്നെ പോലെ ഒരെണ്ണം മാത്രം ഉണ്ടാക്കുന്നവര്‍ക്ക് എളുപ്പത്തിനു വേണ്ടി എല്ലാ അളവുകളും പകുതിയാക്കി എഴുതിയെന്നു മാത്രം.

ഇനി അതില്‍ പറഞ്ഞിരിക്കുന്ന ഗ്ലേസ് ഉണ്ടാക്കുന്നുണ്ടെങ്കില്‍ അതു കേക്ക് അവനില്‍ നിന്നും പുറത്തെടുത്തയുടനെ കേക്കിനു പുറത്തൊഴിക്കുക. ഞാന്‍ ആദ്യമാദ്യം ഗ്ലേസ് ഒഴിക്കുമായിരുന്നു. ഇപ്പോ അതില്ലാത്തതായി കൂടുതല്‍ ഇഷ്ടം. അതില്‍ പറഞ്ഞ കോണ്‍സിറപ്പില്ലാത്തതിനാല്‍ അതിനു പകരമായി തേനാണ് ഉപയോഗിച്ചിരുന്നത്.
പിന്നെ ഫ്രോസ്റ്റിങ്ങില്‍ ഇതുവരെ കൈവെച്ചിട്ടില്ലാത്തതിനാല്‍ അതിനെ കുറിച്ചെനിക്കറിയില്ല.

ബട്ടര്‍ പേപ്പര്‍ എങ്ങനെ കേക്ക്ടിന്നില്‍ ഇടാമെന്നത് അറിഞ്ഞു കൂടാത്തവര്‍ക്ക് ഈ ലിങ്ക് ഉപകാരപ്പെട്ടേക്കുമെന്നു കരുതുന്നു.

‘ട്രേ’ വക്കിലെ കൊലപാതകം - ചില ദ്യശ്യങ്ങള്‍

2007-12-26T13:53:00.001+05:30

ഈ പടങ്ങള്‍ കാണുന്നതിനു മുന്‍പ് മനസ്സിനു നല്ല കരുത്തു പകരുക. ഇതൊക്കെ കാണാനുള്ള ശക്തി തരണേയെന്നു ഉള്ളുരുകി പ്രാര്‍ത്ഥിക്കുക.

മുന്നറിയിപ്പ് :- ഗര്‍ഭിണികള്‍, ഹ്യദ്രോഗികള്‍, കൊച്ചുകുട്ടികള്‍ ഒക്കെ കണ്ണടിച്ചു പിടിച്ച് കാണുക.
ഇത് എന്റെ വീട്ടില്‍ നടന്ന സംഭവമാണ്. നിങ്ങളുടെ വീട്ടിലും ഇതൊക്കെ നടന്നിട്ടുണ്ടാവും ഇല്ലേ.

ആദ്യം പറഞ്ഞതൊക്കെ ചുമ്മാ ഒരു ഇഫക്ടിനു വേണ്ടി പറഞ്ഞതാണ്. സംഭവം ദാണ്ടേ ഇത്രേയുള്ളു. ഞാന്‍ കൊറച്ചു മുട്ട മേടിച്ചു പൊട്ടിച്ചു നല്ല ഓം‌ലറ്റും കേക്കുമൊക്കെയുണ്ടാക്കി. ആ സമയം എന്നാ കുറച്ച് ഫോട്ടം എടുത്തേക്കാമെന്നു തോന്നിയെടുത്തതാ. കൊള്ളാമോ?

ഇനിയിപ്പോ നിങ്ങടെ സമാധാനത്തിനായി ഈ മുട്ടകള്‍ എന്താ ചെയ്തതെന്നുള്ളതിന്റെ തെളിവായി അതു കൊണ്ടുണ്ടാക്കിയ കേക്കിന്റെ പടം കൂടെ പോസ്റ്റുന്നു.

ഈ പേരു നിര്‍ദ്ദേശിച്ച അഗ്രജനു നന്ദി രേഖപ്പെടുത്തുന്നു.

യൌവനവും വാര്‍ദ്ധക്യവും

2007-12-08T11:09:00.001+05:30

യൌവനത്തിന്റെ മിനുമിനുപ്പും വാര്‍ദ്ധക്യത്തിന്റെ ചുളിവുകളും

ദീപങ്ങള്‍...ദീപാവലി

2007-11-10T09:58:00.001+05:30

എന്റെ അയല്‍‌വാസിയുടെ വാതില്‍പ്പടിയിലെ കോലമെഴുത്ത് ഞാനെപ്പോഴും കൌതുകത്തോടെ കണ്ടു നില്‍ക്കാറുണ്ട്. ചില വിശേഷദിവസങ്ങളില്‍ കുങ്കുമവും മഞ്ഞളും കൊണ്ട് കുറി തൊട്ടു നില്‍ക്കുമ്പോള്‍ കോലത്തിനു ഭംഗി ഒന്നു കൂടി കൂടും.

ഇന്നലെ കുറി തൊട്ട കോലത്തിനു നടുവിലേയ്ക്ക് മറ്റൊരാള്‍ കൂടിയെത്തി.

അണിഞ്ഞൊരുങ്ങിയെത്തിയ പൂത്താലം കൂടിയായപ്പോ...

ആകെപ്പാടെ ഒരു പൂരത്തിന്റെ മട്ട്.

വാതില്‍പ്പടിക്കിരുവശവും കത്തിച്ചു വെച്ച ചിരാതുകളും നടുവിലെ പൂത്താലവും കോലവും ഒക്കെ ചേര്‍ന്ന ഒരു തെലുങ്ക് ഭവനം.

ഇന്നലെ എന്റെ വീടിനു മുന്നിലും തെളിഞ്ഞു

ഒരു കുഞ്ഞു മണ്‍ചിരാത്

സ്റ്റഫ്ഡ് ടോയ് - കോഴിക്കുഞ്ഞ് (കരകൌശലം)

2007-10-22T17:16:00.000+05:30

സ്റ്റഫ്ഡ് ടോയിസ് ഉണ്ടാക്കാന്‍ പഠിക്കാന്‍ ആഗ്രഹമുള്ളവര്‍ക്ക് ഒരു തുടക്കം തരാന്‍ വേണ്ടിയാണീ പോസ്റ്റ്.

ഫര്‍ തുണിയില്‍ ഒരു കുഞ്ഞു കോഴിക്കുഞ്ഞിനെ ഉണ്ടാക്കാന്‍ ആവശ്യമുള്ള സാധനങ്ങള്‍.

1. കോഴിക്കുഞ്ഞിന്റെ പാറ്റേണ്‍ കട്ടി കടലാസില്‍ വെട്ടിയെടുത്തത്.(ഇവിടെ നിന്നും pdf ഡൌണ്‍ലോഡ് ചെയ്യാം.)

2. മഞ്ഞ ഷോര്‍ട്ട്ഫര്‍ തുണി
3. ചുവപ്പു വെല്‍‌വെറ്റ് തുണി
4. കറുപ്പ് വെല്‍‌വെറ്റ് തുണി
5. സിന്തെറ്റിക്ക് കോട്ടണ്‍(സ്റ്റഫിങ്ങിന്)
6. കത്രിക
7. നൂല്‍
8. ഫെവി ക്യുക്ക് & ഫെവി ഫിക്സ് പോലെ വീര്യം കൂടിയ പശ
9. സൂചി
10.സ്കെച്ച് പെന്‍ അല്ലെങ്കില്‍ ബോള്‍ പെന്‍

ആദ്യമേ മഞ്ഞഷോര്‍ട്ട്ഫറിന്റെ മറുവശത്ത് സൈഡ് ബോഡിയുടെ പാറ്റേണ്‍ വെച്ചു ചുറ്റും പേനകൊണ്ടു വരയ്ക്കുക.ശ്രദ്ധിക്കേണ്ട ഒരു കാര്യം എപ്പോഴും പാറ്റേണ്‍ വരയ്ക്കുമ്പോള്‍ തുണിയിലെ ഡൈറക്ഷനും പാറ്റേണിന്റെ ഡൈറക്ഷനും സമാന്തരമായിരിക്കണം. അതിനെ കുറിച്ച് കൂടുതല്‍ ഇവിടെയുണ്ട്.

