ബട്ടർഫ്ലൈ സ്റ്റഡി

കഴിഞ്ഞ ഞായറാഴ്ച ഹൈദ്രാബാദിലെ ബട്ടർഫ്ലൈ കൺസർവേഷൻ സൊസൈറ്റിയുടെ ആഭിമുഖ്യത്തിൽ സഞ്ജീവയ്യാ പാർക്കിൽ നടന്ന ബട്ടർഫ്ലൈ സ്റ്റഡിയിൽ പങ്കെടുക്കാൻ എനിക്ക് അവസരം കിട്ടിയിരുന്നു. മൊത്തത്തിൽ 30 പേരോളം സംഘത്തിലുണ്ടായിരുന്നു. സംഘാംഗങ്ങളെല്ലാം കൂടി ചിത്രശലഭങ്ങളെ കണ്ടു പഠിക്കാൻ പാർക്കിന്റെ ഒരറ്റത്തൂന്ന് യാത്ര തുടങ്ങി. ഞാൻ ആദ്യമായായിരുന്നു ഈ പാർക്കിൽ വരുന്നത്. ഇത്തിരി നടന്നപ്പോ ഒരു ഗുൽ‌മോഹറിനടുത്തായി നമ്മുടെ കണിക്കൊന്ന അങ്ങനെ പൂത്തുലഞ്ഞു നിൽക്കുന്നു. വിഷുവിനു മുന്നേയായി ഒസ്‌മാനിയ യൂണിവേഴ്‌സിറ്റിയുടെ ക്യാപസിൽ ഒരു കണിക്കൊന്ന മരം പൂത്തു നിൽക്കുന്നത് കണ്ടിരുന്നു. പടം എടുക്കാനായി അടുത്ത ദിവസം ക്യാമറയും താങ്ങി അവിടെ ചെന്നപ്പോ ബാറ്ററി കാലി. അതു കൊണ്ട് ഈ അവസരം വിട്ടുകളയരുതെന്നു കരുതി ആദ്യം തന്നെ കണിക്കൊന്ന ചിത്രം പെട്ടിയിലാക്കി.


ആ സമയം കൊണ്ട് സംഘത്തിലെ എല്ലാവരും വളരെ മുന്നേയായി പോയി. അവരുടെ പുറകേ വെച്ചു പിടിക്കുന്നതിനിടയിലാണ് ഇദ്ദേഹമിങ്ങനെ ആരുടെയും ശ്രദ്ധയിൽ പെടാതെ കാറ്റും കൊണ്ടിരിക്കുന്നത് കണ്ടത്.
അടുത്തു ചെന്നിട്ടും യാതൊരു കൂസലുമില്ല.


നല്ല കാറ്റ് അതിരിക്കുന്നിടത്തേക്ക് ഹുസൈൻ‌സാഗർ തടാകത്തിൽ നിന്നും വീശുന്നതു കാരണം ആൾക്ക് ചിറക് തുറക്കാൻ വല്ലാത്ത മടിയായിരുന്നു. കാറ്റിത്തിരി കുറയുമ്പോ ലേശമൊന്നു തുറക്കും. വീണ്ടും അടച്ചിരിപ്പാവും.

എന്റെ കൂടെ ഹിന്ദുപത്രത്തിലെ നഗരഗോപാൽ (അതോ നാഗരഗോപാൽ എന്നായിരുന്നോ ആവോ? എന്തായാലും ഗോപാലുണ്ടെന്ന് ഉറപ്പാണ്. എന്തരേലുമാവട്ടല്ലേ) എന്ന ഫോട്ടോഗ്രാഫറുമുണ്ടായിരുന്നു.കുറച്ചു കഴിഞ്ഞിട്ടും ശലഭത്തിന് അനക്കമില്ലാതായപ്പോ രണ്ടാൾക്കും സംശയമായി.ഇനി ഇതിനു സുഖമില്ലേ എന്നൊക്കെ ഞങ്ങൾ ചർച്ച ചെയ്‌തോണ്ടിരിക്കുന്നതിനിടെ പെട്ടെന്ന് എവിടുന്നോ മറ്റൊരു ചിത്രശലഭം വന്നതും ഇത് അതിന്റെ പുറകെ ചുറ്റിചുറ്റി ഒറ്റ പറക്കൽ!