ഇനി സൈഡ് ബോഡിയുടെ പാറ്റേണ്‍ തിരിച്ചു വെച്ച് ഒരെണ്ണം കൂടി വരയ്ക്കുക.

ഇനി അണ്ടര്‍ ബോഡി ഒരെണ്ണം. വിങ്ങ്സ് പാറ്റേണ്‍ രണ്ടെണ്ണം വരയ്ക്കുക.കഴിവതും തുണി ലാഭിക്കാന്‍ കഴിയുന്ന രീതിയില്‍ പാറ്റേണ്‍ വരച്ചെടുക്കുക. എന്നാല്‍ ഡൈറക്ഷന്‍ മാറി പോവുകയുമരുത്.

ചുവപ്പ് വെല്‍‌വെറ്റ് തുണിയില്‍ ചുണ്ടിന്റെ (beak)പാറ്റേണും കൂടി വരച്ച് മുറിച്ചെടുക്കുക.

മുറിക്കുമ്പോള്‍ ശ്രദ്ധിക്കേണ്ട കാര്യങ്ങളെ കുറിച്ചറിയാന്‍ ഇവിടെ നോക്കുക.

ഇനി അണ്ടര്‍ബോഡിയിലെ ‘എ’യും സൈഡ് ബോഡിയിലെ ‘എ’യും തമ്മില്‍ യോജിപ്പിച്ച് കെട്ടുകളിടുക. ഇനി അതേ പോലെ ബി യും ബി യുമായും യോജിപ്പിക്കുക. അങ്ങേയറ്റവും ഇങ്ങേയറ്റവും നടുക്കും ഓരോ കെട്ടുകളിടുകയാണെങ്കില്‍ തയ്ക്കുമ്പോള്‍ വളരെ എളുപ്പമായിരിക്കും.
എ മുതല്‍ ബി വരെ തയ്ക്കുക.

അതിനു ശേഷം സൈഡ് ബോഡിയുടെ രണ്ടാമത്തെ കഷ്ണവും അപ്പര്‍ ബോഡിയുമായി മുകളില്‍ പറഞ്ഞിരിക്കുന്നതു പോലെ യോജിപ്പിച്ച തയ്ക്കുക.

ഇനി സൈഡ് ബോഡി പരസ്പരം യോജിക്കുന്ന രീതിയില്‍ സൈഡ് ബോഡിയിലെ എ മുതല്‍ ബി വരെ തയ്ക്കുക.
ഇപ്പോള്‍ എല്ലാഭാഗവും തയ്യലാല്‍ മൂടപ്പെട്ടു കഴിഞ്ഞു. അണ്ടര്‍ ബോഡിയില്‍ നടുക്ക് സ്ലിറ്റ് എന്നെഴുതി വരച്ചിരിക്കുന്ന അത്രയും ഭാഗം കത്രിക കൊണ്ട് മുറിക്കുക. ആ ദ്വാരത്തില്‍ കൂടി ഫറിന്റെ നല്ല ഭാഗം മുകളില്‍ വരുന്ന രീതിയില്‍ തിരിച്ചെടുക്കുക.

ഇനി താഴെയുള്ള ദ്വാരത്തില്‍ കൂടി കോട്ടണ്‍ നിറയ്ക്കുക. നന്നായി നിറച്ച ശേഷം ആ ദ്വാരം തയ്ച്ചു അടയ്ക്കുക.

ഇനി ചിറകുകള്‍ കഴുത്തിനു ഇരുഭാഗവും വരത്തക്കവണ്ണം മുകളിലെ ചിത്രത്തിലെ മാതിരി തയ്ച്ചു ചേര്‍ക്കുക.

ഇനി ചുവപ്പു തുണിയില്‍ മുറിച്ചു വെച്ചിരിക്കുന്ന ചുണ്ടിന്റെ പാറ്റേണ്‍ രണ്ടായി മടക്കി നടുഭാഗത്തിന്റെ അങ്ങേയറ്റവും ഇങ്ങേയറ്റവും അതേ നിറത്തിലെ നൂലു കൊണ്ട് മുന്‍ഭാഗത്ത് തയ്ച്ചു വെയ്ക്കുക. ഈ ചിത്രത്തിലെ പോലെ ചുണ്ട് വിടര്‍ന്നിരിക്കണം.

ഇനി കറുപ്പ് വെല്‍‌വെറ്റ് തുണിയില്‍ രണ്ടു വളരെ ചെറിയ വ്യത്തങ്ങള്‍ മുറിച്ചെടുത്ത് കണ്ണിന്റെ സ്ഥാനത്ത് പശ തേച്ച് ഒട്ടിക്കുക.

കോഴിക്കുഞ്ഞിതാ സുന്ദരക്കുട്ടപ്പനായി കഴിഞ്ഞു. സ്വന്തമായി ഇതുപോലെ മൂന്നാലെണ്ണമുണ്ടാക്കി ചെറിയൊരു ചൂരല്‍കൊട്ടയില്‍ വെച്ച് പ്രിയപ്പെട്ടവര്‍ക്ക് ഗിഫ്റ്റ് കൊടുത്തു നോക്കൂ.

ഇതില്‍ എതെങ്കിലും ഭാഗത്തു സംശയമുണ്ടെങ്കില്‍ കമന്റിട്ടാല്‍ മതി ഞാന്‍ വിശദീകരിച്ചു തരാം.

ഫര്‍ ഒരു പരിചയപ്പെടല്‍

2007-10-22T17:14:00.000+05:30

സ്റ്റഫ്ഡ് റ്റോയ്സ് ഉണ്ടാക്കാന്‍ ഉപയോഗിക്കുന്ന ഫര്‍(mohair) തുണിയെ കുറിച്ചും അതു എങ്ങനെ ഉപയോഗിക്കാമെന്നതിനെ കുറിച്ചും എനിക്കറിവുളളത് നിങ്ങള്‍ക്ക് പറഞ്ഞു തരാന്‍ ഒരു ശ്രമം.

രോമത്തിന്റെ നീളമനുസരിച്ച് ഫര്‍ പല പേരില്‍ അറിയപ്പെടുന്നു.

ഇടത്തു നിന്നും വലത്തോട്ട് ലോങ്ങ് ഫര്‍, മീഡിയം ഫര്‍, മീഡിയത്തിനും ഷോര്‍ട്ടിനുമിടയിലുള്ള ഫര്‍, ഷോര്‍ട്ട് ഫര്‍
മുകളില്‍ അതിന്റെയെല്ലാം മറുപുറം.

ഇനി ഫറിന്റെ ഡൈറക്ഷണ്‍ കണ്ടുപിടിക്കാന്‍ തുണി വിരിച്ചിട്ട് മുകളില്‍ കൂടി കയ്യോടിക്കുക. താഴേയ്ക്ക് മിനുസമായി രോമം വരുന്ന ദിശ ഫറിന്റെ മറുഭാഗത്ത് അടയാളപ്പെടുത്തുക. ഒരിക്കലും നല്ല വശത്ത് അടയാളപ്പെടുത്തരുത്.

ഇത് ആ തുണിയുടെ മറുപുറം ഇവിടെ അടയാളപ്പെടുത്തുക.

മിക്ക പാറ്റേണിലും ഇതേ പോലെ ദിശ അടയാളപ്പെടുത്തിയിട്ടുണ്ടാവും അതും ഈ തുണിയിലെ ദിശയും സമാന്തരമായി വരുന്നവിധം വെച്ചു വേണം പാറ്റേണ്‍ അടയാളപ്പെടുത്തി മുറിക്കാന്‍.

ഇനി മുറിക്കുമ്പോള്‍ ശ്രദ്ധിക്കേണ്ട ചില കാര്യങ്ങള്‍.

ഒരിക്കലും ഫര്‍ ഇതേപോലെ കത്രിക വെച്ചു മുറിക്കരുത്. ഇങ്ങനെ മുറിച്ചാല്‍ രോമം മുറിഞ്ഞു പോവും.

അതൊഴിവാക്കാനായി കത്രിക രോമത്തിനിടയിലൂടെ കടത്തി വേണം മുറിക്കാന്‍. ഞാന്‍ നിങ്ങള്‍ക്ക് മനസ്സിലാവാന്‍ വേണ്ടി നല്ല വശം മുകളില്‍ വരുന്ന വിധം കാണിച്ചെന്നേയുള്ളു. പക്ഷേ മുറിക്കുമ്പോള്‍ ചീത്തവശം മുകളില്‍ വരുന്ന രീതിയില്‍ വെച്ച് മുറിക്കുക.

കത്രിക രോമത്തിനിടയിലൂടെ കടത്തി മുറിച്ചാല്‍ ചിത്രത്തില്‍ ഇടതു വശത്തു കാണുന്നതു പോലെ രോമം ഒന്നും മുറിഞ്ഞു പോവാതെ കിട്ടും. എന്നാല്‍ രോമത്തിനു മുകളില്‍ കൂടി മുറിച്ചാല്‍ വലതു വശത്തേതു പോലെ രോമം മുറിഞ്ഞു പോവും.

ഫെറിനെ കുറിച്ച് ഒരു എകദേശ ധാരണ കിട്ടിയെന്നു കരുതുന്നു. ഇനി ഷോര്‍ട്ട് ഫെര്‍ കൊണ്ട് ഒരു കോഴിക്കുഞ്ഞിനെ എങ്ങനെയുണ്ടാക്കാം എന്നിവിടെ കാണാം.

പ്രാവുകള്‍ കുറുകുന്നു...

2007-10-17T11:24:00.003+05:30

1941 മുതല്‍ ഇവിടെ ഹൈദ്രാബാദിലെ കോട്ടിയിലുള്ള പ്രാവുകള്‍ക്കായുള്ള ഗോപുരം. കടകളാല്‍ ചുറ്റപ്പെട്ട് ത്രികോണാക്യതിയില്‍ കിടക്കുന്ന ഒരു തുണ്ട് സ്ഥലം.

ഞങ്ങളകത്തേയ്ക്കു ചെന്നതും തീറ്റ തിന്നു കൊണ്ടിരുന്ന പ്രാവുകള്‍ കൂട്ടമായി പറന്നു തുടങ്ങി.

ഈ സ്ഥലത്തിനു തൊട്ടടുത്താണ് ഗോകുല്‍ ചാറ്റ്. ഹൈദ്രാബാദില്‍ സ്ഥോടനമുണ്ടായ സ്ഥലങ്ങളിലൊന്ന്.

അന്നും ഈ പാവങ്ങള്‍ ഇതേ പോലെ പറന്നു പൊങ്ങിയിട്ടുണ്ടാവാം. ആ കട ഇപ്പോള്‍ അടഞ്ഞു കിടപ്പാണ്.

ഈ മഞ്ഞ നിറത്തില്‍ കാണുന്ന നിലം മണ്ണല്ല. പ്രാവുകള്‍ക്ക് തിന്നാന്‍ ഇട്ടു കൊടുത്തിരിക്കുന്ന ബജ്‌റയാണ്. കാലു പുതയുന്ന കനത്തിലുണ്ടായിരുന്നു അത്. അതു കണ്ടപ്പോഴ് പ്രാവുകള്‍ക്കിവിടെ സുഖജീവിതമാണെന്നു മനസ്സിലായി.

കുറച്ചു പേര്‍ ഈ കൂടുകള്‍ കൈയ്യടക്കി വെച്ചിട്ടുണ്ട്. വളരെയധികം പ്രാവുകളുള്ളതിനാല്‍ ബാക്കിയുള്ളവര്‍ അടുത്തുള്ള കെട്ടിടങ്ങളിലാവാം താമസം.

അന്തേവാസികള്‍ തീറ്റ കഴിഞ്ഞു വിശ്രമത്തില്‍.

അല്പം കഴിഞ്ഞപ്പോള്‍ പ്രാവുകള്‍ തിരികെയെത്തി തുടങ്ങി.

വീണ്ടും പറന്നു, തിരികെയത്തി. അതിങ്ങനെ തുടര്‍ന്നു കൊണ്ടേയിരുന്നു.

ലംബാടികളും സീതപ്പഴങ്ങളും

2007-10-09T23:15:00.000+05:30

സീതപ്പഴത്തിന്റെ സീസണാവുമ്പോ കാണുന്ന കാഴ്ചകളിലൊന്ന്. ഗ്രാമങ്ങളില്‍ നിന്നും സീതപ്പഴവും നിറച്ച് വരിവരിയായി നഗരത്തിന്റെ തെരുവോരങ്ങളില്‍ കിടക്കുന്ന കാളവണ്ടികള്‍.

ഒരു ലംബാടി ഇളമുറക്കാരി കച്ചവടത്തിനായുള്ള സ്ഥലം വ്യത്തിയാക്കുന്ന തിരക്കില്‍.

“തെരുവിലാണെങ്കിലെന്ത് നമ്മള്‍ താമസിക്കുന്ന സ്ഥലം വ്യത്തിയാക്കിയിടണ്ടേ.”

കച്ചവടത്തിനായി സീതപ്പഴങ്ങള്‍ ഒരുക്കുന്ന തിരക്കില്‍

ഇനി വാങ്ങാന്‍ ആളെ തിരഞ്ഞുള്ള കാത്തിരിപ്പ്.

ആകെ തിരക്കോട് തിരക്ക്. മുഴുവന്‍ വേഗം വിറ്റു തീര്‍ന്നാലല്ലേ തിരികെ നാട്ടിലേയ്ക്ക് പോവാനാവൂ.

മുതിര്‍ന്നവര്‍ കച്ചവടത്തിന്റെ തിരക്കിലാവുമ്പോള്‍ നാല്‍ക്കാലികളെ നോക്കാനുള്ള ചുമതല ഈ ഇളമുറക്കാര്‍ക്കാണ്.

ഈ മുകളിലെ പയ്യന്മാര്‍ക്ക് അവരുടെ പടമെടുക്കുന്നതിലും സന്തോഷം താഴെ കാണുന്ന അവരുടെ കാളകളുടേത് എടുക്കുന്നതിലായിരുന്നു. നാല്‍ക്കാലികള്‍ അവരുടെ ജീവിതത്തിന്റെ വളരെ വലിയൊരു ഭാഗമായി തോന്നി.

തിരക്കൊന്നൊഴിഞ്ഞപ്പോള്‍ ഫോട്ടോയൊന്ന് എടുക്കുമോയെന്നു ചോദിച്ചു അമ്മച്ചി പോസിംഗില്‍. പുറകില്‍ ലിവളിതെന്തിനുള്ള പുറപ്പാടാ എന്ന ഭാവത്തില്‍ കെട്ടിയോന്റെ എത്തിനോട്ടം.

ഇവര്‍ ലംബാടി ഗോത്രക്കാര്‍ ഈ കടും നിറത്തിലെ വസ്ത്രങ്ങളും അതില്‍ പിടിപ്പിച്ചിട്ടുള്ള കണ്ണാടികളും ആഭരണങ്ങളും ലംബാടി സ്ത്രീകളെ മറ്റുള്ളവരില്‍ നിന്നും വ്യത്യസ്തരാക്കുന്നു. എന്നാല്‍ പുരുഷന്മാര്‍ക്ക് പ്രത്യേകതയൊന്നുമില്ലാത്ത സാധാ ഗ്രാമീണന്റെ വസ്ത്രധാരണമാണ്.

ഇത്രയും കണ്ടു ക്ഷീണിച്ചതല്ലേ ഇതിരിക്കട്ടെ.വലിയ കുട്ടയിലെ വേണമോ അതോ ചെറിയതിലെ വേണമോയെന്നു നിങ്ങള്‍ തീരുമാനിച്ചോളൂ.