ഇതിന്റെ പേര് പ്ലെയിൻ ടൈഗർ. ആഫ്രിക്കൻ മനാർക്ക് എന്നും ഇവനു പേരുണ്ട്.
Scientific Name - Danaus chrysippus. വിക്കിയിൽ കൂടുതൽ വിവരങ്ങൾ വായിക്കാം.
മലയാളം പേര് അറിയില്ല.

ചിത്രശലഭത്തിന്റെ പടമൊക്കെ പിടിച്ചു നിവർന്നപ്പോ സംഘാംഗങ്ങളുടെയും കൂടെ വന്ന ഭർത്താവിന്റെയും പൊടിപോലുമില്ല കണ്ടുപിടിക്കാൻ. പിന്നെ സ്വന്തമായി തന്നെ സ്റ്റഡി നടത്തി കളയാമെന്നു കരുതി നടപ്പു തുടർന്നു. ചെറിയതരം പരുന്താണെന്നാണ് ഈ പക്ഷിയെ കണ്ടപ്പോൾ ആദ്യം ഞാൻ കരുതിയത്. പക്ഷേ കൊക്കു പരുന്തിന്റെ പോലെയല്ല.
ഈ പക്ഷിയുടെ പേരെന്താന്ന് ആർക്കെങ്കിലും അറിയാമെങ്കിൽ ദയവു ചെയ്‌തു പറഞ്ഞു തന്നാൽ ഉപകാരമായേനേ.

Update (29/04/09) :- ഇത് Common Hawk-Cuckoo(Hierococcyx varius
) Brain Fever Bird എന്ന പേരിലും ഇത് അറിയപ്പെടുന്നു.
കൂടുതൽ വിവരങ്ങൾ വിക്കിയിൽ.

പക്ഷിയുടെ പുറകെ നടന്നു കൊണ്ടിരിക്കുന്നതിനിടെ പാർക്കിൽ നാഗലിംഗമരം കണ്ടൂന്നും പറഞ്ഞ് സതീശേട്ടൻ(ആരോ എന്നെ മുൻപത്തെ ഒരു പോസ്റ്റിൽ സതീഷ് എന്നു എഴുതിയതിനു ഗുണദോഷിച്ചിരുന്നു. അദ്ദേഹത്തിന്റെ പ്രത്യേകശ്രദ്ധയ്‌ക്ക് “ഏട്ടൻ’ ചേർത്തിട്ടുണ്ടേയ്) വിളിച്ചു. പിന്നെ അതും തപ്പി നടപ്പായി. അവസാനം അതും കണ്ടുപിടിച്ചു. അങ്ങനെ വരിവരിയായി നിൽക്കയല്ലേ ചുള്ളന്മാർ/ത്തികൾ!


ഹൈദ്രാബാദ് നഗരഹൃദയത്തിൽ ഇവരിങ്ങനെ നിരനിരയായി നിന്നിട്ട് അതറിയാതെ നമ്മൾ മഹാനന്ദി വരെ പ്രെട്രോളും കത്തിച്ചുപോയി അപൂർവ്വസുന്ദരപുസ്പം എന്നൊക്കെ പറഞ്ഞ് പണ്ട് പോസ്റ്റിട്ടത്.

ഒരു മരത്തിനു മാത്രം മറ്റെല്ലാത്തിൽ നിന്നും ഒരു പ്രത്യേകത കണ്ടു. മറ്റെല്ലാം കരിം‌പച്ചനിറത്തിൽ വലിയ ഇലകളുമായ് നിൽക്കുന്നു. അതിനിടയിൽ ഒരെണ്ണത്തിൽ മാത്രം ഇലകൾ ഇളം‌പച്ചയിലും നീളത്തിലും നിൽക്കുന്നു. ഇനി ഇലകൊഴിഞ്ഞ് പുതിയത് വന്നതാണോന്ന് അറിയില്ല അങ്ങനെ. താഴത്തെ ഫോട്ടോയിൽ ഇടതു വശത്ത്.



പൂവ് ഇതാ




ബട്ടർഫ്ലൈ സ്റ്റഡിക്കാരൊക്കെ സ്റ്റഡിയും നടത്തി വീട്ടിൽ പോവാറായെന്നു ഫോണിലൂടെയറിഞ്ഞതു കൊണ്ടും ഒറ്റയ്‌ക്കായതിന്റെ വെപ്രാളം കൊണ്ടു അധികം സമയം കളയാതെ തിരികെ തുടങ്ങിയ സ്ഥലത്തേക്ക് തിരികെയെത്തി വീട്ടിൽ പോന്നു. കായുള്ള മരവും അവിടെയുണ്ടായിരുന്നൂന്ന് വീട്ടിലെത്തി കഴിഞ്ഞാണ് അറിഞ്ഞത്. അടുത്ത പ്രാവശ്യമാവട്ടെ അതു പെട്ടിയിലാക്കണം.



സ്റ്റഡിക്കാരുടെ കൂടെ ഫോട്ടോയെടുക്കാൻ പോയവരിൽ രണ്ടാൾക്കൊഴികെ ആർക്കും ഒരു ബട്ടർഫ്ലൈ ഫോട്ടോ പോലും കിട്ടിയില്ലെന്നുള്ളതാണ് ഏറ്റവും രസം (ഇപ്പോ ശലഭങ്ങളുടെ സീസണുമല്ല അതു കൂടാതെ ഒത്തിരി പേർ സംഘത്തിലുണ്ടായിരുന്നതിനാൽ അവരുടെ ഒച്ചയും ബഹളത്തിലും ശലഭങ്ങൾ ജീവനും കൊണ്ടോടി എന്നാണ് എനിക്ക് പിന്നീട് കിട്ടിയ റിപ്പോർട്ട്). ഇനി മുതൽ ഫോട്ടൊയെടുക്കാമെന്നു പ്രതീക്ഷിച്ച് ഒരു സ്റ്റഡിഗ്രൂപ്പുകാരുടെയും കൂടെ പോവരുതെന്ന് എനിക്ക് മനസ്സിലായി. ചിത്രശലഭങ്ങളെ കുറിച്ച് കൂടുതൽ വിവരങ്ങൾ അറിയാനാണെങ്കിൽ ഇത്തരം യാത്രകൾ നന്ന്.

നാഗലിംഗപുഷ്പം

മഹാനന്ദി ക്ഷേത്രത്തിനുള്ളില്‍ വെച്ചാണ് ആദ്യായി ഈ പൂവ് കണ്ടത്. കണ്ടപ്പോഴേ അതിന്റെ ഭംഗിയില്‍ ഞാന്‍ മയങ്ങി പോയെന്നു പറയാം. അവിടെ ഒരോ കോവിലിനുള്ളിലും വിഗ്രഹത്തില്‍ ഈ പൂവ് ചാര്‍ത്തിയിരിക്കുന്നത് കണ്ടു. കണ്ണു മുഴുവന്‍ പൂവിലായിരുന്നതിനാല്‍ ശ്രീകോവിലിലെ വിഗ്രഹവും അതിനു താഴെയുള്ള ഉറവയുമൊന്നും എന്റെ കണ്ണില്‍ പെട്ടിട്ടില്ല. കൂടെയുള്ളവരൊക്കെ ദൂരെയായിട്ടും ഞാനിങ്ങനെ പൂവിലും കണ്ണും നട്ട് മന്ദം മന്ദം നടന്നു. എങ്ങനെ ഇതിന്റെ പേരറിയുമെന്നായിരുന്നു ചിന്ത മുഴുവനും. അങ്ങനെ അവസാനം ഒരു പൂജാരിയുടെ മുന്നില്‍ ചെന്നു പെട്ടു. അങ്ങേരുടെ കൈയ്യില്‍ രുദ്രാക്ഷം വില്പനയ്ക്കുണ്ട്. അതില്‍ നിന്നും രണ്ടെണ്ണം വാങ്ങി ആരും അടുത്തില്ലാത്ത തക്കം നോക്കി പൂവിന്റെ പേരു ചോദിച്ചു. നാഗപത്മേശ്വര പൂവ്‌ലു എന്നാണെന്ന് പറഞ്ഞു. അതു മാത്രമല്ല കോവിലില്‍ നിന്നും ഒരു പൂവെടുത്ത് എന്റെ കൈയ്യിലും തന്നു. അപ്പോഴത്തെ എന്റെ സന്തോഷം പറഞ്ഞറിയിക്കാന്‍ വയ്യ. ഒരു പൂവ് ചോദിച്ചിട്ട് ഒരു പൂന്തോട്ടം മുഴുവനും കിട്ടിയ സന്തോഷമായിരുന്നെനിക്ക്. അതു കൂടാതെ ആ പൂവുണ്ടാകുന്ന മരം പുറകുവശത്തുണ്ടെന്നും അതിനെ വലം വെച്ചാല്‍ നല്ലതാണെന്ന് പറഞ്ഞ് അങ്ങോട്ടേയ്ക്കുള്ള വഴിയും ചൂണ്ടി കാട്ടി.