പക്ഷേ എന്നെ പോലെ ആക്രാന്തം കാണിക്കരുത്. കഴിഞ്ഞ സീസണ്‍ തുടങ്ങിയപ്പോ തന്നെ ആക്രാന്തം മൂത്തു കുട്ടയോടെ വാങ്ങി വീട്ടിലെത്തി വെട്ടി വിഴുങ്ങി. കുറച്ചു ദിവസം കഴിഞ്ഞപ്പോ സീതപ്പഴത്തിന്റെ മണമടിക്കുമ്പോഴേ ആകെയൊരു വല്ലായ്മ. പിന്നെ ആ വര്‍ഷം കഴിക്കാന്‍ സാധിച്ചില്ല. അതു കൊണ്ട് പയ്യെ തിന്നാല്‍ പനയും തിന്നാം എന്ന വിചാരത്തില്‍ കഴിക്കുക.

ലവനും കുശനും

2007-10-03T09:57:00.000+05:30

അതോ നകുലനും സഹദേവനുമോ?

എറ്റവും കൂടുതല്‍ വ്യത്യാസം കണ്ടുപിടിക്കുന്നവര്‍ക്ക് സമ്മാനമുണ്ട്!
ചിത്രം വലുതാക്കി കാണാന്‍ ശ്രമിക്കണേ.

പഞ്ഞപ്പുല്ല് കൊണ്ടൊരു ചിത്രം

2007-09-24T23:42:00.000+05:30

വിനായകനിമ‍ജ്ജനത്തിന്റെ ഈയവസരത്തില്‍ എന്റെ വിനായക പൂജ ഒരു ചിത്രം ചെയ്തു കൊണ്ടാവട്ടെയെന്നു കരുതി.
അധികം ചിലവില്ലാത്തതും എന്നാല്‍ വളരെ എളുപ്പത്തിലും ഭംഗിയിലും ചെയ്യാന്‍ സാധിക്കുന്ന ഒരു പടമാണ് ഇവിടെ വിശദീകരിക്കാന്‍ പോണത്.

അതിനു ആവശ്യമുള്ള സാ‍ധനങ്ങള്‍ .

ഇവിടെ ഞാന്‍ എളുപ്പത്തിനു വേണ്ടി ഹാന്‍ഡ് മെയിഡ് പേപ്പറാണുപയോഗിച്ചിരിക്കുന്നത്. പ്ലേവുഡും ഉപയോഗിക്കാം. പേപ്പറുപയോഗിക്കുമ്പോള്‍ സാദാ പശ മതിയാവും. എന്നാല്‍ തടിയില്‍ ആണു ചെയ്യുന്നതെങ്കില്‍ ഫെവിക്കോള്‍ ഉപയോഗിക്കേണ്ടി വരും. പിന്നെ വേണ്ടതു പഞ്ഞപ്പുല്ല് അഥവാ റാഗിയാണ്. റാഗി തന്നെ വേണമെന്നില്ലാ പകരം കടുക്, മണ്ണ്, മറ്റെന്തെങ്കിലും ധാന്യങ്ങളിലെതെങ്കിലും നിങ്ങളുടെ അഭിരുചിക്കനുസരിച്ച് ഉപയോഗിക്കാം.
പശ തേച്ചു പിടിപ്പിക്കാനായി ഒരു പഴയ ബ്രഷ് കൂടെ കരുതുക. കൈ ചീത്തയാവാതിരിക്കും.
ഇഷ്ടമുള്ള ഒരു പടവും അതു പകര്‍ത്താനായി ഒരു കാര്‍ബണ്‍ പേപ്പറും. പേപ്പര്‍ ഓറഞ്ചു നിറമായതിനാല്‍ ഞാനിവിടെ വെള്ള കാര്‍ബണാണ് ഉപയോഗിച്ചിരിക്കുന്നത്.

മഷി തീര്‍ന്ന ഒരു ബോള്‍ പെനോ പെന്‍സിലോ കൊണ്ട് ചിത്രം കാര്‍ബണുപയോഗിച്ച് പേപ്പറിലേയ്ക്ക് പകര്‍ത്തുക.

പിന്നീട് ഓരോ കള്ളികളിലായി പശ തേച്ചു പിടിപ്പിക്കുക. ഇവിടെ ഫെവിക്കോളാണ് തേച്ചത്. പക്ഷേ പേപ്പറില്‍ ഫെവിക്കോള്‍ തേക്കുമ്പോള്‍ അതു തേച്ച അത്രയും ഭാഗം ഉയര്‍ന്നു വരും.

ഇനി റാഗി പശ തേച്ചതിന്റെ മുകളില്‍ വിതറുക. കുറേയധികം വിതറണം.

എന്നിട്ട് പേപ്പര്‍ ചരിച്ച് പറ്റി പിടിക്കാത്തവ കൊട്ടി കളയുക.

റാഗി മുകളില്‍ വിതറുന്നതിനു പിശുക്കു കാണിച്ചാല്‍ ഒരേ പോലെ എല്ലായിടവും വരില്ല. ആ ഭാഗം തന്നെ രണ്ടാമതു ചെയ്താല്‍ ഭംഗി കുറയും ഒരേ നിരപ്പിലും കിട്ടില്ല.

അങ്ങനെ ഒരു കള്ളി പൂര്‍ത്തിയായി. വലിയ കള്ളിയാണെങ്കില്‍ ഒരു സമയം ഒരു കള്ളിയില്‍ പശ തേച്ച് റാഗി വിതറി ചെയ്യുക. ചെറിയ കള്ളികളാണെങ്കില്‍ മൂന്നാലെണ്ണം ഒരുമിച്ചു ചെയ്യാം. പശ ഉണങ്ങുന്നതിനു മുന്നേ റാഗി വിതറിയിരിക്കണം അത്രയും ഉള്ളൂ കാര്യം.

വിതറുക...കുടയുക

വിതറുക...കുടയുക

പശ തേയ്ക്കുക...വിതറുക

ഇനി അല്പം കൂടിയെ ബാക്കിയുള്ളൂ. എന്തെളുപ്പമാണെന്നു നോക്കൂ.

ഇതാ ചിത്രം പൂര്‍ണ്ണമായി കഴിഞ്ഞു.

എങ്ങനെയുണ്ട് നമ്മുടെ വിനായകന്റെ രൂപമാറ്റം. തടിയിലാണെങ്കില്‍ ചിത്രം പൂര്‍ത്തിയായ ശേഷം ക്ലിയര്‍ വാര്‍ണീഷ് അടിക്കുന്നതു നന്നായിരിക്കും. റാഗി കേടാവാതിരിക്കും.

ഇനിയിതു ഫ്രെയിം കൂടി ചെയ്താലോ?

നിങ്ങള്‍ക്ക് ഞാനുപയോഗിച്ച അതേ ചിത്രമോ അല്ലെങ്കില്‍ വേറെയെതെങ്കിലുമോ വേണമെങ്കില്‍ ഇവിടെ ഞെക്കിക്കോളൂ
ഇവിടെയും കുറച്ച് ചിത്രങ്ങളുണ്ട്.

അലീഫ് ജിയുടെ കമന്റും കൂടി ചേര്‍ത്തു വായിച്ചാലേ ഈ പോസ്റ്റ് പൂര്‍ണ്ണമാവൂ എന്നു തോന്നുന്നു. അതിനാല്‍ അതു കൂടി ഞാന്‍ ഇവിടെ ചേര്‍ക്കുന്നു.