അങ്ങനെ ആ ചെടി കാണാന്‍ കൂടെ ഉള്ളവരേയും വിളിച്ചു കൂട്ടി അങ്ങോട്ട് നടന്നു. മരത്തിലെ ഇലകളൊക്കെ പൊഴിഞ്ഞ് പുതിയ ഇലകള്‍ വരുന്നതേയുള്ളൂ. മരത്തിന്റെ തായ്തടിയില്‍ നിന്നും തന്നെയാണ് പൂക്കള്‍ വിരിയുന്നത്. അവിടെ താഴ്‌ഭാഗത്ത് പൂക്കളൊന്നും തന്നെ ഉണ്ടായിരുന്നില്ല കായ്കളും കണ്ടില്ല. പൂജയ്ക്കായി പൂക്കള്‍ പറിയ്ക്കുന്നത് കൊണ്ട് കായാവാന്‍ അവസരം കിട്ടാത്തതു കൊണ്ടാവാം. ഇതിന്റെ പൂവിന് ഹ്യദ്യമായ മണമായിരുന്നു.



വീട്ടിലെത്തി ഗൂഗിളില്‍ അല്പം അന്വേഷണം നടത്തിയപ്പോള്‍ മരത്തിന്റെ ഇംഗ്ലീഷ് പേര് cannonball tree എന്നാണെന്ന് മനസ്സിലായി. വടക്കേ അമേരിക്കയാണ് സ്വദേശം. കാഴ്ചയില്‍ പീരങ്കിയുണ്ടയോടുള്ള ഇതിന്റെ കായുടെ സാദൃശ്യമാണ് ഈ പേരു കിട്ടാന്‍ കാരണം. സംസ്ക്യതത്തില്‍ നാഗപുഷ്പമെന്നും തമിഴില്‍ നാഗലിംഗം, ഹിന്ദിയില്‍ നാഗലിംഗ, തെലുങ്കില്‍ കോടിലിംഗാലു എന്നീ പേരുകളില്‍ അറിയപ്പെടുന്നു.(പക്ഷേ നാഗപത്മേശ്വരാ/നാഗപരമേശ്വരാ എന്നൊന്നും എവിടെയും കണ്ടില്ല) പൂവിന്റെ നടുവില്‍ ശിവലിംഗാക്യതിയില്‍ ഒരു കേസരവും അതിനു ചുറ്റും ലിംഗാക്യതിയിലുള്ള നിരവധി കേസരങ്ങളും അതിനെ സംരക്ഷിക്കുന്ന വിധത്തിലെ ഭാഗത്തിന് പത്തി വിടര്‍ത്തി നില്‍ക്കുന്ന പാമ്പിന്റെ രൂപസാമ്യവുമാണ് ഈ പേരുകള്‍ക്ക് കാരണം. അതു കൊണ്ടു തന്നെ ശിവക്ഷേത്രങ്ങളില്‍ ഈ പൂവിന് പ്രത്യേക സ്ഥാനമുണ്ട്.