മണല്‍ കൊണ്ട്‌ ചെയ്യുമ്പോള്‍ ചില സൂത്രപണികള്‍ ഒക്കെയുണ്ട്‌. സാധാരണ പശയേക്കാളും നല്ലത്‌ ഫെവിക്കോള്‍ MR ആണ്‌. അത്‌ കുറച്ച്‌ എടുത്ത്‌ വെള്ളത്തില്‍ കലക്കി ഉപയോഗിച്ചാല്‍ നല്ല ഫിനിഷ്‌ കിട്ടും. മണല്‍ ഒരിക്കലും കൈകൊണ്ട്‌ വിതറരുത്‌. പ്ലാസ്റ്റിക്‌ കൊണ്ടുള്ള ചായ അരിപ്പ്‌ കൊണ്ട്‌ മെല്ലെ അരിച്ചരിച്ച്‌ ഇടുക. ഇത്‌ അത്രവലിയ പടമൊന്നുമല്ലങ്കില്‍ ഒരുമിച്ച്‌ തന്നെ ചെയ്യാം, വെള്ളത്തില്‍ കലക്കിയിരിക്കുന്നതിനാല്‍ ഫെവിക്കോള്‍ പെട്ടന്ന് ഉണങ്ങില്ല. ആദ്യത്തെ ലേയര്‍ ഇട്ട്‌ ചെറുതായി ഒന്ന് ഉണങ്ങി കഴിമ്പോഴേക്കും , മണല്‍ അപ്പാടെ തട്ടികളഞ്ഞ്‌, ഒട്ടിയിരിക്കുന്ന മണലിന്റെ പുറത്ത്‌ ഒരിക്കല്‍ കൂടി വെള്ളം- ഫെവിക്കോള്‍ ലായനി പുരട്ടുക, വീണ്ടും മണല്‍ അരിപ്പയിലൂടെ വിതറുക. ഉണങ്ങികഴിയുമ്പോള്‍ തട്ടികളഞ്ഞ്‌ വൃത്തിയാക്കിയാല്‍ ഏകദേശം ഒരേ കണക്കില്‍ മണല്‍ പറ്റിപിടിച്ചിരിക്കും. ഇനി ഈ ചിത്രങ്ങള്‍ക്ക്‌ ചിലഭാഗങ്ങളില്‍ കൂടുതല്‍ ഘനം വെപ്പിക്കണമെങ്കില്‍ ആ ഭാഗത്ത്‌ മാത്രം പശപുരട്ടി മണല്‍ അരിപ്പയിലൂടെ ഇട്ട്‌ ആവര്‍ത്തിച്ചാല്‍ മതി.
ഇനി മണലില്‍ കളര്‍ മിക്സ്‌ ചെയ്തും പല തരം പാറ്റേണ്‍ ഉണ്ടാക്കാം. ഇതിനു മണല്‍ അരിച്ചത്‌ പോസ്റ്റര്‍ കളറുമായി ചേര്‍ത്ത്‌ ഉണക്കിയെടുക്കുക. ചെറിയ നനവോടെ ചീത്തയായ അലൂമിനിയം പാത്രത്തിലോ മറ്റോ ഇട്ട്‌ വറുത്ത്‌ എടുത്താല്‍ കളര്‍ ഇളകി പോകുകയില്ല. ഈ മണലും ചിത്രത്തിനുപയോഗിക്കുമ്പോള്‍ അരിപ്പയിലൂടെ തന്നെ വീഴ്ത്തുക.

മണല്‍, കടകളില്‍ പലനിറങ്ങളില്‍ കിട്ടുന്ന 'ഫ്ലേക്സ്‌' (ഇത്‌ സ്ക്രീന്‍ പ്രിന്റിങ്ങിനു ഉപയോഗിക്കുന്നതാണ്‌) തുടങ്ങിയവ ഉപയോഗിക്കാം. ധാന്യങ്ങള്‍ ഉപയോഗിക്കുമ്പോള്‍ ഉറുമ്പ്‌ കേറുവാന്‍ സാധ്യതയുണ്ട്‌, അതിനു വാര്‍ണിഷ്‌ അടിച്ചാല്‍ മതി, അത്‌ നിറം ഇല്ലാത്ത (ക്ലിയര്‍) matt വാര്‍ണിഷ്‌ ആയാല്‍ നന്നായിരിക്കും.

കരകൗശല വിദ്യകള്‍ ഇനിയും പോരട്ടെ..

ആശംസകളോടെ
-അലിഫ്‌

തുമ്പിപടങ്ങള്‍ -ഭാഗം ഒന്ന്

2007-09-21T14:59:00.000+05:30

ചില ജീവികളെ വളരെയടുത്തു കാണുമ്പോഴേ അതിന്റെ യഥാര്‍ത്ഥ ഭംഗിയറിയൂ.
ഈ തുമ്പിയെ തന്നെ നോക്കൂ. ദൂരെ നിന്നും കാണുമ്പോ വെറും കറുമ്പന്‍ പക്ഷേ അടുത്തു കണ്ടപ്പോഴല്ലേ ഇത്രയും സുന്ദരന്‍ ആണെന്നു മനസ്സിലായേ.

സൂര്യന്‍ അവന്റെ ചിറകില്‍ തീര്‍ത്ത മായാജാലം നോക്കൂ.

കണ്ടാല്‍ പാവം എന്നാല്‍ ഇവന്‍ മാംസഭോജിയാണ്. കൊതുകിനെ പിടിക്കാന്‍ ബഹുസമര്‍ത്ഥന്‍.

ഞാന്‍ ഇവന്‍ എന്നു പറയുന്നതു കേട്ടു സംശയിക്കേണ്ട ഇവന്‍ ആണു തന്നെ. പെണ്‍‌വര്‍ഗ്ഗത്തിലുള്ളവര്‍ക്ക് അല്പം നിറവ്യത്യാസമുണ്ട്. താഴോട്ടു നോക്കൂ.

ഇതാ തുമ്പി പെണ്‍കൊടി

ഇവര്‍ Pied Paddy Skimmer എന്നറിയപ്പെടുന്നു.

തുമ്പിയെന്നല്ലാതെ ഇവരുടെ മലയാളത്തിലെ വിളിപേരു എനിക്കറിയില്ല. ഇതിന്റെ ശാസ്ത്രീയനാമം Neurothemis tullia

പെണ്‍കൊടി വെയിലു കാഞ്ഞങ്ങനിരിക്കട്ടെ. നമുക്ക് മറ്റൊരാളെ കൂടെ കാണാം. താഴെ കാണുന്നത് ഓണത്തുമ്പി(Rhyothemis variegata).

ഇത് ആണ്‍‌വര്‍ഗ്ഗത്തില്‍ പെട്ട തുമ്പിയാണ്. മുകളില്‍ കണ്ടവരെ പോലെ പെണ്‍‌വര്‍ഗ്ഗത്തിലുള്ളവരുടെ ചിറകുകള്‍ക്ക് നിറവ്യത്യാസമുണ്ട്. പക്ഷേ ഇവന്റെ ഗേള്‍ഫ്രണ്ട്സിനെ ഒന്നിനെപോലും കണ്ടുകിട്ടിയില്ല.

(തുടരണമെന്നു വിചാരിക്കുന്നു)
സാധിക്കുമെങ്കില്‍ ഫോട്ടോകള്‍ വലുതാക്കി കാണാന്‍ ശ്രമിക്കണേ.

ചേര്‍ത്തു വായിക്കാന്‍

വിഷ്ണുപ്രസാദിന്റെ തുമ്പികള്‍
തുമ്പിക്കാലം

ഗ്ലാസ് പെയിന്റിംഗ് വിത്ത് വിറയല്‍ ഇഫക്ട്

2007-09-12T16:21:00.000+05:30

ആവശ്യമുള്ള സാധനങ്ങള്‍

ഒരു പാറ്റേണ്‍
പാറ്റേണിന്റെ അളവില്‍ മുറിച്ച ഗ്ലാസ് (etched or plain)
ഗ്ലാസ് കളറുകള്‍ (വാട്ടര്‍ ബേസ്ഡ് അല്ലെങ്കില്‍ സോള്‍വന്റ് ബേസ്ഡ്)
ഗ്ലാസ് ലൈനര്‍

ഞാന്‍ ചെയ്തിരിക്കുന്ന പോലെ തന്നെ വേണമെങ്കില്‍ എറ്റവും അത്യാവശ്യമായി വേണ്ട സംഗതി- കൈയ്ക്ക് വിറയല്‍

പാറ്റേണിനു മുകളിലായി ഗ്ലാസ് വെയ്ക്കുക.