ഈ പൂവ് പ്രധാനമായും ചുവപ്പ്, പിങ്ക്, വെള്ള എന്നീ നിറങ്ങളില്‍ കാണപ്പെടുന്നു. പൂവിന് 6 ദളങ്ങളോട് കൂടി 5-6 സെ.മീ വലിപ്പത്തില്‍ കാണപ്പെടുന്നു. ഈ പൂവ് തേന്‍ ഉല്പാദിപ്പിക്കുന്നില്ല. ലിംഗാകൃതിയിലുള്ള കേസരങ്ങള്‍ പരാഗണത്തിനും പത്തിയുടെ ആകൃതിയിലുള്ളവ തേനീച്ചകളെ ആകര്‍ഷിക്കാനുമാണുള്ളത്. ലാര്‍വയ്ക്ക് കൊടുക്കാന്‍ വേണ്ടി പൂമ്പൊടി അന്വേഷിച്ചു പൂവിനുള്ളില്‍ കയറുന്ന തേനീച്ചയുടെ തലയിലും പുറത്തും ലിംഗാകൃതിയിലെ കേസരങ്ങള്‍ ഉരസി പൂമ്പൊടി പറ്റി പിടിക്കയും മറ്റു പൂവുകള്‍ സന്ദര്‍ശിക്കുമ്പോള്‍ അവയുടെ കേസരങ്ങളില്‍ അവ നിക്ഷേപിക്കപ്പെട്ടുമാണ് പരാഗണം നടക്കുന്നത്.



ഇതിന്റെ കായ്കള്‍ക്ക് എകദേശം തേങ്ങയുടെ വലിപ്പമുണ്ടാവും. ഇത് മൂപ്പെത്താനായി എകദേശം 12 മുതല്‍ 18 മാസം വേണ്ടി വരും.കായുടെ വലിപ്പമനുസരിച്ച് 65 മുതല്‍ 550 വരെ വിത്തുകള്‍ കാണപ്പെടുന്നു. കട്ടിയുള്ള പുറം തോടിനുള്ളില്‍ 6 അറകളിലായി മാംസളഭാഗം കാണപ്പെടുന്നു.ഉള്ളിലെ ഭാഗത്തിന് ഇളം പൊന്മാന്‍ നീല നിറമാണ്. വായുവുമായുള്ള സമ്പര്‍ക്കത്തില്‍ അതു ഇരുണ്ട നിറമായി മാറുന്നു. കോഴി, പന്നി, കുരങ്ങ് തുടങ്ങി ജീവികള്‍ ആഹരിച്ച് അവയുടെ കാഷ്ടത്തിലും മലത്തിലുമൂടെയാണ് വിത്ത് വിതരണം ചെയ്യപ്പെടുന്നത്.പൂവുകള്‍ക്ക് ഹൃദ്യമായ മണത്തിനു വീപരീതമായി കായ്ക്ക് ചീഞ്ഞ മണവുമാണുള്ളത്. ഈ മരം 35 മീറ്ററോളം പൊക്കം വെയ്ക്കുമെന്ന് പറയുന്നു.

ശാസ്ത്രീയ നാമം COUROUPITA GUIANENSIS.
കുടുംബം - Lecythidaceae

ബ്രസീല്‍ നട്ടിന്റെ വകയിലെ സഹോദരനാണിദ്ദേഹം.




എനിക്ക് പൂവിന്റെ മുഴുവനായുള്ള ഫോട്ടോസ് എടുക്കാന്‍ സാധിച്ചില്ല. ചുരുങ്ങിയ സമയം കൊണ്ടുള്ള ഒറ്റകൈ അഭ്യാസത്തിലാണ് ഇത്രയും ഫോട്ടോസ് തന്നെ ഒപ്പിച്ചത്. അതിനാല്‍ കൂടുതല്‍ ഫോട്ടോകള്‍ക്കും വിവരങ്ങള്‍ക്കുമായി താല്പര്യമുള്ളവര്‍ക്ക് ഈ ലിങ്കുകളില്‍ കൂടി പോവാം.

1.നമ്മടെ മോഹനം ചുള്ളന്‍സും ഇതിന്റെ പടങ്ങള്‍ പോസ്റ്റിയിരുന്നു. അദ്ദേഹം കമന്റിട്ട ശേഷമാണ് അതെന്റെ ശ്രദ്ധയില്‍ പെട്ടത്.

2.ഇവന്റെ കുടുംബചരിത്രവും സ്വഭാവഗുണവുമിവിടുണ്ട്

3.കൂടുതല്‍ ചിത്രങ്ങള്‍

4. എന്നെ പോലെ പൂവിന്റെ പേരും തപ്പിപ്പോയ ഒരു ആസ്ട്രേലിയക്കാരന്റെ കഥ





ഈ മരവും പൂവുമൊക്കെ കണ്ടപ്പോ ഒരാഗ്രഹം എനിക്കും. ഈ മരം ഒരെണ്ണം വെച്ചു പിടിപ്പിക്കണമെന്ന്. ആര്‍ക്കെങ്കിലും ഇതിന്റെ വിത്തുകളോ തൈകളോ എവിടെ കിട്ടുമെന്ന് അറിയാമെങ്കില്‍ ഒന്നു പറഞ്ഞു തരണേ. പിന്നെ നമ്മുടെ നാട്ടില്‍ ഈ പൂവിനെ എന്തു പേരിലാ വിളിക്കുന്നതെന്നും.

ഏല്ലാവര്‍ക്കും എന്റെ സ്നേഹം നിറഞ്ഞ വിഷുവാശംസകള്‍!

update 3rd september 2008

ബാഗ്ലൂർ ലാൽബാഗിലെ ഫ്ലവർഷോയോടു അനുബന്ധിച്ചു പ്രദർശനത്തിനു വെച്ചിരുന്ന നാഗലിംഗമരത്തിന്റെ കായ്.

യൌവനവും വാര്‍ദ്ധക്യവും

യൌവനത്തിന്റെ മിനുമിനുപ്പും വാര്‍ദ്ധക്യത്തിന്റെ ചുളിവുകളും

ദീപങ്ങള്‍...ദീപാവലി

എന്റെ അയല്‍‌വാസിയുടെ വാതില്‍പ്പടിയിലെ കോലമെഴുത്ത് ഞാനെപ്പോഴും കൌതുകത്തോടെ കണ്ടു നില്‍ക്കാറുണ്ട്. ചില വിശേഷദിവസങ്ങളില്‍ കുങ്കുമവും മഞ്ഞളും കൊണ്ട് കുറി തൊട്ടു നില്‍ക്കുമ്പോള്‍ കോലത്തിനു ഭംഗി ഒന്നു കൂടി കൂടും.

ഇന്നലെ കുറി തൊട്ട കോലത്തിനു നടുവിലേയ്ക്ക് മറ്റൊരാള്‍ കൂടിയെത്തി.

അണിഞ്ഞൊരുങ്ങിയെത്തിയ പൂത്താലം കൂടിയായപ്പോ...

ആകെപ്പാടെ ഒരു പൂരത്തിന്റെ മട്ട്.

വാതില്‍പ്പടിക്കിരുവശവും കത്തിച്ചു വെച്ച ചിരാതുകളും നടുവിലെ പൂത്താലവും കോലവും ഒക്കെ ചേര്‍ന്ന ഒരു തെലുങ്ക് ഭവനം.

ഇന്നലെ എന്റെ വീടിനു മുന്നിലും തെളിഞ്ഞു

ഒരു കുഞ്ഞു മണ്‍ചിരാത്

പേരറിയാ പൂക്കളും തേനീച്ചകളും

എന്റെ അയല്‍വാസി ടെറസ്സില്‍ കുറച്ചു പൂച്ചെടികള്‍ വെച്ചിട്ടുണ്ട്. കിളിയുടെ പടമെടുക്കാന്‍ പോയപ്പോഴാണ് ചെടി നിറയെ പൂത്തു നില്‍ക്കുന്നതു കണ്ണില്‍ പെട്ടത്. എന്നാല്‍ കുറച്ചു പൂവിന്റെ പടമെടുത്തു കളയാം എന്നു കരുതി തുടങ്ങി. അപ്പോ ദാ ഒരുത്തന്‍ പറന്നു വന്നു പൂവിനുള്ളിലേയ്ക്കൊരു തലകുത്തി മറിയല്‍.