ഗ്ലാസ് ലൈനര്‍ കൊണ്ട് ഗ്ലാസില്‍ ചിത്രം വരയ്ക്കുക.(ഇവിടെ ലേശം വിറയല്‍ ആഡ് ചെയ്യാം. എന്നെ പോലെ ആദ്യമായി ലൈനര്‍ ഉപയോഗിക്കുന്നവരാണെങ്കില്‍ ആഡ് ചെയ്യേണ്ട കാര്യം മിക്കവാറും വരൂല്ലാ അതു തനിയെ സ്വാഭാവികമായി എത്തിക്കോളും.)

ചിത്രം പൂര്‍ണ്ണമായും ഗ്ലാസില്‍ പകര്‍ത്തിയ ശേഷം അരദിവസം അതിനെ ഉണങ്ങാനായി വിടുക.

ഔട്ട് ലൈന്‍ പൂര്‍ണ്ണമായി ഉണങ്ങിയ ശേഷം ഗ്ലാസ് പെയിന്റ് മുകളില്‍ നിന്നും ഒരോ കള്ളിയിലും എതു നിറമാണോ വേണ്ടത് അതു കൊണ്ട് ഫില്ല് ചെയ്തു വരിക. ബോട്ടില്‍ നിന്നും നേരിട്ടോ അല്ലെങ്കില്‍ ബ്രഷ് ഉപയോഗിച്ചോ ചെയ്യുക. ശ്രദ്ധിക്കേണ്ട ഒരു കാര്യം കുമിളകള്‍ വരാതിരിക്കയാണ്. ബോട്ടില്‍ അധികം കുലുക്കാതിരിക്കുക.
കുമിളകള്‍ അഥവാ വന്നു പോയാല്‍ അത് ഒരു പിന്‍ ഉപയോഗിച്ച് കുത്തി പൊട്ടിക്കുക. അല്ലെങ്കില്‍ ഉണങ്ങി കഴിയുമ്പോ അവിടെ ഗ്യാപ്പ് വരും.

ചിത്രം പൂര്‍ണ്ണമായ ശേഷം വീണ്ടും ഒരു ദിവസം ഉണങ്ങാന്‍ വിടുക. നന്നായി ഉണങ്ങിയ ശേഷം ഫ്രയിം ചെയ്യാം.

ഇവിടെ എനിക്ക് പറ്റിയ തെറ്റുകള്‍ നിങ്ങള്‍ക്ക് പറ്റാതിരിക്കാന്‍ ചില കാര്യങ്ങള്‍ പറയട്ടെ.
1. ഗ്ലാസില്‍ വരയ്ക്കുന്നതിനു മുന്‍പ് ലൈനര്‍ കൊണ്ടു ഒരു പേപ്പറില്‍ വരച്ചു പ്രാക്ടീസ് ചെയ്യുക. നന്നായി വന്ന ശേഷം മാത്രം ഗ്ലാസില്‍ കൈ വെയ്ക്കുക.
2. കളര്‍ കോമ്പിനേഷന്‍ - തുടങ്ങുന്നതിനു മുന്‍പ് നന്നായി അലോചിച്ച് ചെയ്യുക. അല്ലെങ്കില്‍ ചിത്രം അവസാനം മുകളില്‍ കാണുന്നതു പോലിരിക്കും.

ഒരു റിവേഴ്സ് ഗ്ലാസ് പെയിന്റിംഗ് .പ്രശസ്ത ചിത്രകാരന്‍ ബാപ്പുവിന്റെ ഒരു പെയിന്റിംഗ് പകര്‍ത്തി ചെയ്തതാണ്.
പണ്ടൊരിക്കല്‍ കരിം മാഷിന്റെ ഗ്ലാസ് പെയിന്റിംഗിന്റെ പോസ്റ്റില്‍ കമന്റില്‍ ഇട്ടിരുന്നതാണ്. ഇതും കൂടി ഇവിടെ കിടക്കട്ടെ.

താഴെയുള്ള ലിങ്കുകളില്‍ നിന്നും നിങ്ങള്‍ക്ക് പാറ്റേണുകള്‍ ഫ്രീയായി ഡൌണ്‍ലോഡ് ചെയ്യാവുന്നതാണ്.
1.pannedexpressions
2.oaktreesg
3.chantalstainedglass
4.downeaststainedglass ഇവിടെ സൌജന്യമായി പാറ്റേണുകള്‍ ഉള്ള വെബ്‌സൈറ്റുകളുടെ ഒരു നീണ്ട ലിസ്റ്റ് തന്നെയുണ്ട്.
5.glasspatterns സ്റ്റേന്‍ ഗ്ലാസ് പെയിന്റിംഗില്‍ ഒരു കൈ നോക്കാന്‍ താല്പര്യമുള്ളവര്‍ക്കായി ഫോട്ടോ സഹിതം ഇവിടെ വിവരിച്ചിട്ടുണ്ട്.

N.B:- പെയിന്റിംഗ് അറിയാവുന്നവര്‍ എന്റെയീ അവിവേകം ദയവായി ക്ഷമിക്കുമാറാവണം.

ജീവിതചക്രം

2007-09-06T09:05:00.000+05:30

ഞങ്ങളുടെ അമ്മ എന്തു അടുക്കും ചിട്ടയിലുമാണ് ഞങ്ങളെ ഇവിടെ ഒട്ടിച്ചു വെച്ചിരിക്കുന്നതെന്നു നോക്കൂ.ഈ പുറം‌ലോകത്തിലേയ്ക്ക് കാലെടുത്തു കുത്തിയതേയുള്ളൂ പക്ഷേ എന്താ വിശപ്പ്.

ഞങ്ങളിങ്ങനെ കൂട്ടം ചേര്‍ന്ന് ഓരോ ഇലയേയും ആക്രമിച്ച് അങ്ങനെ മുന്നേറുകയാണ്. വേഗം വലുതായാല്ലല്ലേ അമ്മയെ പോലെയാവാന്‍ പറ്റൂ.ഞാനിതിനുള്ളില്‍ തപസ്സിരിക്കയാ ചിറകു മുളയ്ക്കാന്‍.
ഇപ്പോ എന്നെ നോക്കൂ ഈ ചിറകും തേനുമുള്ളപ്പോ ആര്‍ക്കു വേണം ഇല. വേഗം വലിച്ചു കുടിക്കട്ടെ എന്തു രുചിയാ ഇതിന്.എന്തോരം പൂക്കളാ! വയറു നിറച്ചു തേനും കുടിച്ചിങ്ങനെ പാറി നടക്കാന്‍ എന്തു രസാ.

ഓ ഞാനിതു വരെ എന്റെ പേരു പറഞ്ഞില്ലല്ലേ എന്നെ മലയാളികള്‍ മഞ്ഞപാപ്പാത്തിയെന്നു വിളിക്കും. എന്റെ ഇംഗ്ലീഷിലുള്ള പേരു three-spot grass yellow. എന്റെ സ്ക്കൂളിലെ പേരു Eurema blanda. ഞങ്ങളുടെ കുടുംബപേരു Pieridae. പേരു കേട്ട കുടുംബക്കാരാ.

ഈ പോസ്റ്റില്‍ പുഴുക്കളുടെ കാര്യത്തില്‍ കുറച്ച് പിഴവുകള്‍ വന്നതിനാല്‍ ഈ പടങ്ങള്‍ താഴേക്ക് നീങ്ങുന്നു. താഴെ ചിത്രത്തില്‍ കാണുന്ന പുഴുക്കളും ഈ ശലഭവും തമ്മില്‍ ഒരു ബന്ധവുമില്ല.

ഞാന്‍ കൂട്ടുകെട്ടൊക്കെ വിട്ടു ഇപ്പോ ഒറ്റയ്ക്കാ സഞ്ചാരം! എന്നെ ഇപ്പോ കണ്ടാല്‍ നെറ്റിപ്പട്ടം കെട്ടിയൊരു ആനയുടെ ചന്തമില്ലേ?
എന്റെ രുപമിങ്ങനെ മാറി കൊണ്ടേയിരിക്കും. ഇപ്പോ ഞാന്‍ വെളുത്തു തുടുത്തു സുന്ദരനായില്ലേ?

ഇലയില്‍ പിടിച്ചു വലിക്കുന്നോ? നിന്നെ ഞാന്‍...
പേടിച്ചു പോയോ? ഇതൊക്കെ എന്റെ ചില നമ്പറല്ലേ

ഞാനൊരു പാവമാണേ എന്നെയിങ്ങനെ സൂക്ഷിച്ചു നോക്കല്ലേ പ്ലീസ്. എനിക്കു പേടിയാവുന്നു!

N.B:-ഈ ജീവിതചക്രത്തില്‍ എവിടെയെങ്കിലും എനിക്ക് പിഴവ് പറ്റിയിട്ടുണ്ടെങ്കില്‍ തിരുത്തി തരാന്‍ അപേക്ഷ.

കല്യാണവിശേഷങ്ങള്‍

2007-06-21T12:55:00.000+05:30

ചെക്കനേയും കാത്ത്

ചെക്കനെ ഇതുവരെ കാണുന്നില്ലല്ലോ...ബന്ധുക്കളെല്ലാമെത്തി പെണ്ണാണെങ്കില്‍ മണ്ഡപത്തില്‍ കയറി നില്പ് തുടങ്ങീട്ട് മണിക്കൂറ് പലതായി.

എന്റെ മോളൂടെ കല്യാണം മുടങ്ങിയാല്‍ ഞാനെങ്ങനെ നാട്ടാരുടെ മുഖത്തു നോക്കും ങീ...ഹീ...

ചേച്ചിയേ വിഷമിക്കാതെ ചെക്കന്‍ വൈകിയാണെങ്കിലും എത്തുമായിരിക്കുമെന്നേ

ദാണ്ടേ ചെക്കന്‍ എത്തിപ്പോയ്

അങ്ങനെ മുകളിരിക്കുന്ന കാര്‍മികന്റെ മേല്‍നോട്ടത്തില്‍ ചടങ്ങുകള്‍ എല്ലാം ഭംഗിയായി അവസാനിച്ചു. പക്ഷേ പെട്ടെന്നല്ലേ നവദമ്പതികളുടെ ഭാവം മാറിയേ.

സദ്യയൊക്കെ കഴിഞ്ഞല്ലോ ഇനി എല്ലാരുമൊന്നു പോയ്‌തരാമോ? ഫോട്ടോഗ്രാഫര്‍ വേണമെങ്കില്‍ അല്പസമയം നിന്നോളൂട്ടോ

രണ്ടു പേരുമൊന്ന് നേരെ നോക്കിക്കേ...ആ...അങ്ങനെ തന്നെ

ഇനി ഒന്നു തല ചെരിച്ചേ...കൊള്ളാം കൊള്ളാം

ഇനിയുമധികനേരം അവിടെ ചുറ്റി കറങ്ങിയാല്‍‍ എന്നെയും പറപ്പിക്കുമെന്നു തോന്നിയതിനാല്‍ അവരെ അവരുടെ ലോകത്ത് തനിച്ചാക്കി തിരികെ പോന്നു.

കള്ളനെ പുടിച്ചാച്ച്

2007-06-13T15:25:00.000+05:30

മാതളത്തിന്റെ പോസ്റ്റില്‍ മാതളവും ഞാന്‍ വാങ്ങി വെച്ചിരുന്ന കോഴിമുട്ടയും കിളിക്കൂട്ടില്‍ ഉണ്ടായിരുന്ന കിളിമുട്ടയും കട്ടു തിന്ന ഒരു കള്ളനെ കുറിച്ചു പറഞ്ഞിരുന്നു. അവസാനം കള്ളനെ കൈയ്യോടെ പിടിച്ചു.

ഒരു ദിവസം രാവിലെ കൊക്ക് ഒരു പ്രത്യേകശബ്ദമുണ്ടാക്കുന്നതു ശ്രദ്ധയില്‍ പെട്ടു.ഇതുവരെ അത്തരത്തില്‍ ശബ്ദമുണ്ടാക്കി ഞാന്‍ കേട്ടിട്ടുണ്ടായിരുന്നില്ല. ജനലില്‍ കൂടി നോക്കിയിട്ട് ഒന്നും കണ്ടില്ല. എന്നാലൊന്ന് ബാല്‍ക്കണിയില്‍ ചെന്നു നോക്കാമെന്നു കരുതി ചെന്നപ്പോ കിളികൂടിനടുത്തു തന്നെ ഒരു വിദ്വാന്‍. അതിലെ കുഞ്ഞുങ്ങള്‍ വിരിഞ്ഞിട്ട് അല്പദിവസമേ ആയിരുന്നുള്ളു അതുങ്ങള്‍ പേടിച്ച് വിറച്ച് അനങ്ങാതെയിരിക്കുന്നു. അച്ഛന്‍ കൊക്കുകളും അമ്മകൊക്കുകളും(2 കൂടുകളുണ്ടതില്‍) കൂടിനടുത്തു വരാതെ ശബ്ദമുണ്ടാക്കി കൊണ്ടിരിക്കുന്നു. കൂട്ടിനു അണ്ണാറക്കണ്ണന്മാരും കാക്കകളും ഉണ്ട് ഒച്ചവെയ്ക്കാന്‍. പഴയ കിളിമുട്ടയുടെ ഓര്‍മ്മയിലുള്ള വരവാണ് കുരങ്ങന്റെത്.

ആകെപ്പാടെ ഒരു കള്ളലക്ഷണമവനു. കുഞ്ഞുങ്ങളെ ഉപദ്രവിക്കുമോയെന്നു പേടിയായെനിക്ക്. അതിനെ ആ കൂട്ടിനടുത്തു നിന്നും ഓടിക്കാന്‍ ഞാന്‍ ഒരു പഴയ ഷൂവെടുത്തു ദിപ്പം നിന്നെ എറിയും എന്ന രീതിയില്‍ കുറച്ചു ആക്ഷന്‍സ് നടത്തി. അവന്‍ പതുക്കെ ഇരിന്നിടത്തുന്ന് താഴേയ്ക്കിറങ്ങി. ബാല്‍ക്കണിയിലേയ്ക്ക് ചാടാനുള്ള ഭാവമാണോയെന്നു പേടിച്ച് ഞാന്‍ ഓടാന്‍ റെഡിയായി വാതിലില്‍ ഒരു കൈ പിടിച്ച് കുറച്ചു ഫോട്ടോസ് എടുത്തു. വിറച്ചു എടുത്തത് കൊണ്ട് ഒന്നും നേരാവണ്ണം കിട്ടിയില്ല.മാത്രമല്ല അന്നേരം ഫോട്ടേയെക്കാള്‍ അതിനെ അവിടുന്ന് ഓടിക്കുക എന്നതായിരുന്നു മനസ്സില്‍. കുരങ്ങന്‍ പതുക്കെ മരത്തില്‍ നിന്നും ഇറങ്ങി ബില്‍ഡിംഗിന്റെ പുറകുവശത്തേയ്ക്ക് പോയി. അവിടുത്തെ കിളികളുടെ ശബ്ദം കുറച്ചു നേരം കേട്ടു. പിന്നെയെല്ലാം ശാന്തമായി. പിന്നെയും കുറേ നേരം വേണ്ടി വന്നു ആ കിളികള്‍ തിരികെ കൂട്ടിലെത്താന്‍.

പിന്നെ ഈ കിളികളും അണ്ണാറക്കണ്ണനുമെല്ലാം ഇങ്ങനെ ഒച്ചയുണ്ടാക്കുമ്പോ ഞാന്‍ പോയി നോക്കാറുണ്ട്. എന്റെ കുട്ടിക്കാലത്ത് കാക്കകള്‍ ഇങ്ങനെ ശബ്ദമുണ്ടാക്കി മൂര്‍ഖന്‍‌കുഞ്ഞിനെ കാണിച്ചു തന്നിട്ടുണ്ട്. ഇന്നലെയേയും കേട്ടു ഇതു പോലെ കോലാഹലം ഇപ്രാവശ്യം മൈനയും കുയിലും അണ്ണാനുമാണ് കൂടുതല്‍ ഒച്ച വെച്ചത്. മരത്തിന്റെ മുകളിലും താഴെയുമൊക്കെ നോക്കിയിട്ട് ഒന്നു കണ്ടില്ല. പിന്നെ സണ്‍ഷെയ്ഡില്‍ നോക്കിയപ്പോ ഒരു സുന്ദരന്‍ പൂച്ച.