വരിക തലകുത്തിമറിയുക ഇതായിരുന്നു അവന്റെ സ്റ്റൈല്‍.



പക്ഷേ പോവുന്നതിനു മുന്‍പ് അടുത്തുള്ളൊരു ഇലയില്‍ അല്‍പം പുഷ് അപ്പ് കൂടി എടുത്തിട്ടാണ് ചേട്ടന്‍ പോയത്.

അതു കഴിഞ്ഞപ്പോ ദാ വരുന്നു അടുത്തയാള്‍ അവനാളൊരു കുഞ്ഞനായിരുന്നു. രണ്ടു കാലിലും പൂമ്പൊടി കൊണ്ടുള്ള ഷൂവൊക്കെ ഇട്ട് സ്റ്റൈലിലുള്ള വരവ്.

ഇനി അവന്റെ കുറച്ചഭ്യാസങ്ങള്‍

ഇതിനിടയില്‍ അടുത്ത വീട്ടിലെ അമ്മൂമ്മ സൂര്യനമസ്കാരം ചെയ്യാന്‍ ടെറസ്സില്‍ കേറി വന്നു. ഞാന്‍ വേഗം ക്യാമറ പിന്നിലൊളിപ്പിച്ചു ഞാനൊന്നുമറിഞ്ഞില്ല രാമനാരായണയെന്ന മട്ടില്‍ ഒരു നില്‍പ്പങ്ങ് നിന്നു. അമ്മൂമ്മ പോയി കഴിഞ്ഞ് സ്വസ്ഥമായി പടമെടുക്കാമെന്നു വിചാരിച്ചു. സൂര്യനമസ്കാരമൊക്കെ കഴിഞ്ഞ് എന്നെ കണ്ടതും അമ്മൂമ്മ കുശലപ്രശ്നമൊക്കെ നടത്തി. പക്ഷേ കുശലപ്രശ്നത്തിനിടയില്‍ ഒരു കടുംകൈ കൂടി ചെയ്തു. പൂവ് മുഴുവന്‍ പറിച്ചെടുത്തു. ഒന്നു പോലും ബാക്കി വെച്ചില്ല. ഞാന്‍ അവരു പോയ്കഴിഞ്ഞ് എന്തോ പോയ അണ്ണാനെ പോലെ കുറച്ചു നേരം കൂടി അവിടെ നിന്നിട്ടു പതുക്കെ തിരികെ പോന്നു.



അടുത്ത ദിവസം വീണ്ടും ചെന്നു കാത്തു നില്‍പ്പാരംഭിച്ചു.ആദ്യം വന്നതൊരു കറുത്ത തേനീച്ച. അവനാളൊരു വേന്ദ്രനായിരുന്നു. എന്റെ ഫോട്ടോയെടുക്കാനും മാത്രം നീ വളര്‍ന്നോ എന്നൊരു ഭാവം. ചലനങ്ങളില്‍ എല്ലാം വളരെ വേഗം. ഒരു ഫോട്ടോ പോലും നേരാംവണ്ണമെടുക്കാന്‍ സമ്മതിച്ചില്ല.

പിന്നീടെത്തിയ കക്ഷി ഇതാ

എനിക്കു യാതൊരു ജാടയുമില്ല എത്ര വേണേലും എടുത്തോ ഫോട്ടോയെന്നും പറഞ്ഞു.





തേന്‍ കുടിക്കാന്‍ പോലും ധ്യതിയില്ല. പൂവിനെ തൊട്ടും തലോടിയും ചുറ്റി നടന്നും...അങ്ങനെയങ്ങനെ...

പിന്നെ ബൂലോകരോടൊരു അഭ്യര്‍ത്ഥന. ഈ പൂവിന്റെ പേരൊന്നും ചോദിച്ചു എന്നെ സമ്മര്‍ദ്ദത്തിലാക്കിയേക്കരുത്.നിങ്ങള്‍ക്കു ഇഷ്ടമുള്ള പേരു വിളിക്കാന്‍ അനുവാദം തന്നിരിക്കുന്നു.