എന്താ ക്ഷീണം ഒന്നുറങ്ങട്ടെ

ഇതുങ്ങടെ ചിലയ്ക്കലു കാരണം ഒന്നു സ്വസ്ഥമായി ഉറങ്ങാന്‍ സാധിക്കുന്നില്ലല്ലോ.

ഒരു കുരങ്ങന്‍ മുട്ട കട്ടു തിന്നുന്നുവെച്ച് എന്നെ പോലുള്ള നിരപരാധികളേയും സംശയിക്കുന്നതു ശരിയാണോ?

ഇനി പാക്കറ്റ് പാല്‍ രാവിലെ എതോ ഒരുത്തന്‍ അടിച്ചോണ്ടു പോണതും എന്റെ തലയില്‍ കെട്ടിവെയ്ക്കാന്‍ പോവുവാണോ?

ചേച്ചി പോയാട്ടേ... സത്യം പറയാല്ലോ ആ ചക്കി പൂച്ച ഇവിടെ വരാന്നു പറഞ്ഞിട്ടു വന്നതാ. ഞങ്ങളു ഭയങ്കര ലൌവാ.

N.B:- ഇതെല്ലാം ഇവന്‍ എന്നോടു തെലുങ്കില്‍ പറഞ്ഞ കാര്യങ്ങളാ. തെലുങ്കിലെഴുതിയാല്‍ നിങ്ങള്‍ക്ക് മനസ്സിലാവാത്തതു കൊണ്ടു മലയാളത്തില്‍ പരിഭാഷപ്പെടുത്തിയെന്നു മാത്രം.

കപ്പലണ്ടിയേ...കടലേയ്...

2007-06-09T17:40:00.001+05:30

വഴിയോരകാഴ്ചകള്‍ ഒന്നാം ഭാഗം

ഇവിടെ വഴിയോരത്ത് സര്‍വ്വസാധാരണമായി കാണുന്ന ചില കാഴ്ചകള്‍ ഇതാ നിങ്ങള്‍ക്കായി

ഒരു ചാറ്റ്വാലാ. സഞ്ചരിക്കുന്ന ഭക്ഷണശാലയാണ് അദ്ദേഹത്തിന്റെ തലയില്‍.

തന്റെ കച്ചവടസ്ഥാപനം വഴിയില്‍ വെച്ച് ഉറങ്ങി പോയ ഒരു കച്ചവടക്കാരനെ മുകളില്‍ കാണാം.

ഇവിടെ വിഭവങ്ങള്‍ വ്യക്തമായി കാണാം. എന്തു ഭംഗിയായി അലങ്കരിച്ചു വെച്ചിരിക്കുന്നതെന്നു നോക്കൂ. ഓര്‍ഡര്‍ കൊടുത്താല്‍ നിമിഷനേരത്തിനുള്ളില്‍ സാധനം റെഡി.ഒരു കടലാസ് കുമ്പിളില്‍ കടലയോ പൊരിയോ ഇടുക അല്പം സവാള വിതറുക ഉപ്പും മുളകുപൊടിയും കൂടി മിക്സു ചെയ്ത ഒരു കുപ്പി ഉണ്ടാവും കൈയ്യില്‍ അത് ഒന്നു കുടയുക നാരങ്ങാനീര് അല്പം ഇറ്റിക്കുക എന്നിട്ട ആ കടലാസ് കുമ്പിള്‍ ഒന്നു കുലുക്കി കൈയ്യിലേയ്ക്ക് തരും. എന്താ രസം!

നമ്മുടെ നാട്ടിലെ പോലെ വറുത്ത കപ്പലണ്ടിയും പട്ടാണിയും കിട്ടും കേട്ടോ. എങ്കിലും എനിക്ക് വറുത്ത കപ്പലണ്ടിയേക്കാള്‍ ഇഷ്ടം പുഴുങ്ങിയ കപ്പലണ്ടിയാണ്.

ഒരു കപ്പലണ്ടി വില്പനക്കാരന്‍. അനുവാദത്തോടു കൂടിയാട്ടോ ഫോട്ടോയെടുത്തത്. ഫോട്ടോയെടുത്തോട്ടേയെന്നു ചോദിച്ചപ്പോ ആ ചേട്ടനു വല്യസന്തോഷം.

തൊണ്ടോടു കൂടി കപ്പലണ്ടി പുഴുങ്ങുന്നത്. അതിങ്ങനെ തിളച്ചുകൊണ്ടേയിരിക്കും.

തിളച്ച വെള്ളത്തില്‍ നിന്നും വാരി ചൂടോടെ കുമ്പിളിലാക്കി തരും.

വേറെയെങ്ങും വെച്ചെടുക്കാന്‍ സ്ഥലമിഞ്ഞതു കൊണ്ട് ഒരു കപ്പലണ്ടി തൊണ്ടു പൊളിച്ചു മടിയില്‍ വെച്ചെടുത്തത്.

വഴിയരികിലെ ഭക്ഷണം സാധാരണ കഴിക്കാറില്ലാത്ത എന്നെ എന്റെ തെലുങ്ക് കൂട്ടുകാരി ഒരിക്കല്‍ പുഴുങ്ങിയ കപ്പലണ്ടി വാങ്ങിച്ചു നിര്‍ബന്ധിച്ചു കഴിപ്പിച്ചു. അതിനു ശേഷം ഞാനതിന്റെ ആരാധികയായി മാറി പോയി.ഇതാ നിങ്ങള്‍ക്കായി അതിന്റെ റെസിപ്പീ.

കപ്പലണ്ടി തോട്ടത്തില്‍ നിന്നും പറിച്ച ഉടനെ കിട്ടുകയാണെങ്കില്‍ നേരിട്ട് വെള്ളത്തിലിട്ട് പുഴുങ്ങിയെടുക്കുക. അല്ല ഉണക്ക കപ്പലണ്ടിയാണെങ്കില്‍ തൊണ്ടില്ലാത്തത് ഒരു രാത്രി മുഴുവന്‍ വെള്ളത്തില്‍ കുതിര്‍ത്തു വെയ്ക്കുക. വെള്ളമൂറ്റി ഒരു ദിവസം കൂടി വെയ്ക്കാന്‍ ക്ഷമയുണ്ടെങ്കില്‍ മുള വരും ഗുണം കൂടും. അത് 5-10 മിനിറ്റ് ഇഡ്ഢലി കുട്ടകത്തില്‍ ആവി കേറ്റുക.(ആവി കേറ്റുമ്പോള്‍ ബഹിര്‍ഗമിക്കുന്ന മണം എന്റെ ഒരു വീക്ക്നെസാ)
ഇനി അതില്‍ അല്പം മുളകുപൊടി, ഉപ്പ്, മല്ലിയില, നാരങ്ങാനീര് എന്നിവ നിങ്ങളുടെ രുചിക്കനുസരിച്ച് ചേര്‍ത്തിളക്കുക.
കഴിക്കാന്‍ റെഡി!

തൊണ്ടില്ലാത്ത കപ്പലണ്ടി ഇത്തരത്തില്‍ ഉണ്ടാക്കി വില്‍ക്കുന്നതിന്റെ പടം കിട്ടിയില്ല. എപ്പോഴെങ്കിലും പിടികിട്ടും അന്നേരം പോസ്റ്റ് ചെയ്യാട്ടോ.

മഴയുള്ള ഒരു ദിവസം വീട്ടില്‍ ചടഞ്ഞുകൂടി ഇരിക്കുമ്പോള്‍ ഇത് ഉണ്ടാക്കി ചൂടോടെ മഴയും ആസ്വദിച്ചൊന്നു കഴിച്ചു നോക്കൂ. തീര്‍ച്ചയായും നിങ്ങള്‍ക്ക് ഇഷ്ടപ്പെടും.