ഇതില്‍ എനിക്കേറ്റവും ഇഷ്ടപ്പെട്ട ഒരു ചിത്രം

അപ്പൂസ് ക്രോപ്പ് ചെയ്തു തന്നത്.

സമര്‍പ്പണം:- ഈ ചെടികള്‍ നട്ടു വളര്‍ത്തിയ ആ അമ്മൂമ്മയുടെ പേരക്കിടാവിന്.

പരസ്പരസഹായസമിതി

നിങ്ങള്‍ എന്താ കാണുന്നേ? ഒരു മനോഹരമായ പനിനീര്‍പുഷ്പം അല്ലേ. ഞാനും അങ്ങനെ അതിന്റെ ഭംഗിയാസ്വദിച്ചങ്ങനെ നില്‍ക്കുവായിരുന്നു. ഒന്നു കൂടെ സൂക്ഷിച്ചു നോക്കിയപ്പോ ആരോ അതിനകത്ത് ഒളിച്ചിരിക്കുന്നതായി തോന്നി.
ദാണ്ടേ ആളെ പുടികിട്ടി. ഒരു ഉറുമ്പച്ചന്‍. പക്ഷേ ഇദ്ദേഹം ഒളിച്ചും പതുങ്ങിയും ഇതെവിടേയ്ക്കാണു പോവുന്നതെന്നറിയാന്‍ എനിക്കൊരു കൌതുകം തോന്നി ഞാന്‍ അദ്ദേഹത്തെ പിന്‍‌തുടര്‍ന്നു. ആ യാത്ര എന്നെക്കൊണ്ടെത്തിച്ചത് കൊണ്ടും കൊടുത്തുമുള്ള അധോലോക ജീവിതത്തിന്റെ ഉള്ളറകളിലാണ്.

കട്ടുറുമ്പിന്റെ പശുവളര്‍ത്തല്‍ കേന്ദ്രത്തില്‍ കട്ടുറുമ്പും കറവപ്പശുക്കളും.

പാലു കറന്നു കുടിച്ചുകൊണ്ടിരിക്കുന്ന ഒരു ഉറുമ്പിനെ ഈ ചിത്രത്തില്‍ കാണാം. ഇനി നമുക്ക് ഇതിനു പിന്നില്‍ നടക്കുന്ന കളികളിലേക്ക് വരാം.

black carpenter ants (camponotus pennsylvanicus) എന്നറിയപ്പെടുന്ന ഉറുമ്പിന്റെ പ്രധാന ആഹാരങ്ങളില്‍ ഒന്നാണ് മുഞ്ഞ(aphids)യുടെ മധുരമുള്ള വിസര്‍ജ്ജം. രണ്ടു കൂട്ടരും പരസ്പരം സഹായിച്ചു ജീവിച്ചു പോകുന്നു. മുഞ്ഞയുടെ വര്‍ഗ്ഗശത്രുക്കളായ വണ്ടുകളേയും വെട്ടിലുകളേയും ഉറുമ്പ് കൂട്ടം ചേര്‍ന്ന് തുരത്തിയോടിച്ച് അതിനെ രക്ഷിക്കുന്നു. അതിനു പ്രത്യുപകാരമെന്നൊണം ചെടികളുടെ നീരുറ്റി കുടിച്ച് മുഞ്ഞ പുറംതള്ളുന്ന ദ്രവം ഉറുമ്പുകള്‍ക്ക് ആഹാരമായി നല്‍കുന്നു. ഭക്ഷണം തീരുമ്പോള്‍ ഒരു ചെടിയില്‍ നിന്നും മറ്റൊന്നിലേക്ക് എടുത്തു കൊണ്ടു പോകയും തണുപ്പുകാലത്തില്‍ നിന്നും മുഞ്ഞയെ രക്ഷിക്കാന്‍ ഉറുമ്പ് അതിനെ കൂട്ടില്‍ കൊണ്ടു പോയി പരിപാലിക്കയും ചെയ്യാറുണ്ട്.